1 Timotì 1

Toŋtînì

1À nyak mu Bôl, ŋwàklù yìna, ma à mu chwok Fùyèn ghê Klistù Jisòs na mu hi mô wut à tum ha Klistù Jisòs. A mô Fùyèn fe a fu bonhe ghàhnà a ghàhnà sùbe ghê Klistù Jisòs we a ghàhnà ndùku yute, khə hamok na wù bènàlò. 2Mu nyàkà ŋwàklù yìna ha wò a Timotì. Wo mô kə nâ wan ha mu beka ghàh à wò kəta kə yi bimî yì mòk. Yènfù, a mô Bì, ghê Klistù Jisòs, Bâba ghàhnà chwuti təm a wuna ghɨ jûŋà ha wò nì kwohi seni, ma wò nê hi chyə̂ nì yutìnì.

Bôl jis na Timotì kɨn ha chichàsu fəmsu

3À ndùku mô te mu lo hi yèn a yi lak yi Màsìdoniyà, mu jis ha wò na wò faŋ à kə yi tèk yi Efisùs. Mu ndùku khɨŋa na wò faŋ à kə afû ma wò kɨn na ghɨt ale ghe de yikî yi fəm ye a ghɨna yike afû yâ. 4Jis na, kə ghɨt mɨ ghɨ̂n hi chyâhè yu, ghɨna gbê mâ mù màgân mù yîm kum gha be ghɨna. Gha mu ghe nê, ghɨta kûnè tu ghɨna kə halô, fê tâhè na kə ghɨta bimi hi nè fêt ye a Yènfù khɨŋa. Wùt mò kə hi nè fêt mi yîn a wu yu afa wù bime ha Yènfù. 5Mu jìsà gha yîn ha wò ni beka mu khɨŋa na ghɨt a bimena khɨti kôŋ ye a yi fwo a təm a yulena, kəta wi kwâktì yi be fê kəta yi bimî ye a yi mô hamok. Ghɨna shìki kəta kôŋ mi yîn, ma yi hi chwûtè na ghɨna ywolò yikî ye a ghɨt a bimena kəta hi tè khə. 6Ghɨt ale ti de yikî mi yîn faŋ kə yi yikî yi ngwòni. 7Ghɨna kôŋà hi tè mô chichàsu saksu Fùyènsu biyani khə wi nâbi gha ghe a ghɨna jìsà nì ghe a ghɨna yike, chwûtè na ghɨ khəlò.

8Ghàhnà khə na Sak yi Fùyènì jwòfàlò a wu yu afa ghɨta lèmà kə nâ te ghɨ kəta hi tè lèm. 9Ghàhnà kəta kəbi hi tè khə na ghɨ tà fati jə̂ sak mu tɨ̂n ha ghɨta jûŋà. Ghɨ bɨli fate ha ghɨt ghe a ghɨ khɨma saki nì ghê a ghɨ ta nì tu nì ghɨt ghe a ghɨ ngumle wi Yènfù nì ghe a ghɨ nê gha a be nì ghe a ghɨ jə̂mà wi ha Yènfù nì ghe a ghɨ sûlè Yènfù nì ghɨt a ghe a ghɨ ywite be ghɨna makə ne ghɨna nì ghe a ghɨ ywite ghɨt ale. 10Ghɨ fate ha ghɨt ghe a ghɨ chyə nì ywena, a bu ywena ghɨna, makə nì lɨmànà, a bu a lɨm a ghɨna, a fi fati kəbi ha lɨmànà ghe a ghɨ kaha chyə nì lɨmànà ale, nì ghɨt ghe a ghɨ bəkle ghɨta te wu kwòs nì ghɨta fəma, nì bɨ̀n à sak su fəmsu nì ghe a ghɨ nê nâbi gha ghe yikî jûŋì tunhe. 11Gha mɨ ghɨ̂n mò atɨ̂n à tum yì jùŋ afa a Yènfù fo na mu fokti. A mô Yènfù kana fe a ghɨta kokhe.

Bôl fo àyòŋnà te Yènfù kwohe seni ha wûn

12Mu fo àyòŋnà ha Bâba ghàhnà Klistù Jisòs te wù fo jyaka na mu hi nê fêt mi yîn, fî chwok mu na mu kokne kpenelò hi nè fêt yi wuni. 13Yènfù kwohi yi sen ni gha mɨ ghɨ̂n ha mu nâbi te mu ndùku yike gha a be kum wûn fê nyâblè, sûlè wûn, beka mu ndùku baha mô teka mu bimi, khə wi gha ye a mu nè. 14Bâba ghàhnà chwûtì təm a wuna ghɨ jûŋà ha mu nâ haŋaŋ, ni na mu bimi ha wûn hi tè fê kôŋà ghɨt à jɨ̀m. A ni gha ghe a ghɨ kəta hi tè gàn a wu yu afa ghàhnà nì Klistù Jisòs mò amok. 15Gha mi yîn na Klistù Jisòs tì ben a mbyî hi bònhè ghɨt a be ni mò kə nâ hamok, ma wùt wu wi hi tunhî. Mu mô kə nâ fə̀n atɨ̂n à ghɨt a be mɨ ghɨ̂n. 16Yènfù tì chwûtì seni kwolani ha mu beka mu ndùku mô fə̀n a gha a be. Yi gan ni shyəma Klistù Jisòs chwûtè mihi wunhî yi wuni hi nì na mu hi mô te chwena ha ghɨt ale shyəma ghɨna yen gha ye a wù ne ha mu ma ghɨ bimi ha wûn ma ghɨ hi kəta chyə ye a yi bè mê wi. 17Ghàh ni jə̀mà na ghɨ hi kokhe fə̀n we a wù saka a yu mù jɨ̀m, a mô kə wûn Yènfù, bu hi bè kpû, ghɨta yena wi wûn. Ghàh ni jə̀mà na ghɨta faŋ à hi ngumle kə wûn nâ a yû mù jɨ̀m. Àmèn.

Bôl jis na Timotì khɨti bimî yi wuni ma yi hi tâ

18Wâ mù Timotì, mu jìsà ha wò na wò kəta hi tè kwàktè gha ghe a fòktì su chiksu tì jìsa kum wò. Lyì gha mɨ ghɨ̂n ha mwə̀ mâ mù wòŋ ma wò fati ma wò hi nô fòktìsu fəmsu atɨ̂n. 19Fate khɨti bimî ya ha Jisòs Klistù ma hi kəta kwâktì yi yuleni. Ghɨt ale ti tunhî hi tè nè gha ye a kwàktì yi yuleni mi yîn tì chwùte mâkà yi bimî yi ghɨna. 20Hèmenìyùs nì Àlèksandà mò ghɨt ale atɨ̂n à ghɨt mɨ ghɨ̂n. Mu hì mô ma mu ti fo ghɨna ha Satàn na wù fo ngək ha ghɨna shyəma ghɨna yiki tofu ma ghɨna tê fè yike jə̀ gha a fəma kum Fùyèn.

Currently Selected:

1 Timotì 1: bmv

Highlight

Copy

Compare