2 Tèsàloniyàns 3
3
1Hi gòkhì a wana ne ghaha, ghàh jìsà na ghàn hi jə̂mà ha ghàh shyəma ghàh ni ma tum yì jùŋ yì Bâba ləma yen kə luk tù jɨ̀m shyəma ghɨta bimi ma ghɨ hi fo kokhînì ha Yènfù kəbi te ghàn tì bime hì fô. 2Ghàn jəm kəbi na Yènfù fihi ghàh a ghɨt ghe a wo a ghɨ kəta təm a be nì ghe a ghɨ nê gha a be. Ghàn khəlò na ghɨt ale tà bime jə tum yì jùŋ yina. 3Biyani Yènfù jîsà nâbi na ghə, nê kə yâ. Wù nê nêlò ma təm a ghana hi tâ ma wù bobhi ghàn a deblì a wô. 4Bâba ti ni ghàh tê hì yikte kə ghàn wu wùn. Ghàh khəlò na ghàn chyə kə nâ te ghàh jìsa na ghàn hi chyə̂ fê mô hi tè chyə yèn kə yâ.
5Ghàh jə̀mà na Bâba ni ghàn yen kôŋ ye a Yènfù kòŋà ghàn ma wù fê ni na ghàn hi wunhe kə yi wunhî te Klistù.
Ghɨt a bimena kəta hi tè fèt
6Ghàh jìsà ha ghàn a Bâba ghàhnà Jisòs Klistù a jyak a wana ne na, kə ghàn hi gbê ghàn à ghɨt a bimena ghe a ghɨ yole, nê wi gha ye a ghàh tì yike ghàn na ghàn hi nê. 7Nâ ghàn a ghàn a sù ngɨŋ khəlò na ghàn kəta hi tè fèt kə te ghàh ndùku fêtà. Ghàh ndùku yole wi te ghàh ndùku baha mô ghàhnà. 8Ghàh tà tì yə jə shyə a wûtà faŋ hi làk. Ghàh ndùku fêtà nâ nì jyaka. Ghàh ndùku fêtà nchwì fêtà ntuksu beka ghàh ndùku kôŋà wi hi tè fo ngə̂k ha ghàn. 9Ghàh ndùku kətalò kə nâ jyaka hi jìs na ghàn lak ghàh a yi fèt afa a ghàh ndùku nê biyani ghàh faŋ hì fêtà kə yi fêt shyəma ghàn sina ma ghɨ hi boŋa fêtà kəbi te ghàh. 10À ndùku mô nâbi te ghàhnà baha mô amok, ghàh jis ha ghàn na, “À tunhi nâbi nde na yi fètà wi, kə wùt ha ghàn fo shyə na wù yə.”
11Ghàh ni jìsà ni beka ghàh ywo na ghɨt ale mò a ghàn a fùtɨ̂n ma ghɨna ti tunhi na ghɨna nè fê fêtà wi nâ shyə ale hi gàmtè ngɨŋsu ghɨna su, faŋ hì lye chyâ kə ghɨta a ghâ. 12Ghàh jìsà ha ghɨt mɨ ghɨ̂n a Bâba Jisòs Klistù a jyak, jîsà kə nâ nì jyaka na, ghɨna hi fate chyə kə nâ te ghɨta kəta hi tè chyə̂, fêtà hi tè khɨte shyə hi gàmtè ngɨŋsu ghɨna su atɨ̂n. 13Ha ghàn a wana ne, kə ghàn bot, hi tè nè kə gha a jûŋà. 14Wùt shìki tunhi na yi nè wi gha ye a ghàh nyàka ha ghàn a ŋwàklù afân, ghàn lem yi se a wun wu wùn. Ghàn lem ya, kə ghàn hi fê nê kwônà gha nì wûn, shyəma wù yen ngɨŋ à wûn ma wù wumi. 15Biyani kə ghàn hi nê gha ha wun ni te ghàn nè ha bànà yânì, ghàn hi bɨlà fo tobhînì ha wûn kə nâ te ghàn fo ha wâ nì wânù.
Bôl jis gha a gokhena
16Mu jə̀mà chin na Bâba we a wù fo yutìnì ni ghàn hi kəta yutìnì kə yû mù jɨ̀m, makə à gan nâbi ghə. Bâba hi mô kə ha ghàn à jɨ̀m.
17À nyak kə nâ mu Bôl toŋtînì a wu lùk afân chin ha ghàn nì wo a ma. A mô chwena ghe a mu nyàkà yet yi mi nâbi a yìni ŋwàklù, mu lem na. 18Bâba ghàhnà Jisòs Klistù chwuti təm a jûŋà wuna kə ha ghàn à jɨ̀m.
Currently Selected:
2 Tèsàloniyàns 3: bmv
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc.
