1 Tèsàloniyàns 2

Fêt ye a Bôl ndùku nê a tèk yi Tèsàlonikà

1Wana noma, nâ ghàn, a ghàn a sù ngɨŋ khə na bên ye ghàh tì bèna hi jikte ghàn yâ tà tì ləhà jə halô. 2Ghàn khə na à ndùku mô nâ shyəma ghàh ben a Tèsàlonikà ma ghàh ti yen ngə̂k nâ haŋaŋ, ghɨ fî sûlì ghàh nâ a jûŋ a yi tèk yi Fìlibây. Yènfù ghàhnà fu ni na ghàh fokti tum yì jùŋ ha ghàn ma yì lo ha wûn nâ nì təm a ta, nâbi te ghɨta ndùku baha kôŋà wi hi yutî. 3Bên yahi mi yîn tà ləhà jə halô beka ghàh tà tì jah jə hi chyate na ghàn fyi tum yì jùŋ mi yìna. Ghàh tì chyati ghàn nì kwâktì yi jûŋì, mômhè wi hi lehe wût. 4Ghàh bɨlà jîsà kə te Yènfù khɨŋa beka fu ti chwok ghàh na ghàh hi fôktè tum yì jùŋ mi yìna, ghàh fôktè wi wu lum afa ghɨta khɨŋa. Ghàh fòktè hi nì na Yènfù hi saŋlê beka fu khəlò təm ghaha. 5Ghàn khəlò na ghàh tà tì ben jə ha ghàn hì jîsà na ghàn hi saŋlê. Yènfù khəlò kə nâ hamok na ghàh ndùku fôktè wi tum yì jùŋ ha ghàn na ghàn fo shyə ale ha ghàh. 6Ghàh ndùku nê wi gha na wùt ha ghàn, makə nâbi nde hi bəmhe ghàh. 7Ghàh ndùku làhi tè bufa mwə̀lû ha ghàn te ghɨt ghe Klistù tuma biyani ghàh bonhi china kə moŋ. Ghàh ndùku mô ha ghàn ni te nè wan a wu yu afa wù lè wana wuna. 8Ghàh tì fòkti tum yì jùŋ ha ghàn ma à fo Fùyèn, kum yi kôŋ yi nè wani mi yina a ghàh ndùku kəta ha ghàn, fî mômhì nâ tu lum tù jɨ̀m hi gàmtè ghàn beka ghàh ndùku kôŋà nâ jûŋ. 9Wana ne, ghàn khəlò kə nâ te ghàh ndùku fêtà nâ nì jyaka. Ghàh ndùku fêtà nchwì fêtà ntuksu njwo ghàh ndùku kôŋà wijə hi fo ngə̂k ha ghàn te ghàh fòktè tum yì jùŋ mi yìna ha ghàn a Yènfù fo na ghàh fokti. 10Ghàn mô bɨ̀n à sak a gha afa ghàh chehì nê, nâ Yènfù fê khə. Ghàh chehì nê a gha ha ghàn te ghɨt a bimena, ghɨ mô kə chilichili, yulê, kəta wi njahi. 11Ghàh chehì khɨte ghàn kə te bè wan khɨte wana wuna, 12chyate ghàn na ghàn hi kəta təm a ta, chyə chyənà ye a Yènfù kòŋà. Wù toŋa ghàn na ghàn bê chìnti wu lùk wu wunu wu fə̀nù ma boŋà khɨti ban yi chiki.

13Ghàh fo àyòŋnà ha Yènfù kə yû mù jɨ̀m beka à ndùku mô te ghàh bèna hi fòktì tum ye a Yènfù jìsà na ghàh bê fokti ha ghàn, ghàn yû bimilò, na à mò tum ma yì lo kə nâ ha Yènfù, a bu ha wùt. Tum mi yìna ndùku fêtà a ghàn a fùtɨ̂n ghɨt a bimena. 14Wana ne, a gha afa ghɨ ndùku gânà ha nôn a ghɨt ghe a ghɨ bime ha Klistù Jisòs a Jùdiyà ti gan kəbi ha ghàn. Ghɨta a ghàn a yi lak tì fo ngəksu ha ghàn, a mô kəbi ngək se a ghɨt a Jûs tì be fo ha ghɨt a bimena mu ghê. 15Ghɨt a Jûs ghɨ le tì ywiti fòktì su chiksu, ghɨ le ywi Bâba Jisòs, fî jim fihi ghàh a tu tèk. Ghɨna nî na lâ Fùyènù hi bâŋà, fê mô sù bànà nâbi ha nde, 16a wu lum na ghɨna chehì mômhè hi tàhì na kə ghàh fokti tum yì jùŋ ha tumu shyəma yì ni ma Yènfù bonhi ghɨna. Ghɨna ti ni kə besu ni su ti kwok kpên. Lâ Fùyènù ti bâŋ, Fu hì mô hi chwùtè gha ha ghɨna chîn!

Bôl hì kôŋà hi fè yèn hi jikte ghɨta a Tèsàlonikà

17Ghàh ni khɨŋa hi jìs a wana ne ghaha na, à ndùku mô te ghɨt ale ne na ghàh lo de ghàn a fu yulâ ni, ghàh lo kə nì wun yahi biyani təm mâhù faŋ hì kwâktè kə ghàn. Təm mâhù ndùku fê kwola wi a jûŋ kum ghàn, ghàh hì mômhè nâ nì jyaka hi kaha bèn hi yen a ghàn. 18Ghàh chehì kəta kə nâ hi kaha bèn hi yen a ghàn, nâ mu mômhì hi tân a ghan à bà biyani, Satàn tê dè na ghàh ben. 19Mu ndùku khɨŋa hi bèn ha ghàn njwo à mò ghàn ghe a ghàn ne na ghàh hi kəta kwâktìnì fê nê ghàh saŋlê, mô hi bè tê jâl kum shyə ghe a ghàh ni ke hi bè khɨti a wu yu afa Bâba ghàhnà Jisòs kaha bênà. Ba shyə atɨna ni mò kə nâ ghàn? 20Hamok, à nè kə nâ ghàn na ghàh hi jala fê saŋlê.

Currently Selected:

1 Tèsàloniyàns 2: bmv

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)