1 Tèsàloniyàns 3

1À ndùku mô te ghàh yena na ghàh wi hi fè kwut a təm hi tè mò yena wi ghàn, ghàh ki lêm na ghàh nè faŋa ma ghɨ hi chyə a tèk yi Atèn, 2ghàh chinhi wâ nì wâhù Timotì we a wù fètà ha Yènfù ghàh à wûn, fòktè tum yì jùŋ kum Klistù. Ghàh tum na wù bê ni ma ghàn hi kəta təm a ta, tôkà samhe ha Klistù, 3hi fè nì na kə wùt ha ghàn nê hi fê samhe wi ha Klistù kum ngə̂k ye a ghɨta ndùku fo ha ghàn. Nâ ghàn khəlò na à ni Fùyèn na ghɨta hi fo ngə̂k mi yina ha ghàhnà. 4Ghàn khəlò gha tɨni beka à ndùku mô te ghàhnà baha mô amok, ghàh fôktì ha ghàn kə wu tuk afu na, ghɨ bè folò ngə̂k ha ghàhnà, yi che kpen kə ya te nâ ghàn khə. 5A ni mò gha ye a yi che ne mu chinhi Timotì. Mu che chinhi na wù bê yen nâ ghàn tòkà samhelò ha Klistù agha beka mu ndùku wi hi fè kwut a təm hi tè chyə̂, khə wi na à gànà ghə ha ghàn agha. Mu chehì kwâktè kə na deblì làhi tè mò ma yì ti mômhì ghàn, fêt yi ghàhnà ləhà halô.

6Timotì ti kaha ben chin fôktì gha yi jûŋì ha ghàh na ghàn baha samhe kə ha Klistù, fê kôŋà ghɨt ale. Wù ti fî jis na ghàn kwàktè ghàh nâbi wùni yu, ghàn hi saŋle kə ni, kôŋà hi yen a ghàh kəbi te ghàh à wûn kòŋà hi yen a ghàn. 7Ghàh saŋle kə ni kum ghàn beka gha yi jûŋì mi yina a wana ne ghaha, nâbi te ghàh à wûn yena ngə̂k nâ a be. Lum we a ghàn samhe a Klistù atɨ̂n nè ghàh saŋle kə ni. 8Ghàh ni saŋle hi tè chyə chin fê fânà wi beka ghàn ti faŋ hì chyə kə ghàn à Bâba kə a shyə̀ àmòk. 9Ghàh à wûn fo àyòŋnà ha Yènfù ghàhnà fu kum ghàn, fê fô kum saŋlî ye a fu ne na ghàh hi kəta kum ghàn. 10Ghàh lona ha funfu nâ yû mù jɨ̀m nì təm ghaha à jɨ̀m na fu ni ghàh à wûn yena kə nâ ghàn ma ghàh fo gha ye a ghàn baha khɨŋa hi khɨlî a ghàn a yi bimî ha Klistù. 11Ghàh jə̀mà na Yènfù ghàhnà fu, a Bì nâ ha wun a ngɨŋ ghê Bâba ghàhnà Jisòs ni na kə gha yile tàhi na kə ghàh à wûn bê yen ghàn. 12Bâba nê ni ma ghàn ləma atɨn à yì kòŋ ma ghàn hi tôkà kôŋà ngɨŋ sanisu fê kôŋà ghɨt à jɨ̀m kəbi te ghàh kòŋà ghàn. 13Ghàn skìki nî ni, ma wù ni ma təm ghana hi tâ shyəma ghàn hi kəta wi be, ma wùt bê hi kəta wi gha hi jìs kum ghàn a Yènfù ashyə̂, a Bì ha ghàhnà, wu yu afa Bâba ghàhnà Jisòs kaha bena ghê ghɨt a wuna yulena.

Currently Selected:

1 Tèsàloniyàns 3: bmv

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)

1 Tèsàloniyàns 3

Currently Selected:

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)