1 Tèsàloniyàns 1

1À nyàk mu Bôl, nì Silàs nì Timotì ŋwàklù yìna ha ghàn, nôn a ghɨt a bimena ghe a ghɨ mô a yi tèk yi Tèsàlonikà. Ghàn mô ghɨt a Fùyènà a Bì ha ghàhnà nì Bâba Jisòs Klistù. Yènfù chwuti təm a jûŋà ha ghàn ma wù ni ma ghàn hi chyə nì yutìnì.

Lum te a ghɨta a Tèsàlonikà tì bime ha Jisòs hì chyə̂ atɨ̂n

2Ghàh fo àyòŋnà ha Yènfù kə yû mù jɨ̀m fê jə̂mà toŋte a yet ghana. 3Ghàh shihi jə̀m ha Yènfù, a Bì ha ghàhnà, ghàh hi kwâktè te ghàn nè fêt yi jûŋì njwo ghàn bime ha Bâba ghàhnà Jisòs Klistù fê kwàktè te ghàn chehì fêtà nâ nì jyaka njwo ghàn kòŋà wûn. Ghàh fê kwâktè te ghàn yute wûn, khə kə nâ na wù bè kaha bênàlò. 4Wana ne, ghàh khəlò na Yènfù ti koŋ ghàn, chwok ghàn na ghàn hi mô ghɨt a wuna, 5njwo ghàh tà tì yiki jə tum yì jùŋ kum Jisòs Klistù ha ghàn kə a tô yi jwô. Ghàh tì chwûtì gha kanana ghe Yohnà Yulena ne ha ghàn. Ghàh ndùku jîsà a gha, khə kə nâ na ghɨ mô hamok. Ghàn khəlò te ghàh ndùku chyə a ghàn a fùtɨ̂n. Chyəna mɨ ghɨ̂n ndùku mô hi nì na ghàn yiki gha. 6Nâ ghàn tî sina chyənà yahì fî sina chyənà Bâba. Nâbi te ghàn ndùku yena ngə̂k nâ haŋaŋ, Yohnà Yulena ben ni ghàn fyi tum àtɨ̂n nì saŋlînì. 7Kum ni, ghàn kahi hì mô te chwena ha ghɨt a bimena a Màsìdoniyà nì Àkayà. 8Ghàn ti nî ghɨta fati yu tum à Bâba a Màsìdoniyà nì Àkayà fî yû kə luktu tù jɨ̀m na ghàn ti bimi ha Yènfù, nâ ghàh fè kəta wi gha hi fè jìs ha wùt. 9Ghàh khə na ghɨt mɨ ghɨ̂n tì yû beka ghɨna ndùku jîsà kum te ghàn tì fye ghàh nâ wu lum wu jûŋù te ghàh bèna hi jikte ghàn, fî fôktì te ghàn ti de mosòmù hì fêtà kə ha Yèn fe a fu chyə fê mô hamok. 10Ghɨna fî fôktì te ghàn yute na Wâ Fùyèn bè kaha bênàlò a nyə̂. Jisòs Wâ Fùyèn mu wùna ni mò ma wù tî nî wù lôtì a yi kpû. Wù ti bônhì ghàhnà na kə Yènfù bê fo ngə̂k ha ghàhnà wu tuk wu saku.

Currently Selected:

1 Tèsàloniyàns 1: bmv

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)