1 Jon 1

Gha ye yi fo chyə ye yi bè mê wi

1Ghàh tî nyak ha ghàn kum Tum à Fùyèn ye a yì fo chyə ye yi bè mê wi. Tum yina ndùku lâwû shyəma mbyi yimi. Ghàh tî yû te wù ndùku jîsà kə nâ a ghàh a sù ngɨŋ, ghàh yen wûn kə nâ nì se ghaha, fî kum wûn kə nâ nì wo wahu, ghàh ghɨ hì jîsà chin kum wûn. 2Tum yina a yì fo chyə yina yi bè mê wi ni, chwûtì ngɨŋ à wûn, ghàh yên, hì fôktè kum wûn. Ghàh jìsà ha ghàn kum Tum mi yin te yì ndùku mô a Bì à ngwùŋ chwûtì ngɨŋ à wûn ha ghàh. 3Ghàh ni jìsà a gha ha ghàn, a mô ghe a ghàh yena fî yu lò, shyəma ghàhnà chintê faŋ kə ha shyə̀ à mòk, nì Bì ghê Wâ wûn Jisòs Klistù. 4Ghàh ni nyak a gha mɨ ghɨ̂n ha ghàn ni shyəma ghɨ ni, ma ghàhnà khɨti saŋlî ye a yi kpene.

Ghàhnà kəta hi tè gbì a yi bân

5Tum yin a ghàh ni lâkà ha ghàn chîn ni mò ma ghàh yu ha Jisòs Klistù. Yi mô na: Yènfù mò yi bân, kəta wi gha hi nì nì bɨn a finana nâ hakoh. 6Ghàhnà shìki jîs na ghàhnà mò nì Yènfù amok biyani fê gbê a bɨn a finana, ma yi hi chwûtè na ghàhnà wamalò, nê wi gha ye a yi mô hamok. 7Biyani, ghàhnà shìki gbî a fùtɨ̂n à yi bân kəbi yi ghəl te Yènfù mò a fùtɨ̂n à yi bân, ma ghàhnà hi chîntè mô kə ha shyə̀ à mòk, ma luŋ mù Jisòs, a Wâ Fùyèn nê sô jihi ghàhnà a sùbe kə sù jɨ̀m. 8Ghàhnà shìki jîs na ghɨ wi hi nè be ma ghàhnà hi lehe kə ngɨŋsu ghàhnàsu, hamok bu a ghàhnà a təm. 9Ghàhnà ki jî, lon a yi lêhìfo a ghàhnà sùbe, ma Yènfù nê lehêfo besu ghàhnàsu, ma wù sô yuhi ghàhnà nâbi ha ghə ghe ghɨ bu chilichili a ghàhnà a chyənà beka Yènfù jìsà nâbi ghə, nê kə yâ, nê nâbi ghə kə chilichili. 10Ghàhnà shìki jîs na ghàhnà tà ni jə be, ma ghàhnà hi lyê wûn ha wùt à yì fə̂m, ma gha wuni hi kəta wi luku a ghàhnà chyənà.

Currently Selected:

1 Jon 1: bmv

Highlight

Copy

Compare