1 Kòlitiyàns 7

Gha kum malâ

1Mu jìsà gha chin kum gha ghe a ghàn tì nyàka bufa ha mu. Yi jwôfà kə nâ na kə wùt mala. 2Biyani kum te mômhìnì làhi bèn, ma wùt lye a chyənà à tu fiŋ, mu wu hì jîsà na nâbi wùni wùt lɨmà kəta hi tè kəta ywê wûn, nâbi wùni wùt ywên kəta hi tè kəta lɨm à wûn. 3Wùt lɨmà kəta hi fo ngɨŋ à wûn ha ywê wûn kə nâ te saki khɨŋa, wùt ywên kəta hi nì kəbi ni ha lɨm à wûn. 4Yi mô ni beka wùt ywên kəta wi jyaka a wun wu wùn, biyani à kəta lɨm à wûn, kəbi yi ghəl te wùt lɨmà kəta wi jyaka a wun wu wùn, a kəta ywê wûn. 5Kə wùt nè tunhe hi fo ngɨŋ à wûn ha wùt wùlè, a bu kə na à bimi ghàn à jɨ̀m beka ghàn khɨŋa hi lyè wu yu hi jə̀m. Biyani yu tɨnu mî, ghàn kahi hì chyə chyəna malâ, bu ya, ma mômhì Satàn ni, ma ghàn fen beka ghàn wi hi khɨte ngɨŋ sanisu. 6Mu jìsà gha mi yin ha ghàn, chyâhè wi ha yi sâk. 7Mu làhi kòŋ na nâ ghɨt à jɨ̀m hi mô kə te mu. Biyani Yènfù mò ma fu ti fo fotu, nâbi nde kəta yi wuni, kə hanɨ̂ŋ.

8Mu jìsà ha ghɨt ghe a ghɨ baha mô teka ghɨ mala, kəbi nì ywen a nkwô na, yi jwôfà na ghɨna faŋ à kə yâ, ma ghɨ hi mô kə te mu. 9Biyani ghɨna shìki bu hi khɨte ngɨŋsu ghɨna su, ghɨna malâlò, beka yi jwôfà hi malâ chyâ hi tè mò nâbi yini, kwâktè kə wùt ywên makə wùt lɨmà.

10Chin ha ghɨt ghe ghɨ ti malâ, mu fo a yi sak, a bu a yi sak yi mi, a mô yi sak yi Bâba na, wùt ywên kəta wi hi dè lɨm à wûn. 11Biyani wù ki dê, wu faŋ kə wù nɨ̂ŋ, bu ya wu kaha yen bakti ghê lɨm à wûn. Wùt lɨmà ni boŋa kəta wi hi jùm à ywê à wûn.

12Ha ghɨt ale, à ni jìsà mu, à jìsà wi Bâba na, wùt bimena shìki kəta ywi, a bu wut wù bimena, wùt ywên àtɨ̂n bimi hi tè chyə ghê wûn, kə wù jum wûn. 13Wùt ywên wù bimena shìki tê kəta lɨm, a bu wùt wù bimena, wù bimi hi tè chyə ghê wûn, kə wùt ywên àtɨ̂n de wûn. 14Yi mô ni beka Yènfù nèlò lɨm we a wù tà bimi jə̂ na wù hi yule kum ywê à wûn, fê nê wùt ywên we a wù tà bimi jə̂ na wù hi yule kum lɨm à wûn. Yi yê hì bu ni, ma wana ghɨna hi bu nì yulînì biyani yi hì mô hamok na ghɨna yulelò. 15Wùt we wù tà bimi jə̂ ki kôŋ hi dè lɨm à wûn makə ywê wûn, wu de kə yi dê. Yi gan ni, sak yi malani tà fî khɨti jə wùt bimena makə à mò wù ywên, makə à mò wùt lɨmà. Yènfù toŋa ghàhnà na ghàhnà ben hi chyə nì yutìnì. 16Wò wùt ywên wù bimena khɨli ha ghə na wò wi hi bònhè lɨm wâ agha? Wò wùt lɨmà wù bimena khɨle ha ghə na wò wi hi bònhè ywi wâ agha?

Ghàn hi chyə kə wu lum afa a Yènfù tì toŋa ghàn atɨ̂n

17Yi ni mò na nâbi nde kəta kə hi tè chyə kə a wu lum afa a Bâba lèma na wù hi chyə̂, fê chyə kə te wù ndùku chyə wu tuk afa Yènfù toŋa wûn. À mò gha ye a mu yike ha ndasu Fùyènsu sù jɨ̀m. 18À shìki mô nâbi nde ma ghɨ ti se nam a wuna shyəma ghɨ toŋa wûn, kə wu let. Wùt shìki mô ma wù ti bimi ha Yènfù, teka ghɨ se nam a wuna, kə wù fi jis na ghɨ se. 19Hi se nam a wûtà makə hi faŋ hi sê, yi kəta wi gha hi nì. Gha yi ta mò kə hi tè lèma sak yi Fùyènì. 20Nâbi nde kəta hi tè mò kə wu lum afa a ghɨ tì shihi toŋa wun, wu mô atɨ̂n. 21Wùt hì mô ma wù ndùku mô a kwôs wu tuk afa Yènfù toŋa wûn, kə wù jis gha, biyani wù shìki kəta wu lum hi tè mô ha ngɨŋ, wu hi mô. 22Yènfù toŋa wùt na wù hi jûmtè Bâba, wu mô a kwôs, wu hi mô wut a wun a ngɨŋ ha Bâba kəbi yi ghəl te fu toŋa wùt, wu mô a wun a ngɨŋ, wu hi mô a kwôs ha Klistù. 23Yènfù hì mô ma fu ti yun ghàn laklò. Kə ghàn fi kahi hi mô wu kwôs ha ghɨta. 24Mu wu hì jîsà a wana noma na, Yènfù hì mô ma fu ti toŋa wùt, wu mò nâbi yàni, wu faŋ kə yâ wu hi mô kə ghê wûn.

Gha kum ghɨt ghe a ghɨ baha mô teka ghɨ mala kəbi nì ywen a nkwô

25Mu jìsà yi gha chin kum ghɨt ghe a ghɨ baha mô teka ghɨ mala. Mu kəta wi saki ma yi lo ha Bâba, mu jìsà kə yi gha ye a mu kwàktè te wùt we Bâba kwohi seni ha wûn ni wu kpenê na ghɨ hi samhe ha wûn. 26Mu kwàktè na, yi jwôfàlò na wùt faŋà kə ya beka ngə̂k se a su mô chîn. 27Wò hì kəta ywi, kə wò jum, wò hì mô kəta wi, kə wò mala. 28Biyani ma wò ki malâ, ma à hi mô na wò tà ni jə be, ma walà wù ywên shìki mò ma wù ti malâ, ma à hi mô na wù ya tà ni jə be. Ghàn hi khə na ghɨt ghe a ghɨ mala kəta ngəksu a mbye afân, a mô ngə̂k mi sin a mu mòmhè hi bukhî na kə ghàn hi kəta.

29Nâ gha ye a mu jìsà a wan a noma ni mò na, yu we a ghɨ lema hì mô ma wu ti bakhî. Hi yìmì chîn hi yèn ashyə̂, ghɨt ghe a ghɨ kəta ywena kəta hi tè chyə kə te ghɨna kəta wi, 30ghe a ghɨ jyê yi mô kə te ghɨ jyê wi, ghɨt ghe a ghɨ saŋle hi mô kə te ghɨna saŋli wi. Ghɨt ghe a ghɨ yuna mwə̀lû kəta hi tè mò kə te ghɨna kəta wi shyə. 31Ghɨt ghe a ghɨ fêtà nì mwə̀ mù chyə̂ kəta hi tè mò kə te ghɨ kəta wi gha kum mwə̀ mù tɨ̂n. Mu jìsà ni beka mwə̀ me a mù mò a mbyî chîn chyàlà kə yi chyâ.

32Mu khɨŋa na kə gha hi fumhe ghàn. Wùt we a wù tà mala jə lèmà to kə hi tè nè gha a Bâba, mòmhè hi nè na Bâba hi saŋlê. 33Biyani wùt wù malana lêmà to a wuna kə gha a mbye, hi tè nì na ywê wûn hi saŋlê. 34Wù yê kəta kwâktì yì mòk. Wùt ywên we a wù tà mala jə̂ makə walà wù ywên lèmà kə gha Bâba hi tè mò nì yulînì wu wùn fê mô nì yulînì a yòhnà, biyani wùt ywên wù malana lêmà tô kə gha a mbye, hi tè nì na lɨm à wûn hi saŋlê.

35Mu jìsà gha mi yina beka mu khɨŋa hi gàmtè ghàn, a bu na mu khɨŋa hi fo a jita ha ghàn. Mu khɨŋa kə hi nì na gha hi gbê kə wu lum afa a ghɨ kəta hi tè gbì atɨ̂n, hi fè nì na ghàn fo ngɨŋ sanisu sù jɨ̀m ma ghɨ hi fêtà kə ha Bâba.

36Wùt shìki mô nâbi wùni yu, kwâktè kə wan wù ywên ma ghê wûn tî lem na ghê wûn bè fê mala wi, wu ləma yênà, wù kaha yen na yi tà tì ni jə a jûŋ, wù hì kôŋà wu kaha yen ghê wun malâlò. Wu ki nî ni, ma à hi mô na wù tà ni jə be. 37Biyani ma à ki lèmà nâbi nde a wun a yi kwàktì na yi nè hì mô kə yâ, khə hi khɨte ngɨŋ à wûn faŋ teka wù mala, a bu na ghɨ fihilô wûn, ma à lem kə nâ wun a wun a yi kwàktì na yi mala wi wan wù ywên àtɨ̂n, ma à hi mô ma wù ni kə yi gha yi jûŋì. 38Yi ni mò na wùt we a wù mala wan wù ywên wù wûn mò ma wù ni kə nâ yi gha yi jûŋì, we a wù faŋ hi malâ wu ti ni gha, yi jwôfà chyâ ye meti.

39Wùt ywên wù malana fè kəta wi hi malâ hi tàn te lɨm à wûn baha chyə, ma lɨm à wûn ki kpû, ma wù mala nâbi nde we a wù kòŋà, biyani a kəta hi tè mò wut, jûmtè Bâba. 40À mò a mu yi kwàktì, ma wùt ywên àtɨ̂n hi saŋle chyâ wu yu afa wù faŋa kə yâ. Mu kwàktè na Yohnà Fùyènà nè tihe lò kəbi jîs yi mi.

Currently Selected:

1 Kòlitiyàns 7: bmv

Highlight

Copy

Compare