1 Kòlitiyàns 6

Kə ghàn hi some sak sanisu ha ghɨt ghe a ghɨ khə wi Yènfù

1Wùt ha ghàn ki lyê sak ghê wâ nè wûn atɨ̂n à yi bimî, hi lyè yèn ni yìni ha ghɨt a Fùyènà, wu bɨlì yen nì yinì ha ghɨta, a bu ghɨt a chilichili na ghɨna sak njwô ghə? 2Ba yi ni mò na ghàn khə wi na à bè saka ghɨt a Fùyènà mbyî ma? À shìki tè mò hi bè saka ghàn mbyî, ghàn hi ma yàni hi tè sak a saklà mù bot a ghàn a fùtɨ̂n agha? 3Ba yi ni mò na ghàn khə wi na à bè saka ghàhnà anjèlsu Fùyènsu ma? Ghàhnà shìki hi tè mò hi bè sak a anjèlsu Fùyènsu, ghàhnà hi ma yàni hi sak gha a mbye agha? 4Yi ni mò ni, ghàn hi kwote saksu lyê yênà nì sinsu ha ghɨt a sakana, ghɨ kpene wi nâ yi gha yile a ndâ Fùyèn njwô ghə? 5Ghàn wume wi? Ba yi ni mò na wùt tofa kpene wi a ghàn a fùtɨ̂n hi tè kàtà saksu atɨ̂n à wana ne ma? 6Chîn ni mò wâ nì bɨlà lyê yênà nì wâ nè wûn wu lùk wu saku na ghɨta sak, a bu a ghɨt a bimena.

7Sak mu sin a ghàn kəta a ghàn a fùtɨ̂n ni chwùtè kə nâ na ghàn ti fên. Yi jwôfà na ghɨta hi bɨlà nê be ha ghàn. Yi jwôfà na à hi bɨlà lô ghɨta lehe ghàn, fye mwə̀ mânù. 8Biyani nâ ghàn a ghàn a sù ngɨŋ nèlò besu ha wana ne ghana fê lehe ghɨna, fye mwə̀ mù ghɨna. 9Ba yi ni mò na ghàn khə wi na ghɨt ghe a bu chilichili bè lye wi wu lùk wu fə̀n wù Fùyènù ma? Kə wùt lè bè lehe ngɨŋ à wûn. Ghɨt ghe a ghɨ chyə nì ywena makə ghê lɨmànà, a kəta wi ghɨna, nì ghe a ghɨ kokhe mosòmù makə ghe a ghɨ khɨma sak yi malâ, nì lɨmànà ghe a ghɨ kaha chyə nì ghɨ le, 10nì ghɨt a chwoŋana nì ghɨt a se a fwona, nì ghe a ghɨ nyo lùkû, mu kwo a ghɨna, nì ghɨt ghe a ghɨ bobhe yet a ghɨ̂tà, nì ghe a ghɨ chwoŋa chwoŋ yi ta, bè lye wi wu lùk wu fə̀n wù Fùyènù. 11Ghɨt ale a ghàn a fùtɨ̂n ndùku mô kəbi ni, biyani chin hì mô ma ghɨ ti su fihi be sanisu, ghàn ti yulî fî ni ghàn hi mô chilichili a Yènfù ashyə̂. Gha mɨ ghɨ̂n mò ma ghɨ gan a Bâba Jisòs Klistù a jyak ma à ni a Yohnà Fùyèn fu ghàhnà fu.

Ghàn hi kokhe Yènfù nì wun yani

12Wùt wùlè làhi jìs na, “Mu làhi nì nâbi ghə.” Yi mô kə nâ hamok biyani a bu gha à jɨ̀m a ghɨ mô hi gàmtè a wût. À mò ha mu, ma mu làhi nì nâbi ghə, biyani bu hi tè mò a kwôs nâ a yi gha yile. 13Wùt làhi jìs kəbi na, “Ghɨ yə nâbi ghə, ghɨ yênà kə wu là, lâ mô kə hi tè fye mwə̀ mù yə̂mù.” Yi mô kə nâ hamok biyani Yènfù mô hi bè bobhi lâ tɨnu bakhe kə nì mwə̀ mù yə̂mù. Wun wu wûtù wijə na ghɨ hi nê gha a tu liŋa atɨ̂n, wu bɨlà mô hi tè nè yi fêt atɨ̂n ha Bâba, a mô Bâba a wù tòknè nì wun wu tɨnu. 14Yènfù tì lôhì Bâba a yi kpû, ghɨ mô hi bè lòhè kəbi ghàhnà a wun a jyak.

15Ba yi ni mò na ghàn khə wi na wun yani mò bâh à wùna a Klistù ma? A ni jìsà na mu làhi lyè bâh à wùna Klistù hi nì na à hi mô bâh à wùna a kpàlànà agha? Yi wi hi tè mò ni! 16À ki chyə nâbi nde ghê kpàlànà, ma ghê ghɨna hi mô kə a shyə̀ à mòk! Yi mô kə yi ghəl te ghɨ nyaka a ŋwàklù Fùyèn na, “Ghɨna à bà bè kahe ma ghɨ hi mô kə a shyə̀ à mòk.” 17À mò ha wùt we a wù chìnte ghê Bâba, kəta kə təm yì mòk ghê wûn.

18Ghàn tet à kahi a yi bàm a gha tu liŋa. Wùt ni nâbi yìni gha yi be yi wi hi bobhi wun wu wunu, biyani ma wù ki nê yi gha tu liŋa ghê wùt ywên makə ghe wùt lɨmà, ma wù bobhi wun wu wunu. 19Ba yi ni mò na ghàn khə wi na wun yani mò ndâ Yohnà Yulena te Yènfù fo na ghɨ hi chyə̂ a ghàn à fùtɨ̂n ma? À baha fê kəta wi ghàn, ngɨŋ sanisu, à kəta Fùyèn. 20Yènfù hì mô ma fu ti yun ghàn laklò. Ghàn lyi lê wun yani ma hi nê gha atɨ̂n, ghɨ fo kokhînì ha Yènfù.

Currently Selected:

1 Kòlitiyàns 6: bmv

Highlight

Copy

Compare