1 Kòlitiyàns 5

Kə ghàn de be a ndâ Fùyèn

1Mu ti yu te ghɨ jîsà, yi mô kə nâ hamok na ghàn ghɨ le chyə chyənà su liŋsu. Lum we a ghàn chyə atɨ̂n befa chyâ nâ te ghɨt ghe a ghɨ khə wi Yènfù chyə. Mu ti yu na wùt làwû a ghàn a fùtɨ̂n, chyə̂ nì ywê bè à wûn. 2Gha ni kə̀kà ni, ghàn ghaŋhe wu wun kum ghə? Ba ghàn bɨlà mô hi tè jì hi fè jùmà fihi wùt we a wù mòmà nki yi gha mi yîn a ghàn a nòn? 3Nâbi te mu bu ghàhnà ghɨ̂n, ghàhnà mò kə amok a yòhnà. Mu hì mô ma mu ti kat sak kum wùt mu wuna a wù mòmà gha mi yîn, kə yi ghəl te ghàhnà ye hì mô kəbi amok, ma mu kat. 4Ghàn yûŋtì nâbi wùni yu, yohnà ma hi boŋa mô a ghàn a fùtɨ̂n. Ghàn fî yûŋtì, ghàn lyi a jyak ghe a Bâba Jisòs fo ha ghàhnà, 5ghɨ fo wùt mu wuna ha Satàn, ma wù bobhi chyak a wuna a wùna, shyəma ghɨ bê bonhi yohnà a wuna a wu tuk afa a Bâba Jisòs kaha bênà atɨ̂n.

6Ghaŋhi wùn mi yîn jwòfà wi. Ba ghàn khə na chɨmlana tobte nâbi yàni, ghɨ gbi kə a bân a kwaŋa à jɨ̀m. 7Yi ni chwùtè na ghàn kəta hi màkà be a ghàn a fùtɨ̂n hi kahi hi tè mò te tuk à bân chɨmlana bu atɨ̂n. Mu khə na ghàn hì mô te tuk a bana chɨmlana bu atɨ̂n beka Klistù we à mò wâ njyə̀ Dàŋa chyalana ha ghàhnà hì mô ma ghɨ ti se wun ha yi fô. 8Ghàhnà yə lê tuk wu Daŋa chyalanu mu wûn. Ghàhnà shihi yə, kə ghàhnà hi yə nì təm a be makə nì be. Be mò kə te chɨmlana a bân. Ghàhnà bɨlà yə ban ghe a ghɨ kəta wi chɨmlana a mô təm a yulena nì gha ye a yi mô hamok.

9Mu tì nyak ha ghàn na, kə ghàn hi chîntè ghàn à ghɨt ghe a ghɨ chyə chyənà kpàlà. 10Mu tà tì jis ni bakhe ghɨt ghe a ghɨ ngumle wi Yènfù a mbye afân ni te ghɨt a se a fwona nì ghɨt a chwoŋana nì ghɨt ghe a ghɨ kokhe mosòmù, beka wùt shìki mô hi tet ghɨt mɨ ghɨ̂n, ma yi hi mô na wù làhi fwo chyà a mbyî. 11Mu tì bɨlì nyak hi jìs na, kə ghàn hi chîntè ghàn à wùt wu toŋte ngɨŋ à wûn na wâ nì biyani jûmtè ywena makə lɨmànà, se a wuna fwô, wu fê kokhe mosòmù. Mu ndùku jîsà na kə ghàn hi chîntè ghàn à ghɨt ghe a ghɨ bobhe yet a ghɨ̂tà, fê nyo lùkû mu kwo ghɨna kəbi nì ghɨt a chwoŋana. Kə ghàn mom kə nâ hi tè yə ghàn à nki ghɨt mɨ ghɨ̂n.

12Nâbi ha nkàn, mu te wut wù bimena kəta wi hi tè sak à ghɨ̂t, ghɨna bu a ghàhnà a nòn. Ghàn kəta hi tè sak kə ghɨt ghe a ghɨ mô a ghàhnà nòn. 13À saka kə Fùyèn ghɨt ghe a ghɨ bu a ghàhnà nòn. Ghɨ nyak a ŋwàklù Fùyèn na, “Ghàn jum à fihi wùt wù be a ghàn a fùtɨ̂n.”

Currently Selected:

1 Kòlitiyàns 5: bmv

Highlight

Copy

Compare