1 Kòlitiyàns 4

Ghɨt a tuma Klistù

1Ghɨta kəta hi tè lyè ghàh te ghɨt a fetana ha Klistù ghe a ghɨ fo gha a letena ghe a ghɨ mô kum Yènfù a ghɨna wô. 2Nâ gha yi ta ha ghɨt a fetana mò na ghɨna hi chwûtè na, ghɨna fètà kə nâ hamok. 3Ha mu, à mò kə nâ gha yi tetani na ghàn hi saka mu makə à saka ghɨt ale. Nâbi mu saka wi ngɨŋ à mì. 4Mu kwàktè khɨle wi gha yi be yile te mu ne, biyani yi chwûtè wi na mu tà bobhi jə gha. À mò kə Bâba hi sak a mu. 5Kum ni, kə ghàn kat sak a wùt lè tû teka yu tɨnu kpen. Ghàn yuti ma Bâba ben. Wù bênà hi chwùtè banhe gha a letena ghe a ghɨ nyamte nê a bɨn a finana, a fôktè kwâk te a ghɨta lètà a ghɨna təm, ma Yènfù ki bəmhe nâbi nde a wun yi fèt.

6Mu jìsà gha mɨ ghɨ̂n a wana noma kum ngɨŋ à mì ghàh à Àbolòs kə ha chwena shyəma ghàn yiki, ghàn hi nê kə gha ye a ghɨ nyaka a ŋwàklù à Fùyèn. Kə wùt ha ghàn hi ghaŋhe wunu kum wùt wùlè, kəhe wùlè. 7À jis nde ha wò na wò chyàlò ghɨt ale agha? Wò kəta nâ ghə teka ghɨ fo yi fô agha? Wò shìki kəta a shyə ma ghɨ fo yi fô, wo hi ghaŋhe wunu te ghɨ tà fo jə yi fô njwô ghə?

8Ghàn hì mô ma ghàn ti khɨti nâbi ghə te ghàn khɨŋa ma? Ghàn hì mô ma ghàn ti ghak kpên ma? Ghàn jìsà na ghàn mò tu fə̂n, biyani ghàh bu tu fə̂n. Nde fo ma ghàn hi mô kə nâ tu fə̂n hamok shyəma ghàhnà hi saka amok agha? 9Yi kə̂kà ha mu na Yènfù ti lem na à kəta ghàh ghɨt a tuma lùk wu gokhenu, hi kputî a ghɨta ashyə̂. Yi kə̂kà na ghàh mò ghɨta te ghɨ saka hì mô hi ywî kə mbyî yì jɨ̀m ashyə̂ bakhe nì anjèlsù Fùyènsù. 10Ghàh mò wù ngwò ha ghɨta kum Klistù, ghàn mô ghɨt a tofana a Klistù a ghâ. Ghàh yolelò biyani ghàn tâ. Ghɨta kokhe ghàn biyani lyê wi ghàh a shyə̀ ale. 11Hi tàn chîn, jìŋ yafa ghàh, kuŋ à mòlû fê yima ghàh. Ghàh mâkà kə shàklà mù sùju, ghɨ sama ghàh, ghàh jɨ̂ŋà, kəta wi luku hi chyə̂. 12Ghàh fêtà nì jyaka, kə nâ nì wo wahu. Ghɨta shihi sùlè ghàh, ghàh hi bɨlà jə̂mà na Yènfù bonhi ghɨna, ghɨ fo ngə̂k ha ghàh, ghàh hi wunhe kə yi wunhî. 13Ghɨta bobhe a yet ghaha biyani ghàh jîsà kə nì jyə̀ yì bonana. Ghɨta lyê ghàh ha mwə̀ mù màknemù a mbyî, fê lyê ghàh a yi liŋ.

14Mu nyàkà wi gha ghɨ̂n ni, hi wumhe ghàn, mu bɨlà nyâkà hi yike ghàn te wana ma ghɨ kòŋà. 15Ghàn shìki kəta kəbi ghɨta ghɨ tôknè tobhe ghàn kum Klistù, ghɨ taŋa ghɨ mê wi biyani kəta kə bì wù mòk. Mu hì mô ma mu tì ben te bì ha ghàn yi gha yi Klistù Jisòs tohne a tum yì jùŋ yi wun afa a mu ndùku yike ghàn. 16Mu chyate ghàn na, ghàn hi sine chyənà à mì. 17A ni gha ye a mu tuma Timotì ha ghàn. Wu mô wâ mù wù kòŋ, mu samhe ha wûn beka wù jùmtè Bâba nâ a jûŋ. Wu nê ghàn yɨ̂ŋtè chyənà ye a mu chyə te wùt à Klistù. Mu yike chyənà mi yìna a chìnti à ghɨt a bimena kə tu luk tù jɨ̀m.

18Ghɨt ale a ghàn a fùtɨ̂n ghaŋhe wu wun, kə̂kà na mu bê wi hi yen a ghàn. 19Biyani ma Bâba ki bimî, ma mu motè kə ni ma mu bê yen ghàn. Mu bênà hi tè ywo kə gha ghe a ghɨna ghaŋhe wunu jìsà, hi fê yen kə nâ jyak ghe a ghɨna jìsà na ghɨ kətalò. 20Fə̂n wù Fùyènù mò ni, a bu yi jwo yi kumani, ghɨ yena jyak atɨna a gha afa a ghɨta nè. 21Ghàn kòŋà na mu shihi bèn ha ghàn, ma mu ben nì ghə? Ghàn kòŋà na mu ben nì wàn ma, ma mu ben nì kôŋì nì bonanì agha?

Currently Selected:

1 Kòlitiyàns 4: bmv

Highlight

Copy

Compare