1 Kòlitiyàns 16

Ghɨ fo gâmtìnì ha ghɨt a bimena

1Mu jìsà yi gha chin kum mwə̀ me a ghɨ yuŋte hi fo yi gâmtì ha ghɨt a Fùyènà. Mu tî jis na chìntisu ghɨt a bimena se a su mô a Gàlesiyà ni gha, ghàn kəta hi nì kəbi yâ. 2À shìki tê mò nâbi wùni tuk wu shyə a ngâm, nâbi nde fihi shyəlâfù atɨ̂n à mwə̀ afa wù khɨte wu lem lò, shyəma mu bê ben, ma ghɨ hi fê kəta wi hi chwute yi chwutî mwə̀lû. 3À bè hì mô a wu yu afa mu bèna, ma mu tum ghɨt ghe a ghàn chwokte nì ŋwàklù, ma ghɨna lyê yen nì fo mi yina a Jèlusalèm. 4Yi shìki hì mô a jûŋ ha mu hi yèn afû, ma ghàh à ghɨna yen amok.

Gha ghe a Bôl tì lèma hi nì

5Mu bê chyâ lumu a Màsìdoniyà shyəma mu bê jikti ghàn. 6Mu bênà hi chyəti ghàhnà a fu yulâ hi tàn shyəma lɨ̀m ban, ma mu bê shihi lò hi tè yèn nâbi afa, ma ghàn gâmtè fo mwə̀ me a mu mò hi lò nì munù. 7Mu kòŋà wi hi bè yena ghàn kə ni te mu dàŋhè chyà yi chyâ. Mu khə na Bâba ki bimî, ma ghàhnà ghɨ̂n chyəti. 8Mu kwàktè nâ biyani, mô hi chyəti a Efisùs afân hi tàn wu tuk wu Bentikòs, 9beka lumu ti gan ha mu na mu fatè ni kə nâ fêtì afân, nâbi te ghɨta nò mu, dô kə ni.

10Timotì ben nâbi wùni yu, ghàn ni wu hi mô kə nâ a jûŋ a ghàn a fùtɨ̂n beka wù nèlò fêt yi Bâba kəbi yi ghəl te mu. 11Kə wùt nè kehe wûn. Ghàn gamti wûn, ma wù gbê kə nì yutìnì ma wù kahà ben beka ghàh à wana ne ale yutelò wûn.

12Kum wâ nè ghàhnà Àbolòs, mu ti chyati wun nâ haŋaŋ kə ghan hi dù na, ghê wana ne ale bê jikti ghàn biyani wu kôŋà wi hi bèn chîn. Yu nè kpenalò, ma wù ben.

Toŋtî yi gokheni

13Ghàn hi mô gbûtè. Ghàn fate khɨti bimî yani. Ghàn hi kəta təm a ta fê tâ, fânà wijə shyə ale. 14Ghàn hi nê nâbi ghə, kə nì kôŋì.

15Ghàn khəlò Sɨ̀tèfanàs a wana noma, ghê ghɨt a wuna nda. À tì yìti bimi ghɨna a Àkayà. Ghɨna ti fo ngɨŋsu ghɨna su hi gàmtè ghɨt a Fùyènà. Mu wu hì chyate ghàn na, 16ghàn hi ywo ha ghɨta te wûn nâbi nì nde wùlè we a wù fètà ghê ghɨna.

17Mu saŋlelò kum te Sɨ̀tèfanàs nì Fòtùnatùs nì Àkaykùs ti ben ha mu, beka ghɨna tì ben hi lyè luk wanu. 18Ghɨna ti bonhi təm a ma kəbi yi ghəl te ghɨna ndùku bonhe ghana. Ghàn hi ngumle ghɨta te ghɨ̂n ni.

19Ndasu Fùyèn se a su mô a bàh à Esiyà afân jis na mu toŋti ha ghàn. Àkwɨlà ghe Bìsilà nì chìnte ghɨt a bimena ghe a yì yùŋtè a ghɨna ndâ jis na mu toŋti ha ghàn nâ a jûŋ a Bâba yi yet. 20Nâ wana ne ghàhnà à jɨ̀m ti chinhi toŋtînì ha ghàn. Ghàn toŋti ngɨŋ sanisu kə nâ a lum hi chwùtè kôŋì yi ghɨt a bimena.

21A nyàk kə nâ mu Bôl toŋtînì wu lùk afan chin ha ghàn nì wo a ma.

22Wùt hì kòŋà wi Bâba, ma lòn kwo wûn. Bî, a Bâba wâhù!

23Bâba Jisòs chwuti təm a jûŋà a wuna ha ghàn.

24Mu kòŋà ghàn nâ à jɨ̀m beka ghàhnà chìntè mô nì Klistù Jisòs a kak à mòk. Àmèn.

Currently Selected:

1 Kòlitiyàns 16: bmv

Highlight

Copy

Compare