1 Kòlitiyàns 15
15
Lôtì kpu yi Klistù
1Mu khɨŋa chin a wan a noma hi yɨ̀ŋtè tum yì jùŋ ye a mu tì fòkte ha ghàn, ghàn yû bimilò hì mô kə atɨ̂n. 2A mô tum yì jùŋ mi yîn a ye yì bònhè ghàn, wu yu afa ghàn fate khɨte gha ye a mu tì fòkte ha ghàn, bu ya, ma bimî yani ləha kə halô.
3Nâ gha yi ta ye a mu tì yike ghàn mò kə nâ yin ye a ghɨ tì boŋa yike mu na, Klistù tî kpu kum gha ghàhnà ghɨ be, kə yi ghəl te ghɨ tì nyàka a ŋwàklù Fùyèn; 4ghɨ gûmà wûn, à hì mô a mu tuk mù tât, ghɨ lôhì wûn a yi kpû kə yi ghəl te ghɨ tì nyàka a ŋwàklù Fùyèn 5nâ wù chwûtì ngɨŋ à wûn ha Sefàs fî chwûtì kəbi ha ghɨt a tuma ghe njwòsù bà. 6Wù ti chwûtì kəbi ngɨŋ à wûn ha jùmtìbàmsu wunsu su chyâ yi ghə yì tân kə wu yu wù mòk, ghɨt a dona a ghɨna fùtɨ̂n baha làwû hi tàn lân, su lesu mô ma su ti kputî. 7Wù ti chwûtì ngɨŋ à wûn ha Jêms fî chwûtì ha ghɨt a tuma, nâ à jɨ̀m.
8A yi bàm atɨ̂n wù ki chwûtè gòkhì ngɨŋ à wûn ha mu nâbi te mu mò te wut a ghɨ tì bwə teka yu kpen. 9Beka mu mò wut we a wù gokhe atɨ̂n à ghɨt a tuma, kpene wi na ghɨ hi tè toŋte mu na wut wù tum beka mu tî fo ngə̂k ha chìnte ghɨt a Fùyènà. 10Biyani kum təm a jûŋà a Fùyènà, mu wu hì mô shyə ghe a mu mò ghɨna chîn. Təm a jûŋà mɨ ghɨ̂n tà ləhà jə halô. Mu ti bɨlì fêt nâ haŋaŋ, fêtà chyâ nâbi nde atɨ̂n à ghɨt a tuma nâbi te à chehì laha bu fêt yi mi, à chehì fêtà təm a jûŋà a Fùyènà mu ghe a mu wùn. 11Yi mô na, makə à tì fòkti mu tum yì jùŋ ha ghàn, makə à tì fòkti ghɨt ale mu ghê, gha yi ta mò kə na, ghɨ ti fôktì, ghàn bimî.
Lôtì ghàhnà a yi kpû
12Ghɨ tî yikî na ghɨ tì lôhì Klistù a yi kpû, ghɨt ale ghàn a fùtɨ̂n gbi yàni hi tè fê jìs na ghɨta bè lôtè wi a yi kpû agha? 13Nâbi ni, yi shìki mô hamok na ghɨta lòtè wi a yi kpû, ma yi hi chwûtè na ghɨ tà tì lôhì jə Klistù. 14Yi shìki mô na ghɨ tà tì lôhè jə Klistù a yi kpû, ma yi hi chwûtè na yikî yahi mò kə halô, ma nâbi bimî yani hi fêtà wi gha yile. 15Yi shìki mô ni, ma yi hi fê chwûtè na ghàh wama kə yi fə̂m kum Yènfù beka ghàh jìsà na Yènfù tî lôhì Klistù a yi kpû. Yi shìki mô hamok na ghɨta bè lôtè wi a yi kpû, ma yi hi chwûtè na fu tà tì lôhì jə wûn a yi kpû. 16Yi shìki mô hamok na ghɨ lôhè wi ghɨta a yi kpû, ma yi hi chwûtè na ghɨ tà tì boŋ lôhè jə Klistù. 17Yi shìki mô na ghɨ tà tì lôhì jə Klistù a yi kpû, ma bimî yani hi mô kə halô, be sanisu baha mô kə a ghàn a tû 18Yi mô ni, ma yi hi chwûtè kəbi na ghɨt ghe a ghɨ tì kpo ma ghɨ ti bimi ha Klistù, ti ləhà kə halô. 19Ghàhnà shìki mô ma ghɨ ti fo ngɨŋsu ghàhnàsu ha Klistù na wù gamti ghàhnà, wu mô hi gàmtì kə kum chyənà ye a ghàhnà chyə a mbyî chîn, ma yi hi kpene shyəma ghɨ hi kwohe seni ha ghàhnà chyâ te ghɨ kwohe nâbi ha nde a mbyî.
20Biyani yi wijə ni. Yi mô kə nâ hamok na ghɨ tì lôhì Klistù a yi kpû, a mô wûn we a wù tì lòte a yi kpû ha ghɨta ashyə̂ à jɨ̀m hi chwûtì na ghɨ bè lôhèlò kəbi ghɨta a yi kpû. 21Beka kpû tì ben a chyə̂ ma à ni wùt, à fî ni kəbi wùt lè na ghɨta hi lôtè a yi kpû. 22Yi ni mô kəbi yi ghəl te ghɨt à jɨ̀m kpo beka Adàm tì kpo, a mô be ghɨna, ghɨt à jɨ̀m ghe a ghɨ bime ha Klistù mò hi bè hi tê chyə̂, kə yi ghəl te Wù tì lòte hì chyə̂. 23Nâbi nde bè lôtèlò a yi kpû kə a wun wu yu. Klistù ndùku mô wut wù shyə̂ hi lòtì, mô hi bè shihi bèn ma ghɨ lohi ghɨt ghe à mò ghɨt a wuna. 24Klistù bè tâ chyâlò nâ yohnù wu be wù jɨ̀m te wu saka mbyî bakhe nì jyak wù jɨ̀m. A yi bàm atɨ̂n, ma mbyî mi, ma wù kahà fo fə̂n wù wunu ha Bì, Yènfù. 25Yi mô ni beka Klistù kəta hi faŋ hi tè sak kə yi sâk hi tàn shyəma wù tum bànàsu wunsu nâ sù jɨ̀m a chyə̂, hi tomte wulu wunu a ghɨna tû. 26Bànà wûn yì gòkhena ye a wù nè bobhe mô yi kpû. 27Ŋwàklù Fùyèn jìsà na, “Yènfù ti lem mwə̀ mù jɨ̀m a wun yi dèt yi wùlu na wù hi sakâ.” Ghàn ki jîs na, “Ghɨ ti lem mwə̀ mù jɨ̀m a wun yi dèt yi wùlu,” ghàn hi jîsà ni bakhe Yènfù atɨ̂n, yi kə̂kà kə nâ a ndan na à lem Fùyèn nì ngɨŋ à wûn lem mwə̀ muna a Klistù yì dèt yi wùlu. 28Yènfù bè lèmà mihèlò mwə̀ mù jɨ̀m a Klistù yì dèt yi sak, ma nâ Klistù lem ngɨŋ à wûn a yi dèt yi sak nì we a wù tì lèma mwə̀ mù jɨ̀m a Klistù yì dèt yi sak, shyəma Yènfù hi saka fə̂n wù wunu kə a to mwə̀ mù jɨ̀m.
29Ghɨta shìki lôtè wi a yi kpû hamok, ghɨta ta hì fye mòlû a ghɨt a kputena yi yet, ma tofu atɨ̂n hi mô nâ ghə? Yi shìki mô na ghɨ lôhè wi ghɨta a yi kpû, ghɨta hi fye mòlû a ghɨt a kputena yi yet njwô ghə? 30Yi shìki mô hamok na ghɨ lôhè wi ghɨta a yi kpû, ma yahi hi mô nâ ghə hi tè mò kə jwô yi kpû yû mù jɨ̀m agha? 31Mu mò kə jwô yi kpû mu tuk mù jɨ̀m a wana noma! Mu jìsà ni, jala kum ghàn beka ghàn à Klistù Jisòs, a Bâba ghàhnà mò amok. 32Mbè mì ni mò nâ ghə te mu chehì nô a Efisùs ghàh à ghɨta, ghɨna mô te nyamsu a ghə̀n, wu yu afa yi shìki mô kə nâ hamok na ghɨta bè lôtè wi a yi kpû agha? Yi shìki mô ni, ma yi hi chwûtè na ghɨt ale jìsà kə nâ hamok na, “Ghàhnà hi yə kə yi yə̂, fê nyô beka à bè hì mô a yi bîs ma ghàhnà kputè ləha.”
33Kə wùt bè lehe ghàn. Ghàn hi khə na, “Sunsu besu bobhelò chyəna jûŋà.” 34Ghàn kaha yɨngti ngɨŋ sanisu, ma ghàn de be yina a ghàn nè ni. Mu jìsà ni na ghàn wumi beka ghàn ghɨ le fate khə wi Yènfù.
Wun we a wu lôtè a yi kpû
35Wùt lè làhi buf na, “Ghɨ mô hi bè lòhè yàni ghɨta a yi kpû agha? À mò yìni nki wùni ghɨna bè hì kəta agha?” 36Wo bufa yi gha, yi kəta wi tofu! Wò ki yome yi se shyə̀ le, yi ki faŋ hi kpû, yi wi hi fù. 37Ngwìk ye a wò yome wijə wun wu shyə̀ we a wu nè ləma kwoka. À mò kə yi se shyə̀ yile ni te se ngwìk à wît makə yi se yi ngwìk yile. 38Yènfù fo kə wu wun we a fu kôŋà nâbi ha yìni nki ngwìk, a mô kə wu wun we a wu kpene ha nki ngwìk mi yê. 39Wun wu mwə̀ mù yòhna mù jɨ̀m wijə yi ghəl. Ghɨta kəta kə yi ghɨna nki wùni, nyamsu kəta kə yi ghɨna. Nyɨ̀mû kəta yi ghɨna nki wùni, yila kəta kəbi yi ghɨna nki wùni. 40-41Mwə̀ me a mù mò a nyə̂, kəta wu wun hanɨ̂ŋ, me à mù mò a chyə̂, kəta wu wun hanɨ̂ŋ. Mwə̀ me a mù mò a nyə̂ kəta kə yi ghɨna nki jwôfì, me a mù mò a chyə̂ kəta kə yi ghɨna nki jwôfì. Yuchwî kəta jwôf yi wuni, njoŋ kəta yi wuni, njènû boŋa kəta yi ghɨna. Nâbi fùni njênfù kəta kə jwôf yi wuni hanɨ̂ŋ.
42A ni te yi bè hì mô wu yu afa ghɨta lòte a yi kpû. Wun we a ghɨ guma bè fwɨ̂lò, ma we a ghɨ lohe yi kpû bê tè fè fwɨ̀ jə̀. 43À mò wu yu afa ghɨ guma wunu, wu hì jwôfà wi, fê kpene wi nâ a yi gha. Ghɨ lôhì a yi kpû, wu hi jwôfà, fê kəta a jyak. 44Ghɨ shihi gùmà, a hi mô wun wu chyaku, ghɨ lôhè a yi kpû, a hi mô wun wu yòhnà. Wun wu chyaku mô hi chwùtì na wun wu yòhnà boŋa làwû. 45Ghɨ ti nyak a ŋwàklù Fùyèn na, “Adàm wù shyə̂ ndùku mô wut te Yènfù fate, wù hì chyə̂”, Adàm wù gòkhena mô Klistù bên hì mô yohnà ghe a ghɨ nê na ghɨta hi chyə̂. 46À wijə wun wu yohnà we a Yènfù tì fo ashyə̂, à yìti ben wun wu chyaku, wun wu yòhnà kûmtì. 47Wùt ashyə ndùku mô ma wù fwu a chyə̂ ma ghɨ fati nì bûtù, kùmti hì mô, ma wù lo a nyə̂. 48Ghɨt ghe a ghɨ mô a chyə̂ mò kə te wut we a ghɨ tì fate nì bûtù, ghɨt ghe a ghɨ mô a nyə̂ mô hi bè tè mò te wut we a wu tì lo a nyə̂. 49Ghàhnà fune wùt we a ghɨ tì fate nì bûtù chîn, mò hi bè tè boŋa funa wut we a wù tì lo a nyə̂.
50Gha ye a mu jìsà a wana noma mò na, wùt bè yena wijə fə̂n wù Fùyènù nì chyak a wùn ghɨ̂n, shyə ghe a ghɨ fwɨ̂, wi hi khɨte shyə ghɨ fwɨ̂ wi.
51Ghàn yuti, mu fòktè yi gha, wùt khə wi. Ghàhnà bè kpo mihè wijə à jɨ̀m, biyani mô hi bè bùŋhè kwuna kə à jɨ̀m kə wu yu wù mòk. 52Ghɨ bè toŋalò soŋ yi gokheni, ma gha mi yina bûŋtê gan kə ni. Ghɨ be toŋ soŋ yi tɨni, ma ghɨ lohi ghɨta a yi kpû, ma ghɨna hi mô bu hi bè fè kpû. Ghàhnà mò ni, mô hi bè kwunâ, hi tè kəta wun wu fe. 53Yi mô ni beka te wun wu ghàhnà wuna a wu bè kpu ni, ma wu fê fwɨ kəta hi bè kahi a wu wùn, wu bu hi fè fwɨ̀, kpo wi. 54À bè hì mô te wun wu ghàhnà kwune ma wu bê fê bu hi fwɨ̀, ma gha ye a ghɨ nyàka a ŋwàklù Fùyèn kpen. Ghɨ nyak na, “Ghɨ ti tum yə kpu.” 55“Kpû, jyak gha ghe lâ? Fɨ̀l ya ye lâ?” 56Fɨ̀l yi kpu fwo a be, jyak a be fwo a yi Sâk. 57Biyani yòŋnà yênà ha Yènfù a fu ne na ghàhnà tum à yə kpû tohne a Bâba ghàhnà Jisòs Klistù.
58Mu wu hì jîsà ha ghàn a wana noma ghɨ jûŋà na, ghàn fate khɨti bimî yani, kə ghàn hi nêkà. Ghàn hi ghâblè, fêtà ha Bâba kə yû mù jɨ̀m beka ghàn khə na fêt yani ha wûn wi hi bè lə̀hà jə̀ halô.
Currently Selected:
1 Kòlitiyàns 15: bmv
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc.
