1 Kòlitiyàns 11

1Ghàn hi sine chyənà mì kəbi te mu sine yì Klistù.

Hi tè baŋa wu tû wu yu afa ghɨ kokhe Yènfù

2Mu bəmhe ghàn njwo ghàn tà yità jə mu nâ hakoh, fê fate khɨte yikî ye a mu tì yike ghàn, 3biyani khɨŋa na ghàn hi khə na, Klistù mò a tû ha lɨmànà à jɨ̀m, wùt lɨmà mô a tû ha ywê wûn, Yènfù mô a tû ha Klistù. 4Wùt lɨ̂mà ki baŋa a to a wuna a wu yu afa wù jə̀mà makə wu yu afa wù fòktè tum ma yì lo ha Yènfù, wu hi khə na wù wumhe Klistù, a mô wùt we a wù mò a tû ha wûn. 5Ha wùt ywên, ma wù ki chyatî makə wù fòktè tum ma yì lo ha Yènfù teka wù baŋ to a wuna, ma wù hi wumhe lɨm à wûn, a mô wùt we a wù mò a tû ha wûn. Wù hì nê ni, ma hanɨ̂ŋ hi bu ha wun nì wùt ywên we wù kwoma to a wuna.#11.5 Hi kwom a tû: À ndùku mô a mu tuk afû, wùt ywen ni bobhe gha yile, ghɨ kwom a to wuna hi wumhe wûn. 6Wùt ywên shìki bu hi kwut a shyə a wun a tû, ma yi hi jwôfà na wù lahà kwom to atɨna, biyani te à mò yi gha yi wumeni hi kwom a tû, wu kwut a shyə atɨ̂n. 7Ha wùt lɨmà, wù kəta wi hi kwut a shyə a wun a tû beka Yènfù ti ni na wù hi fune wûn, chwùtè ban yi wuni, biyani ha wùt wù ywên, wu chwùtè ban yi lɨm à wuni. 8Ghàn khə na ghɨ tà tì lyi jə bâh à wùna a wùt ywena hi fate wùt lɨmà atɨ̂n, ghɨ tì bɨ̀li lyi bâh à wùna a wùt lɨmà fate wùt ywên nì ghɨna. 9Yi ni mò kəbi yi ghəl te ghɨ tà tì fati jə wùt lɨmà ha wùt ywên, ghɨ tì fati wùt ywên ha wùt lɨmà. 10A ni gha ye a wùt ywên kəta hi tè kwut a shyə a wun a tû a chwena hi chwùtì na wù mò yi sah à sak, kə anjèlsu Fùyènsu hi bâŋhè lâ. 11Nâbi ya, ha ghàhnà ghe a ghɨ bime ha Bâba, wùt ywên wijə a wun a ngɨŋ, a bu kə ghê wùt lɨmà, wùt lɨmà bu ha ngɨŋ, a bu kə ghê wùt ywên. 12Ghɨ tì lyi wun wu wùt lɨmà fati wùt ywên atɨ̂n, wùt ywên boŋa bwə wùt lɨmà, ma à fate Fùyèn mwə̀ mù jɨ̀m.

13Ghàn buf kə nâ a ghàn a sù ngɨŋ nâ, yi mô a jûŋ na wùt ywên hi mô a ghɨta fùtɨ̂n, chyate teka wù baŋ to a wuna agha? 14Ba lum we mbyî mò atɨ̂n chwùtè kə nâ na, à mô yi gha yi wumeni ha wùt lɨmà hi tè kokhe a tû? 15Biyani ha wùt ywên, a mô yi jâl hi te kokhe a tû. Yènfù fo nyuŋsu tusu ha wùt ywên, su dâblè na wù hi baŋa ngɨŋ à wûn atɨ̂n. 16À khɨŋa nâbi nde hi tè gùfnà gha mi yina, a mu jìsà, ghàh fè kəta wi lum wule hi tè fate nè gha mɨ ghɨ̂n atɨ̂n, nâbi ndâ Fùyèn yìlè kəta wi.

Mwə̀ mù yə̂mù mù Bâba

(Mat 26.26-29; Mâk 14.22-25; Lûk 22.14-20)

17Gha ale làwû a mu khɨŋa hi jìs ha ghàn chîn, bəmhe wi ghàn beka ghàn bè yùŋtè nâbi wùni yu hi kokhe Fùyèn, ghàn hi fate nê wi gha, ghàn hi bɨlà bobhi yi bobhî. 18Gha yi shyə ye a mu khɨŋa hi jìs mò na, ghɨta ti fôktì ha mu na ghàn bè yûŋtè a ndâ Fùyèn, ghàn hi kəta jyàhènà a ghàn a fùtɨ̂n, mu bime na gha ale mò atɨ̂n te ghɨ jîsà, ghɨ mô nâ hamok. 19Jyàhènà kəta kə hi tè mò a ghàn a fùtɨ̂n, shyəma ghɨ hi fate yena khɨle ghɨt a Fùyènà. 20Ghàn yùŋtè wu lùk wu tat hì nê ni, a hi bu a tat à Bâba te ghàn bèna hi yə̂. 21Beka ghàn shihi yə̂, ghɨt ale hi kwâktè kə mwə̀ mù yə̂mù ha ngɨŋsu ghɨna su, ghɨ le kpo jiŋ, ghɨt ale nyo mu lûk, mu kwo ghɨna. 22Ghàn kəta wi ndasu hi tè yə atɨ̂n fê nyo ma? Yi mô ni, kəhe ndâ Fùyèn! Ghàn khɨŋa hi tè wumhe ghɨt ghe a ghɨ kəta wi shyə ma? À gan nâ ghə ha ghàn? Ghàn khɨŋa na mu hi bəmhe ghàn a gha mɨ ghɨ̂n ma? Mu wi hi mòm.

23Gha ye a mu tì ywo ha Bâba mò kə yì yin ye a mu yike ghàn. Yi mô na, à ndùku mô ntuksu wu tuk afa a ghɨ nè bəkle Bâba Jisòs, wù lyi a bân, 24fo àyòŋnà ha Yènfù, bəktilò jis na, “Wùna mò wun wu mu, a mu fo kum ghàn. Ghàn hi nê yìna ni, kwâktè mu.” 25À hì mô te ghɨ yə mihe, wu ni kəbi ya nì bòm, jis na, “Bòm yina mò bòm à mù kàn mù fê te ghɨ baŋa nì luŋ mâmù. Ghàn lyi hi nyu nâbi wùnu yu, ghàn hi nyo kwâktè mu.” 26Yi chwûtè na ghàn shìki yə ban ghɨ̂n, nyo bòm yìna nâbi wùni yu, ma à hi mô na ghàn fòktè tum à yì kpû yì Bâba hi tàn shyəma wù bê kahà ben.

27Yi ni mò na, nâbi nde shìki yə ban a Bâba ghɨ̂n fê nyo bòm à Bâba mi yìna wu lum, yi fo wi kokhînì ha Bâba, wu hi khə na wù nè be ha wun wu Bâba nì luŋ mù wûn. 28Nâbi nde kina lê ngɨŋ à wûn laŋ shyəma wù yə ban atɨna ma wù fê nyu bòm àtɨ̂n, 29beka à shìki yə nâbi nde ban mɨ ghɨ̂n fê nyo bòm mi yìna, kwàktè wi shyə ghe a wù yə, wu hi khə na wù toŋa kə ngə̂k a wun a tû. 30A ni mò gha ye a ghɨta yafa a ghàn a fùtɨ̂n dô kə ni, ghɨ le botâ, ma ghɨ le ti kputî. 31Biyani ma ghàhnà ki saka ngɨŋsu ghàhnàsu hamok, Yènfù bê tè fè sak a ghàhnà. 32Bâba shìki saka ghàhnà, ma à hi mô wu lum hi yike ghàhnà shyəma ghɨ bê faŋ hi sak a bobhe ghàhnà nì ghɨt a mbyî amok.

33Yi ni chwùtè a wana noma na, ghàn ben yûŋtì nâbi wùni yu hi yə̂, ghàn yuti nâ ghɨt à jɨ̀m, ghɨ benlò. 34Wùt shìki hì mô jìŋ yafa wûn, wu yə a ndâ shyəma wù ben, bu ya ma ghɨ hi bênà a chìnti, wu hi nê kə na Yènfù sak à bobhi wûn. Mu bè tihe lò kə gha ale ghe a ghàn tì nyàka yâ wu yu afa mu bèna hi yen a ghàn.

Currently Selected:

1 Kòlitiyàns 11: bmv

Highlight

Copy

Compare