1 Мусэ 48

Екъуб и нэфӀ Исуф и къуэхэм зэращыхуар

1Абы и ужькӀэ Исуф къыжраӀащ:

– Уи адэр сымаджэщ.

Исуф здишащ езым и къуитӀыр – Мынасрэ Ефраимрэ, Екъуб деж.

2Екъуб хъыбар ирагъэщӀащ, жраӀащ мыпхуэдэу:

– Уи къуэ Исуф къокӀуэ уи деж.

Израил и къарур зэщӀигъэуӀуэри, къыщызэфӀэтӀысхьащ пӀэм.

3Екъуб Исуф жриӀащ:

– Тхьэуэ псори зыхузэфӀэкӀыр#48:3 Тхьэуэ псори зыхузэфӀэкӀыр – еврейбзэкӀэ Ел Щаддай. сэ Луз деж, Ханаан щӀыналъэм, къыщысхуэлъагъуэри, и нэфӀ къысщигъэхуащ. 4КъызжиӀащ абы: «Сэ узгъэбэгъуэнущ уэ, ухэзгъэхъуэнущ уэ, икӀи къыптезгъэхъукӀынущ уэ лъэпкъ куэдыр, естынущ мы щӀыналъэр уэ къыптехъукӀыну цӀыхухэм, игъащӀэкӀэ я унейуэ яӀэну».

5– Иджы, сэ Мысырым сыкъэмыкӀуэ щӀыкӀэ, Мысыр щӀыналъэм къыщыпхуэхъуа уи къуитӀри сысейщ. Ефраимрэ Мынасэрэ сысейуэ щытынущ, Рубэнрэ Симеонрэ сысейуэ зэрыщытым хуэдэу. 6Ауэ быну абыхэм я ужькӀэ уэ къыпхуэхъунур ууей хъунущ. Абыхэм езыхэм я къуэшхэм я цӀэхэмкӀэ къеджэнущ, абыхэм я мылъкуу къэкӀуэнумкӀэ я Ӏыхьэ хэлъу.

7– Сэ Паддам сыкъикӀауэ сыкъыщыкӀуэм, си нэщхъеягъуэкӀэ, си Рахэл щылӀащ Ханаан щӀыналъэм, гъуэгум дытету, Ефрат дынэсыным куэд къэмынэжауэ. Сэ щыщӀэслъхьэжащ ар иджы БэтлэхьэмкӀэ зэджэ Ефрат хуэкӀуэ гъуэгум деж.

8Израил, Исуф и къуэхэр къыщилъагъум, жиӀащ:

– Хэт мыхэр?

9– Ахэр си къуэхэрщ, Тхьэм мыбдежым къыщызитахэрщ, – жриӀащ Исуф и адэм.

– Къызбгъэдэшэ ахэри, – жиӀащ Екъуб, – си нэфӀ абыхэм ящызгъэхуэнущ.

10Израил набгъэ хъуат жьыгъэм къыхэкӀыу; илъагъуртэкъым абы ӀупщӀу. Исуф бгъэдишащ ахэр абы, икӀи абы ба къахуищӀащ абыхэм, ӀэплӀэ къаришэкӀащ абыхэм. 11ИтӀанэ Израил Исуф жриӀащ:

– Сыгугъэртэкъым сэ услъагъужыну; ауэ Тхьэм сигъэлъэгъуащ уи сабийхэри.

12Исуф и адэ и лъэгуажьэхэм къатрихыжри, щхьэщэ хуищӀащ, щӀым нэсу зигъэщхъри. 13Иубыдащ Исуф а тӀури, и Ӏэ ижьымкӀэ Ефраим иубыдащ, Израил и Ӏэ сэмэгум хуэзэу, Мынасэ иубыдащ и Ӏэ сэмэгумкӀэ, ар Израил и Ӏэ ижьым хуэзэу, икӀи бгъэдишащ ахэр абы. 14Ауэ Израил и Ӏэ ижьыр ишийри трилъхьащ Ефраим и щхьэм, ар нэхъыщӀэу щытми, Ӏэ сэмэгур – ӀитӀыр зэблэдзауэ, Мынасэ и щхьэм. Трилъхьащ Екъуб и Ӏэхэр апхуэдэу, Мынасэ нэхъыжьу щытми.

15АдэкӀэ и нэфӀ Исуф къыщигъэхуащ Израил, мыр жиӀэри:

– Си адэхэу Ибрэхьимрэ Исхьэкърэ

зи пащхьэ щыпсэугъа Тхьэм,

дунейм сызэрытетрэ –

нобэр къыздэсым

зи нэӀэ къыстет Тхьэм,

16сыт хуэдэ мыгъуагъэми

сыкъыӀэщӀэзых мелыӀычым

и нэфӀ къащрехуэ мы сабийхэм;

мы сабийхэм я хьэтыркӀэ

цӀыхухэм ягу кърекӀыж

сэ си цӀэмрэ си адэхэу Ибрэхьимрэ

Исхьэкърэ я цӀэхэмрэ;

мы щӀылъэм щребагъуэ ахэр,

щрехъу куэд дыдэ.

17Исуф и адэм и Ӏэ ижьыр Ефраим и щхьэм зэрытрилъхьар щилъагъум, и жагъуэ хъуащ ар. Арати, иубыдащ и адэм и Ӏэр, Ефраим и щхьэм къытрихыжу Мынасэ и щхьэм трилъхьэну.

18ЖриӀащ Исуф и адэм:

– Апхуэдэукъым, си адэ; мыращ щыпэлъхур; телъхьэ абы и щхьэм уи Ӏэ ижьыр.

19Ауэ абы и адэм ар имыдэу жиӀащ:

– СощӀэ, си къуэ, сощӀэ. Абы къытехъукӀынущ лъэпкъ, ар хъунущ лъэпкъ ин дыдэ; ауэ абы и къуэш нэхъыщӀэр хъунущ абы нэхърэ нэхъ ин, абы лъэпкъыу къытехъукӀынури лъэпкъ бжыгъэншэщ.

20ИкӀи абыхэм и нэфӀ ящигъэхуащ а махуэм, мыр жиӀэурэ:

– Фэ фи цӀэкӀэ израил цӀыхухэр Тхьэм и нэфӀкӀэ елъэӀунущ. Зым и нэфӀ адрейм щигъэхуэурэ, абыхэм жаӀэнущ: «Ефраимрэ Мынасэрэ Тхьэм и нэфӀ зэращигъэхуам хуэдэу, и нэфӀ къыпщрегъэхуэ».

Арати, игъэуващ Ефраим Мынасэ нэхърэ нэхъ лъагэу.

21АдэкӀэ жриӀащ Израил Исуф:

– Сэ солӀэ. Тхьэр фи гъусэнущ фэ, икӀи фигъэгъэзэжынущ фи адэхэм я щӀыналъэм. 22Сэ узот уэ, уи къуэшхэм я пащхьэм щынэхъыбэу, Щэхэм – Ӏуащхьэ егъэзыхыгъуэр, си джатэрэ си шабзэкӀэ амор цӀыхухэм къаӀэщӀэсхыгъар.

Currently Selected:

1 Мусэ 48: KbdNTGP2017

Highlight

Copy

Compare