1 Мусэ 32

1Екъуб ежьащ езым и гъуэгукӀэ. Къыпежьащ абы Тхьэм и мелыӀычхэр. 2Екъуб ахэр щилъагъум, жиӀащ:

– Ар Тхьэм и уафэдзэм и увыӀэпӀэщ.

ИкӀи фӀищащ а щӀыпӀэм цӀэ: Маханаим#32:2 Маханаим – пасэрей журтыбзэкӀэ абы къикӀыр: увыӀэпӀитӀ..

Екъуб тыгъэхэр Эсау къызэрыхуигъэхьар

3Екъуб езым япэ иту хуигъэкӀуащ и къуэш Эсау хъыбарегъащӀэхэр Эдом хэкум щыӀэ Сеир щӀыналъэм. 4Унафэ яхуищӀащ абыхэм, мыр жиӀэри:

– Мыпхуэдэу жефӀэ си зиусхьэн Эсау: мыращ жиӀэр уи унэӀут Екъуб: сэ сыщыпсэуащ Лабан деж, сыщыпсэуащ иджыри къэс; 5СиӀэщ сэ выхэри, шыдхэри, Ӏэщ цӀыкӀуи, унэӀут цӀыхухъухэри, унэӀут бзылъхугъэхэри; икӀи сэ нэзгъэкӀуащ си зиусхьэным деж си хъыбар уэзгъэщӀэну, нэфӀкӀэ укъызэплъын папщӀэ.

6ХъыбарегъащӀэхэм Екъуб деж къагъэзэжри, жаӀащ:

– Дэ дыкӀуащ уи къуэш Эсау деж; ар къытпежьауэ къокӀуэ, цӀыху щиплӀ щӀыгъуу.

7Екъуб икъукӀэ къэшынащ, къэгузэващ, икӀи игуэшащ гупитӀу езым и гъусэ цӀыхухэри, Ӏэщ цӀыкӀури инри, махъшэхэри.

8«Эсау зы гупым теуэмэ икӀи ар зэхикъутэмэ, адрей гупым къелын хузэфӀэкӀынщ», жиӀащ абы.

9ИтӀанэ елъэӀуащ Екъуб:

– Си адэ Ибрэхьими си адэ Исхьэкъи я Тхьэ, Зиусхьэну сэ: «Гъэзэж уи щӀыналъэм, уи Ӏыхьлыхэм деж, Сэ фӀыгъуэ пхуэсщӀэнущ уэ» жиӀэу къызжезыӀа! 10Сахуэфащэкъым сэ зэкӀэ фӀыгъуэрэ пэжыгъэрэ пщӀэуэ Уэ сэ, Уи ӀурыщӀэм, къысхуэпщӀахэм; сыт щхьэкӀэ жыпӀэмэ сэ си башыр сӀыгъыу сызэпрыкӀащ мы Иордан псым; атӀэми иджы сэ гупитӀ мылъку яӀэу си гъусэщ. 11СынолъэӀу, сыӀэщӀэх сэ си къуэшым и Ӏэм, Эсау и Ӏэм; сыт щхьэкӀэ жыпӀэмэ сэ сыщошынэ абы, ар къакӀуэу сэри, анэри, сабийхэри псори диукӀынкӀэ. 12Уэракъэ къызжезыӀар: «Сэ фӀыгъуэ пхуэсщӀэнущ, сщӀынущ уэ къыптехъукӀыну бынхэр куэд, пхуэмыбжу хы пшахъуэм хуэдиз».

13А жэщыр а щӀыпӀэм щрихащ Екъуб. ИтӀанэ къищтащ езым иӀэм щыщу и къуэш Эсау папщӀэ тыгъэу: 14Бжэн щитӀ, ажэ тӀощӀ, мэл щитӀ, тӀы тӀощӀ; 15къэпш хъууэ махъшэбз щэщӀ, я махъшэ шыщӀэхэр я гъусэу, жэм плӀыщӀ, выуэ пщӀы, шыдыбз тӀощӀ, шыдыхъуу пщӀы. 16ЯӀэщӀилъхьэщ езым и унэӀутхэм сыт хуэдэ хъушэри, щхьэхуэуи яжриӀащ и унэӀутхэм:

– Сяпэ фиту фыкӀуи, щывгъэт хъушэхэр зыр адрейм пэжыжьэу.

17ИкӀи унафэ хуищӀащ япэрейм, мыр жиӀэри:

– Си къуэш Эсау къыпхуэзэрэ «Уэ хэт урей? Дэни укӀуэрэ? Хэт и хъушэ уяпэ итри?» жиӀэу, къоупщӀмэ, 18жеӀэ: «Уи унэӀут Екъуб; мыр абы си зиусхьэн Эсау къыхуищӀа тыгъэщ; езы Екъуб ди ужь итщ».

19Ар дыдэр унафэу хуищӀащ етӀуанэми, ещанэми, хъушэхэм я ужьым иту кӀуэ псоми, «Апхуэдэу жефӀэ Эсау, фыхуэзэмэ», жиӀэурэ; 20АдэкӀи жыфӀэ: «Уи унэӀут Екъуб ди ужь итщ». Сыт щхьэкӀэ жыпӀэмэ абы езым игукӀэ жиӀащ: «и нэфӀ къызыщызгъэхуэнщ ар сяпэм иту кӀуэ тыгъэхэмкӀи, дызыхуэзмэ фӀыуэ къыспежьэнкӀэ мэхъу итӀанэ».

21Арати, кӀуащ тыгъэхэр абы я пэ иту; езым а жэщыр щигъэкӀуащ увыӀэпӀэм.

Екъуб Тхьэм зэребэнар

22А жэщым къэтэджри, и фызитӀри, и унэӀут бзылъхугъитӀри, и къуэ пщыкӀузри къыздищтэри, зэпрыкӀащ Ябок и чэнжыпӀэмкӀэ. 23Ахэр зэпришащ псым, зэпришащ езым иӀа псори. 24Къэнащ Екъуб и закъуэу.

ИкӀи къебэнащ абы Зыгуэр, нэхущ пшэплъыр къищӀыху. 25КъызэрытемыкӀуэфыр къыщилъагъум, къеӀусэщ абы и куэ къупщхьэ зэрытыпӀэм, зэрыгъэпкӀащ Екъуб и куэ къупщхьэ зэрытыпӀэр, Ар абы къыщебэным.

26– СутӀыпщ сэ, пшэплъ къищӀащ, – жиӀащ адрейм.

– УзутӀыпщынукъым, Уэ уи нэфӀ къысщымыхуауэ, – жиӀащ Екъуб.

27– Сыт уи цӀэр? – жиӀащ адрейм.

– Екъуб, – жиӀащ абы.

28– Иджы щыщӀэдзауэ уи цӀэу щытынур Екъубкъым, атӀэ Израилщ#32:28 Израил пасэрей журтыбзэкӀэ абы къикӀыр: Тхьэм йобэн е Тхьэр мэбанэ., – жиӀащ адрейм, – сыт щхьэкӀэ жыпӀэмэ уэ уебэнащ Тхьэми цӀыхухэми, къару уиӀэу къэбгъэлъэгъуащ.

29ЩӀэупщӀащ Екъуб, мыр жиӀэурэ:

– КъызжеӀэ уи цӀэр.

– Сыт уэ си цӀэм ущӀыщӀэупщӀэр? – жиӀащ абы.

ИкӀи и нэфӀ къыщыщыхуащ абы абдежым.

30Екъуб фӀищащ а щӀыпӀэм цӀэуэ Пэниел#32:30 Пэниел – пасэрей журтыбзэкӀэ абы къикӀыр: Тхьэм и нэгу. Пэниел итӀанэ Пэнуел цӀэуэ фӀищащ., сыт щхьэкӀэ жыпӀэмэ, жиӀащ абы, «Сэ слъэгъуащ Тхьэр, ди нэгу зэхуэгъэзауэ, итӀани псэууэ къелащ си псэр». 31КъыщӀэкӀащ дыгъэр, ар Пэнуел щыпхрыкӀым; ещӀэкъуауэрт ар, и куэ къупщхьэ зэрытыпӀэр зэрыпкӀати.

32Абы папщӀэ иджыри къэс израил цӀыхухэм яшхыркъым куэ къупщхьэ зэрытыпӀэм телъ хуэр, сыт щхьэкӀэ жыпӀэмэ Къебэныгъар къеӀусащ Екъуб и куэ къупщхьэ зэрытыпӀэм телъ хуэм.

Currently Selected:

1 Мусэ 32: KbdNTGP2017

Highlight

Copy

Compare