1 Мусэ 27

Исхьэкъ и нэфӀ Екъуб къызэрыщыхуар

1Исхьэкъ жьы икӀи набгъэ щыхъум, и къуэ нэхъыжь Эсау къриджэри, жриӀащ абы:

– Си къуэ!

– Сымис сэ, – жиӀащ адрейм.

2– Мис, сэ жьы сыхъуащ, – жиӀащ Исхьэкъ. – СыщылӀэну махуэр сщӀэркъым. 3Къащтэ иджы уи Ӏэщэхэр, уи шабзалъэри уи шабзэри, губгъуэм кӀуэи, къысхуэщэкӀу губгъуэ псэущхьэ. 4Шхыныгъуэу сэ фӀыуэ слъагъур схуэгъэхьэзыри, къысхуэхь сшхыну, сылӀэн и пэ си нэфӀ къыпщызгъэхуэн папщӀэ.

5Ребеккэ зэхихащ Исхьэкъ езым и къуэ Эсау жриӀар. Арати, псэущхьэ къищэкӀуу къихьыну Эсау губгъуэм щыкӀуэм, 6Ребеккэ жриӀащ и къуэ Екъуб:

– Сэ зэхэсхащ уи адэм уи къуэш Эсау мыпхуэдэу зэрыжриӀар: 7«Къысхуэхь губгъуэ псэущхьи, схуэгъэхьэзыр шхыныгъуэ, сэ сышхэнщ, Зиусхьэным и пащхьэ и нэфӀ къыщыпщызгъэхуэн щхьэкӀэ». 8Иджы, си къуэ, къедаӀуэ си псалъэхэу сэ унафэ зэрыпхуэсщӀхэм. 9Ӏэхъушэм кӀуэи, къысхуэхь хэплъыхьауэ чыцӀ цӀыкӀуитӀ; хуэспщэфӀынщ уи адэм фӀыуэ илъагъу шхыныгъуэр; 10Уи адэм ар хуэпхьынщи, ишхынщ, езыр лӀэн и пэкӀэ и нэфӀ къыпщигъэхуэн папщӀэ.

11АрщхьэкӀэ Екъуб жриӀащ Ребеккэ, и анэм:

– Эсау, си къуэшыр, цӀыху цыбэщ, ауэ сэ сыджафэщ. 12КъыстеӀэбэнкӀэ хъунущ си адэр; итӀанэ сыщыхъунущ абы и пащхьэм пцӀыупс, сэ къыслъысынури нэлатщ, и нэфӀ къысщыхуэнукъым.

13– Сэ къыслърес уэ уи нэлатыр, си къуэ, – къыжриӀащ и анэм абы, – ауэ къедаӀуэ си псалъэм, кӀуэи, къысхуэхь.

14Екъуб кӀуэщ, чыцӀхэр къищтэри къыхуихьащ и анэм; абы и анэм ищӀащ абы и адэм фӀыуэ илъагъу шхыныгъуэр. 15ИтӀанэ Ребеккэ и къуэ нэхъыжь Эсау и щыгъын дэгъуэу и унэм щӀэлъыр къыщтэри щитӀэгъащ ар и къуэ нэхъыщӀэ Екъуб. 16Ауэ абы и Ӏэхэми и пщэ пцӀанэми къришэкӀащ чыцӀ цӀыкӀухэм я фэр. 17ИкӀи ӀэщӀилъхьащ и къуэ Екъуб езым игъэхьэзыра шхыныгъуэмрэ щӀакхъуэмрэ.

18Ар и адэм деж щӀыхьэри, жиӀащ:

– Си адэ!

– Сымис сэ; уэ ухэт, си къуэ? – жиӀащ адрейм.

19– Сэ сы-Эсаущ, уи щыпэлъхурщ, – жриӀащ Екъуб и адэм, – сэ сщӀащ уэ зэрыжыпӀауэ; зыкъэӀэт, къэтӀыс, къызэфӀэтӀысхьи, шхы си губгъуэ псэущхьэр, уи нэфӀ къысщыбгъэхуэн папщӀэ.

20– Сыту псынщӀэу ар къэбгъуэта, си къуэ! – еупщӀащ Исхьэкъ и къуэм.

– Зиусхьэну уи Тхьэм къыспригъэжьати, аращ, – жиӀащ абы.

21– Къызбгъэдыхьэ, сэ сыноӀэбынщ, си къуэ, Эсаур уэрауэ пӀэрэ хьэмэрэ уэрмырарэ? – жриӀащ Исхьэкъ Екъуб.

22Екъуб бгъэдыхьащ Исхьэкъ, и адэм; ар къытеӀэбащ абы, икӀи жиӀащ:

– Макъыр Екъуб ейщ, ауэ Ӏэхэр Эсау ейщ.

23КъицӀыхужакъым ар, сыт щхьэкӀэ жыпӀэмэ абы и Ӏэхэр яхуэдэт и къуэш Эсау и Ӏэхэм, цыбэу; арати, и нэфӀ къыщигъэхуэну хэтащ.

24– Уэра си къуэ Эсаур? – аргуэру еупщӀащ ар.

– Сэращ, – жэуап итащ абы.

25– Къызэт, сэ сшхынщ губгъуэ псэущхьэм щыщ, си нэфӀ къыпщыхуэн папщӀэ, – жиӀащ Исхьэкъ

Екъуб иритри, ар шхащ; къыхуихьащ абы сани, абыи ефащ. 26ИтӀанэ Исхьэкъ, абы и адэм, къыжриӀащ:

– Къызбгъэдыхьэ, ба къысхуэщӀ, си къуэ.

27Екъуб бгъэдыхьэри, и адэм ба хуищӀащ. Абдеж Исхьэкъ къыщӀихьащ абы и щыгъыным и мэр, икӀи и нэфӀ щигъэхуащ абы, мыр жиӀэурэ:

– Мис си къуэм и мэр,

Зиусхьэным и нэфӀ зыщыхуа

губгъуэм и мэм хуэдэр.

28Кърыует Тхьэм уэ

уэсэпсым къыхэкӀри щӀы пшэрым къыхэкӀри,

гъавэ куэди санэ куэди.

29Къыпхурелажьэ цӀыху лъэпкъхэр,

зыкъыпхурагъэщхъ цӀыху лъэпкъ цӀыкӀухэм;

яхуэхъу зиусхьэн уи Ӏыхьлыхэм,

зыкъыпхурагъэщхъ уи анэм и къуэхэми;

уэ нэлат къозыххэм нэлат ялърес;

уэ зи нэфӀ къыпщызыгъахуэхэм Тхьэм и нэфӀ къащрехуэ.

Исхьэкъ и нэфӀ Эсау къызэрыщыхуар

30Исхьэкъ и нэфӀ Екъуб щыхуэри, Екъуб и адэ Исхьэкъ и пащхьэ къикӀыжа къудейуэ, Эсау, абы и къуэшыр, къикӀыжащ щакӀуэ. 31Игъэхьэзыращ абыи шхыныгъуэр, и адэм хуихьри жриӀащ:

– Къэтэджи, си адэ, шхы уи къуэм и губгъуэ псэущхьэр, уи нэфӀ сэ къысщыбгъэхуэн папщӀэ.

32– Уэ ухэт? – къыжриӀащ Исхьэкъ, абы и адэм.

– Сэ сыуикъуэщ, уи щыпэлъху Эсаущ, – жиӀащ абы.

33Абдеж Исхьэкъ хуабжьу къэщтауэ къэкӀэзызри, жиӀащ:

– Хэт атӀэ адрейр, губгъуэ псэущхьэ къэзыщэкӀуу къысхуэзыхьар? Уэ укъэкӀуэжын и пэ а псом щыщи сшхыуэ си нэфӀи щызгъэхуащ абы. Аращ иджы си нэфӀыр зылъысынур.

34Эсау и адэм и псалъэхэм щӀэдэӀури, игу хуабжьу хэщӀауэ, макъышхуэкӀэ и адэм жриӀащ:

– Си адэ! Уи нэфӀ къысщыгъахуэ сэри.

35Ауэ Исхьэкъ жиӀащ:

– Уи къуэшыр къакӀуэри си нэфӀ хьилагъэкӀэ зыщигъэхуащ.

36ЖиӀащ итӀанэ мыдрейм:

– Техуэркъэ абы Екъуб цӀэ зэриӀэр – тӀэунейрэ сыкъигъэпцӀащ: си щыпэлъхугъэр ищтащ абы иджы, зылъигъэсащ уи нэфӀыр.

АдэкӀи жиӀащ:

– АтӀэ сэ къысхуумыгъэнэххауэ ара уи нэфӀ?

37Исхьэкъ жэуап къритащ Эсау:

– Сэ пхуэзгъэуващ ар зиусхьэну уэ, зэкӀэ абы и Ӏыхьлыхэри хуэсщӀащ унэӀут; сетащ гъавэкӀи фадэкӀи; атӀэ сыт уэ пхуэсщӀэжынур, си къуэ?

38– Дауэ хъун, си адэ, – жриӀащ Эсау и адэм, – уэ зы нэфӀ щыхуэныгъэ закъуэ фӀэкӀа уимыӀэу? Уи нэфӀ къыслъыгъэс сэри, си адэ!

ИкӀи зригъэӀэтащ Эсау и макъым, къэгъащ ар. 39Абдеж жэуап къитащ Исхьэкъ, абы и адэм, мыпхуэдэу къыжриӀэри:

– ЩӀым и пшэрми уафэм къех уэсэпсми

пэжыжьэу щыӀэнущ уи псэупӀэр.

40Упсэунущ уэ уи джатэмкӀэ,

ухуэлэжьэнущ уи къуэшым;

щыӀэнущ зэмани, абы упэщӀэувэу

и тепщэныгъэр уи пщэм щыдэбдзын.

Эсау ӀэщӀэкӀыу Екъуб зэрыщӀэпхъуэжар

41Эсау илъагъу мыхъу хъуащ Екъуб, абы и адэм и нэфӀыр зэрызыщигъэхуам папщӀэ; жиӀащ Эсау игукӀэ: «Къоблагъэ ди адэм папщӀэ дыщыщыгъуэн махуэр; абы щыгъуэ сэ сыукӀынущ си къуэш Екъуб».

42ЖраӀэжащ Ребеккэ и къуэ нэхъыжь Эсау и псалъэхэр; Арати, Ребеккэ игъакӀуэри къригъэшащ и къуэ нэхъыщӀэ Екъуб, жриӀащ абы:

– Уи къуэш Эсау уиукӀыну мэдалъэ. 43Аращи, си къуэ, иджы къыщӀэдэӀу си псалъэхэм: зыӀэти, щӀэпхъуэж Харан хэкум щыпсэу си дэлъху Лабан деж. 44Щыпсэу абы и деж зэман гуэркӀэ, уи къуэшым и губжьыр ужьыхыжыху, 45уи къуэшым къыпхуиӀэ губжьыр ужьыхыжу абы епщӀар щыгъупщэжыху. Абдежым сэ нэзгъэкӀуэнщи, укъисшыжынщ абы. Сытым щхьэкӀэ фысфӀэкӀуэдын хуей фэ тӀури зы махуэм?

46ЖриӀащ Ребеккэ Исхьэкъ итӀанэ:

– Хет бзылъхугъэхэм щхьэкӀэ си гъащӀэри сфӀэӀэфӀыжкъым; мы щӀыналъэм щыщ бзылъхугъэхэу мы хет бзылъхугъэхэм яхуэдэхэм ящыщ Екъуб фызу къишэмэ, сыт сэ гъащӀэми сызэрыхуеижыр?

Currently Selected:

1 Мусэ 27: KbdNTGP2017

Highlight

Copy

Compare