1 Мусэ 20

Ибрэхьим Абимэлэх деж

1Ибрэхьим абдеж зыщиӀэтщ, Нэгэв лъэныкъуэкӀэ кӀуэри Кадешрэ Шуррэ я зэхуакум деж щытӀысащ; абы и ужькӀэ Гъэрар дэтӀысхьащ. 2Ибрэхьим жиӀащ езым и фыз Сарэ щхьэкӀэ: «Ар си шыпхъущ». Арати, Гъэрар и пащтыхь Абимэлэх игъакӀуэри къригъэщащ Сарэ. 3Тхьэр Абимэлэх жэщым, пщӀыхьым хэту, къыхуэлъагъуэри къыжриӀащ абы:

– УлӀэнущ уэ къэпщта бзылъхугъэм щхьэкӀэ; сыту жыпӀэмэ абы лӀы иӀэщ.

4Ауэ Абимэлэх абы еӀэбатэкъыми, жиӀащ:

– Зиусхьэн! Дауэ бгъэкӀуэдын Уэ лъэпкъ хейр? 5Мы лӀыр аракъэ къызжезыӀар: «Ар си шыпхъущ» жиӀэу? Езы бзылъхугъэми къызжиӀакъэ: «Ар си дэлъхущ» жиӀэри? Сэ ар зэрысщӀар сигу хьэрэмыгъэншэмрэ си Ӏэ къабзэхэмрэкӀэщ.

6Абдеж къыжриӀащ Тхьэм абы, пщӀыхьым хэту:

– Сэри сощӀэ ар уи гум и хьэрэмыгъэншагъэкӀэ зэрыпщӀар, икӀи ущысхъумащ Си дежькӀэ гуэныхь щыблэжьыным; абы къыхэкӀыуи абы уезгъэӀусакъым. 7АтӀэ иджы етыж фызыр лӀым: сыт щхьэкӀэ жыпӀэмэ ар бегъымбарщ, Тхьэм пхуелъэӀунурэ, уэри упсэунущ; ауэ иумытыжмэ, зэгъащӀэ Ӏэмал имыӀэу уэри ууей псори фызэрылӀэнур.

8Абимэлэх пщэдджыжьым жьыуэ къэтэджри къриджащ и унэӀут псори, икӀи яхуиӀуэтэжащ а псалъэ псори абыхэм я тхьэкӀумэкӀэ зэхахыу; а цӀыхухэри икъукӀэ къэшынащ. 9АдэкӀэ Абимэлэх Ибрэхьим къриджэри, жриӀащ абы:

– Сыт уэ къыдэпщӀар? УэркӀэ сыт гуэныхьу злэжьар, сэри си пащтыхьыгъуэми гуэныхь ин дыдэр къытщхьэщыбгъэхьэн хуэдэу? Уэ сэ къызэпщӀащ ящӀэ мыхабзэ Ӏуэхухэр. 10Сыт уэ узэгупсысар а Ӏуэхур щыблэжьым щыгъуэ?

11– Сэ сегупсысащ: щыӀэкъым мы щӀыпӀэм Тхьэм фӀэлӀыкӀ, сэри саукӀынщ си фызым щхьэкӀэ, – жиӀащ Ибрэхьим. 12– Пэж дыдэуи, ар си шыпхъущ; ар си адэм ипхъущ, ауэ си анэм ипхъукъым; сэ си фызи хъуащ. 13Си адэм и унэм сыкъыщӀишу Тхьэм сыщришэжьам щыгъуэ сэ абы жесӀащ: «МыбыкӀэ си хьэтыр къэлъагъуи, сыт хуэдэ щӀыпӀэ дыкӀуэми, дэнэ дежи щыжыӀэ сэр щхьэкӀэ: „Мыр си дэлъхущ“ жыӀи».

14Абимэлэх Ӏэщ ини цӀыкӀуи, унэӀут цӀыхухъуи цӀыхъубзи иритащ Ибрэхьим; иритыжащ абы и фыз Сари. 15ЖиӀащ адэкӀэ Абимэлэх:

– Си щӀыналъэр илъщ уи пащхьэм; щыпсэу уэ здыпфӀэфӀым деж.

16Сарэ жриӀащ:

– Сэ естащ уи дэлъхум дыжьыну ахъшэ мин; уи гъусэ псоми я пащхьэм лажьэ зэрыщыуимыӀэм и щыхьэтщ ар, псом я пащхьэми уэ ущыхейщ.

17Абдеж Ибрэхьим Тхьэм елъэӀури Тхьэм игъэхъужащ Абимэлэх, абы и фызри, абы и унэӀут цӀыхубзхэри, лъхуэни щӀадзэжащ абыхэм. 18Сыт щхьэкӀэ жыпӀэмэ Зиусхьэным Абимэлэх и унэм щӀэс цӀыхубз псори сабий ямыгъуэтыну ищӀыгъат Ибрэхьим и фыз Сарэ щхьэкӀэ.

Currently Selected:

1 Мусэ 20: KbdNTGP2017

Highlight

Copy

Compare