2 Кор. 10
10
10-НЭ ЕДЗЫГЪУЭ
Паул апостол тепщэныгъэу иӀэр
1ЗэрыжыфӀэмкӀэ сэ, Паул, фи пащхьэм сит щыхъукӀэ, сошынэ, ауэ сыфпэжыжьэ щыхъукӀэ, согушхуэ – сэ Мэссихь и гущабагъэрэ и ӀэсагъэкӀэ сыныволъэӀу. 2Мы дунейм и цӀыхухэм яхуэдэу фыщыт, жаӀэурэ дызыгъэкъуаншэ цӀыхухэм фи деж сыныщыкӀуэкӀэ гушхуэныгъэ схэлъу садэгъуэгурыкӀуэну си гум зэрилъым хуэдэу, фэри гушхуэныгъэ хэлъу сыщӀывдэгъуэгурыкӀуэн щыщӀагъэ щывмыгъэӀэну сыныволъэӀу. 3Сыт щхьэкӀэ жыпӀэмэ мы дунейм дытет пэтми, мы дунейм и цӀыхухэм я гум илъыр ди гум илъу дызауэркъым. 4Ӏэщэу дызэрызауэр мы дунейм и Ӏэщэкъым, бзаджагъэм и быдапӀэхэр зэхакъутэну Тхьэм къыбгъэдэкӀ къару яхэлъщ а Ӏэщэхэм. Гупсысэ пхэнжхэри, 5цӀыхухэм Тхьэр зэращӀэным пэувыну зыкъэзыӀэт пагэныгъэ псори догъэкӀуэд, сыт хуэдэ гуращэри Мэссихь хуэӀурыщӀэну доубыд. 6Фэ фи дэӀуэныгъэр нэсауэ зэрыхъуу, хэт мыдаӀуэми, хуэфащэр едгъэпшыныжыну дыхьэзырщ.
7Фи нэм иубыдыращ флъагъу къудейр. Фэ фщыщ гуэрым и псэм Мэссихь щыщу и фӀэщ хъумэ, апхуэдабзэу дэри ди псэм Мэссихь зэрыщыщым ирегупсыс. 8ФызмыгъэкӀуэдыну, ауэ гурэ псэкӀэ нэхъ лъэкӀыныгъэ фэзгъэгъуэтыну Зиусхьэным къызита тепщэныгъэм теухуауэ куэдыщэкӀэ сызыщытхъужу щӀэздзами, сукӀытэжыркъым. 9Си тхылъхэмкӀэ фызэрызгъэшынэным сыхэт хуэдэу къыфщыхъуну сыхуейкъым. 10Сыт щхьэкӀэ жыпӀэмэ зыгуэрым мыпхуэдэу къыжеӀэ: «И тхылъхэмкӀэ пхъашэщ икӀи лъэщщ, ауэ езыр лъэкӀыныгъэ зимыӀэщ, къыжиӀэхэми пщӀэ хуащӀыркъым». 11Апхуэдэу къыжызыӀэм мыр ирещӀэ: Фи деж дыщымыӀэу ди тхылъхэмкӀэ къыжытӀэр фи деж дыщыщыӀэкӀэ дгъэзэщӀэнущ.
12Зи щхьэм щытхъужхэм запытщӀыжыну е захуэдгъэдэну дытегушхуэркъым. Зым адрейм зригъэпщэнри, зыхуигъэдэнри губзыгъагъэкъым. 13Гъунэ имыӀэу дызыщытхъужыну дыхуейкъым, Тхьэм къытхуигъэува Ӏуэхум и гъунапкъэхэми дыфӀэкӀынукъым. А Ӏуэхум и гъунапкъэхэм фэ фитщ. 14Дэ диӀэ гъунапкъэхэм дыфӀэкӀыркъым, фи деж дынэмыкӀуэгъами ярейуэ. Мэссихь теухуа хъыбарыфӀыр къыфлъэзыгъэӀэсыну фи деж япэу нэкӀуар дэращ. 15Тхьэм къытхуигъэува Ӏуэхум и гъунапкъэхэм я щӀыбкӀэ адрей цӀыхухэм ялэжьа ӀуэхумкӀэ дызыщытхъужыркъым, ауэ фи фӀэщхъуныгъэр нэхъ быдэ хъууэ, фи деж щыдлэжьа Ӏуэхум зызэриубгъуным дыщогугъ, Тхьэм къытхуигъэува гъунапкъэхэм елъытауэ. 16Аращи, нэгъуэщӀ цӀыхум иӀэ гъунапкъэхэм щилэжьа ӀуэхумкӀэ дызыщымытхъужу, фи щӀыбкӀэ щыӀэ хэкухэми хъыбарыфӀыр цӀыхухэм щалъэдгъэӀэсынущ. 17Ауэ зым зыр щытхъужмэ, Зиусхьэнымрэ абы илэжьамрэ щретхъу. 18Сыт щхьэкӀэ жыпӀэмэ зи щхьэм щытхъужыракъым Зиусхьэным ищтэр, атӀэ езы Зиусхьэныр зыщытхъуращ.
Currently Selected:
2 Кор. 10: KbdNTGP2017
Highlight
Copy
Compare
Share
Want to have your highlights saved across all your devices? Sign up or sign in
© Библиер зэдзэкӀыным елжь Институт, 1993, 2007, 2011, 2017
