Лука 15
15
15 къаьм
ЛъикӀлъилас лъана хабар
1Исахъа энекзи бахъал мокъос зукъойо гьаькъ бокӀолцаса сукӀобана мунагь-гьаькъ гаьгьийа̄ баддо̄л тели аьдамлана. 2Фарисейла̄на диниябла аьлимла̄на Исакьа мордабана нисос зукъойо:
– Вагьди сукӀо мунагьла̄д бовацӀийа аьдамла̄гъой гьудуллъина йогьна гьоллогъой эᵸш-хулӀос, – лӀо нисона.
1. Боъийа бикькьас хабар
3Иса вагьаддийо хабар ме̄йо гьоллол:
4– ГьоᵸсчӀитӀ боцӀилаъас гьоᵸс боълъо, аьчӀенайигна аьчӀена боцӀина гаьлълъа̄чо авлахълиъна бечаннегьна, боъийо бикь мизал эᵸкьаъцас сукӀо гейди мизоъ эᵸдо? 5Бикь михъона муьгъатта̄, разина ахъна гилакьа гунна бежеш гьолцо гьоло билӀогъа. 6Бета билӀогъа оᵸкъона муьгъатта̄, гьалмагълана мадугьаллана ийалӀена гьоллохъа нисос: «Диела рохеллиъ мижена аькал ба̄хъ, дие боъийо бикь зогъна гей». 7Вагьалълъобза До мизохъа нисос: гьинкьа мунагь-гьаькъ гаьччо аьчӀенайигна аьчӀена муъмин-сукӀолгъа гьоᵸс муна̄пикъ Аллагьлилъда̄ уьᵸхода, гьаᵸсаъла̄с йакӀо йилӀа рази йахъца.
2. Йоъийа окколакьас хабар
8Йаги гьинис ацӀона окколаъас гьоᵸсцойс окко йоъда, гухъинна канлъина билӀона ахо лъаьлӀена гьуги-гьотта̄ йиᵸзечӀе йечаннегьцас гьоᵸсдана ийо зогъалди? 9Окко зогълъо, гьинис цӀагьа̄на мадугьаллана ийабалӀена гьолълъо нисос: «Диела рохеллиъ мижена аькал ба̄хъ, дие йоъийо окко зогъна гей». 10До мизохъа нисос: вагьла̄ Аллагьлис малаикла Аллагьлилъда̄ уьᵸхова муна̄пикъликьа йилӀа рази ба̄хъца.
3. Оьмролала гьидсо къоссиахъийа оьждикьас хабар
11Бетана Иса ме̄йо хабар:
– Сид пуланаб сукӀос зукъона гей къона оьжо. 12ИтӀинасола оьжди нисона гей абохъа: «Або, дибола ирслис гьинил мехецас бутӀа нилӀа», – лӀо. Або гьоглол ирс битӀна гей. 13Лади водла̄ъас итӀиносо оьжо, гьинил ирслиъ йиᵸхъо̄йо къацӀцӀо окко-меседна лъицӀо-къайна йоькчина, аьгъиъна эᵸкьейолӀо на̄ди цӀихо гаьгьийо улкалиъ. Оᵸкъа̄цо гьолцо, иᵸхъо-ахъхъа кӀаьйлӀона, гьинис гаьгьийо къацӀцӀо окко-месед йугъонна гей.
14Гьолцохъас къацӀцӀо окко-месед йолъова замаллиъ, вагьалълъо улкалиъ йоᵸкъона гей йукъо ракъи. Гьули оьжона йилӀа йазихлъилаъ кези ахъна гей. 15Ахирна сид сукӀодой гьаьлтӀи нисонна эᵸкьелъ, гьолцо гьули булӀлагъа эᵸгьна гей. 16Чара бугъолъ, булӀлал ниццас жона йуьᵸхъал разияб зукъона гей, амма гьулина гьолцол нилӀаъас зукъона. 17Аᵸкълолакьана оᵸкъона гьолцо пикро богьна гей: «Диела абола билӀоъ йоькькьад гей бовахийа̄ гьаьлтӀухъалла. Оьнна кьодона мекьейодолас баьбана гей. До гьолӀоъ нуковахъа угъос. 18Аьгъиъна абодой эᵸкьал, бета гьогцохъа нисал: „Або, Аллагьлидойна дудойна аьᵸйда̄ до мунагьла̄ъ кези ахъийо. 19До дибо оьжолъилаъ тӀокӀаб бикӀзи овал мустагьикъаб гаьъа, ахъда дудой гьаьлтӀилаъ оха“».
20Аьгъиъна эᵸкьена гей гьули гьинила абодой. Ата̄кьа̄зу эгана гей абол гогьцас оьжо. Абос гьолцокьа йилӀа йакӀо йугъона гей. Гьогцол дандена чӀанагъона, або оьждил алъона йоцӀна баъдана гей. 21Оьжди абохъа нисона гей: «Аллагьлидойна дудойна аьᵸйда̄ до мунагьла̄ъ кези ахъийо, дибо оьжолӀо нисал до мустагьикъаб гаьъа». 22АболӀо нисода, гьинила лагъла̄хъа нисона гей: «Биссун кӀетӀо лъицӀона йакъона гьолцохъа лъичӀела, гьолцола зокьилъ кӀоьййана мехела, хаьбала̄лъ гьалалъцована гийахела. 23Бакъоллина ахо бегъакӀийо бишена муха, оьжо оᵸкъова̄лас кӀетӀо бес-хулӀо̄лъи йовал, 24судлӀо нисода вагьди дие оьжо угъоваъас ахъна гей, оъийаъас зогъна гей». Гьолло̄л котакаб ихтилат-кеп бовал муьхобалъна гей.
25Гьолцо сукӀос укъосо оьжо вагьалълъо мехлаъ зукъона гей мицалъ. БилӀогъа го̄слаъ, гьолцол тухъна гей лъисо-кешлис гьокӀ. 26Гьицада̄на илӀена сидцойсола нукарлихъа нисонна гей, сийод вагьдо ихтилат-кеплӀо. 27«Дибо ис сагъ-саламатлъилаъ оᵸкъова̄лас або ахо бегъакӀийо бишена мухоллина ихтилат-кеп богьцас гей», – лӀо нисона жаваб нилӀийо нукарли. 28Вагьли тухълъо, укъа оьждис симо бигьна гей, билӀоъ эᵸкьал къабул ахъечӀе зукъона гей. Бета або гисакна гьардизи ахъийолӀо билӀоъ эᵸдо тослӀо нисона. 29Оьжди жаваб нилӀийолӀо: «Вагьдисинаб лӀӣйаъ до дул лагъцой огьда̄йо, ми нисова жойлакьас тилӀкеэш. Вагьлиъ эᵸдо ми дил итӀино чикӀена мухоллеэш диела гьалмагъла̄гъой ихтилат-кеп бовал. 30Амма дибо зукъойо бечелъина хъагьба̄гъой къацӀо эс-хулӀона йолъонна оᵸкъова вагьацо дибола оьждил ми ахо бегъакӀийо бише мухона гей».
31Або гьолцохъа нисойолӀо: «Оьжо! Ми нитоназу дӣгъой къацӀо гей, къацӀцӀо дие бечелъина дибо гей. 32Иле рази бахъна ихтилат-кеп бовал нуцӀос, судлӀо нисода вагьди дибо ис угъоваъас ахъна гей, оъийаъас зогъна гей».
Currently Selected:
Лука 15: KapPROLUK
Highlight
Share
Copy
Want to have your highlights saved across all your devices? Sign up or sign in
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)
Лука 15
15
15 къаьм
ЛъикӀлъилас лъана хабар
1Исахъа энекзи бахъал мокъос зукъойо гьаькъ бокӀолцаса сукӀобана мунагь-гьаькъ гаьгьийа̄ баддо̄л тели аьдамлана. 2Фарисейла̄на диниябла аьлимла̄на Исакьа мордабана нисос зукъойо:
– Вагьди сукӀо мунагьла̄д бовацӀийа аьдамла̄гъой гьудуллъина йогьна гьоллогъой эᵸш-хулӀос, – лӀо нисона.
1. Боъийа бикькьас хабар
3Иса вагьаддийо хабар ме̄йо гьоллол:
4– ГьоᵸсчӀитӀ боцӀилаъас гьоᵸс боълъо, аьчӀенайигна аьчӀена боцӀина гаьлълъа̄чо авлахълиъна бечаннегьна, боъийо бикь мизал эᵸкьаъцас сукӀо гейди мизоъ эᵸдо? 5Бикь михъона муьгъатта̄, разина ахъна гилакьа гунна бежеш гьолцо гьоло билӀогъа. 6Бета билӀогъа оᵸкъона муьгъатта̄, гьалмагълана мадугьаллана ийалӀена гьоллохъа нисос: «Диела рохеллиъ мижена аькал ба̄хъ, дие боъийо бикь зогъна гей». 7Вагьалълъобза До мизохъа нисос: гьинкьа мунагь-гьаькъ гаьччо аьчӀенайигна аьчӀена муъмин-сукӀолгъа гьоᵸс муна̄пикъ Аллагьлилъда̄ уьᵸхода, гьаᵸсаъла̄с йакӀо йилӀа рази йахъца.
2. Йоъийа окколакьас хабар
8Йаги гьинис ацӀона окколаъас гьоᵸсцойс окко йоъда, гухъинна канлъина билӀона ахо лъаьлӀена гьуги-гьотта̄ йиᵸзечӀе йечаннегьцас гьоᵸсдана ийо зогъалди? 9Окко зогълъо, гьинис цӀагьа̄на мадугьаллана ийабалӀена гьолълъо нисос: «Диела рохеллиъ мижена аькал ба̄хъ, дие йоъийо окко зогъна гей». 10До мизохъа нисос: вагьла̄ Аллагьлис малаикла Аллагьлилъда̄ уьᵸхова муна̄пикъликьа йилӀа рази ба̄хъца.
3. Оьмролала гьидсо къоссиахъийа оьждикьас хабар
11Бетана Иса ме̄йо хабар:
– Сид пуланаб сукӀос зукъона гей къона оьжо. 12ИтӀинасола оьжди нисона гей абохъа: «Або, дибола ирслис гьинил мехецас бутӀа нилӀа», – лӀо. Або гьоглол ирс битӀна гей. 13Лади водла̄ъас итӀиносо оьжо, гьинил ирслиъ йиᵸхъо̄йо къацӀцӀо окко-меседна лъицӀо-къайна йоькчина, аьгъиъна эᵸкьейолӀо на̄ди цӀихо гаьгьийо улкалиъ. Оᵸкъа̄цо гьолцо, иᵸхъо-ахъхъа кӀаьйлӀона, гьинис гаьгьийо къацӀцӀо окко-месед йугъонна гей.
14Гьолцохъас къацӀцӀо окко-месед йолъова замаллиъ, вагьалълъо улкалиъ йоᵸкъона гей йукъо ракъи. Гьули оьжона йилӀа йазихлъилаъ кези ахъна гей. 15Ахирна сид сукӀодой гьаьлтӀи нисонна эᵸкьелъ, гьолцо гьули булӀлагъа эᵸгьна гей. 16Чара бугъолъ, булӀлал ниццас жона йуьᵸхъал разияб зукъона гей, амма гьулина гьолцол нилӀаъас зукъона. 17Аᵸкълолакьана оᵸкъона гьолцо пикро богьна гей: «Диела абола билӀоъ йоькькьад гей бовахийа̄ гьаьлтӀухъалла. Оьнна кьодона мекьейодолас баьбана гей. До гьолӀоъ нуковахъа угъос. 18Аьгъиъна абодой эᵸкьал, бета гьогцохъа нисал: „Або, Аллагьлидойна дудойна аьᵸйда̄ до мунагьла̄ъ кези ахъийо. 19До дибо оьжолъилаъ тӀокӀаб бикӀзи овал мустагьикъаб гаьъа, ахъда дудой гьаьлтӀилаъ оха“».
20Аьгъиъна эᵸкьена гей гьули гьинила абодой. Ата̄кьа̄зу эгана гей абол гогьцас оьжо. Абос гьолцокьа йилӀа йакӀо йугъона гей. Гьогцол дандена чӀанагъона, або оьждил алъона йоцӀна баъдана гей. 21Оьжди абохъа нисона гей: «Аллагьлидойна дудойна аьᵸйда̄ до мунагьла̄ъ кези ахъийо, дибо оьжолӀо нисал до мустагьикъаб гаьъа». 22АболӀо нисода, гьинила лагъла̄хъа нисона гей: «Биссун кӀетӀо лъицӀона йакъона гьолцохъа лъичӀела, гьолцола зокьилъ кӀоьййана мехела, хаьбала̄лъ гьалалъцована гийахела. 23Бакъоллина ахо бегъакӀийо бишена муха, оьжо оᵸкъова̄лас кӀетӀо бес-хулӀо̄лъи йовал, 24судлӀо нисода вагьди дие оьжо угъоваъас ахъна гей, оъийаъас зогъна гей». Гьолло̄л котакаб ихтилат-кеп бовал муьхобалъна гей.
25Гьолцо сукӀос укъосо оьжо вагьалълъо мехлаъ зукъона гей мицалъ. БилӀогъа го̄слаъ, гьолцол тухъна гей лъисо-кешлис гьокӀ. 26Гьицада̄на илӀена сидцойсола нукарлихъа нисонна гей, сийод вагьдо ихтилат-кеплӀо. 27«Дибо ис сагъ-саламатлъилаъ оᵸкъова̄лас або ахо бегъакӀийо бишена мухоллина ихтилат-кеп богьцас гей», – лӀо нисона жаваб нилӀийо нукарли. 28Вагьли тухълъо, укъа оьждис симо бигьна гей, билӀоъ эᵸкьал къабул ахъечӀе зукъона гей. Бета або гисакна гьардизи ахъийолӀо билӀоъ эᵸдо тослӀо нисона. 29Оьжди жаваб нилӀийолӀо: «Вагьдисинаб лӀӣйаъ до дул лагъцой огьда̄йо, ми нисова жойлакьас тилӀкеэш. Вагьлиъ эᵸдо ми дил итӀино чикӀена мухоллеэш диела гьалмагъла̄гъой ихтилат-кеп бовал. 30Амма дибо зукъойо бечелъина хъагьба̄гъой къацӀо эс-хулӀона йолъонна оᵸкъова вагьацо дибола оьждил ми ахо бегъакӀийо бише мухона гей».
31Або гьолцохъа нисойолӀо: «Оьжо! Ми нитоназу дӣгъой къацӀо гей, къацӀцӀо дие бечелъина дибо гей. 32Иле рази бахъна ихтилат-кеп бовал нуцӀос, судлӀо нисода вагьди дибо ис угъоваъас ахъна гей, оъийаъас зогъна гей».
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)