Roman 8

Tsaʼnə ŋwùə̀ à chyə̂nə ghù ntɨ̀ŋnə̀ amwuə Àzhwùə̀ Nẅùə̀

1Pɨ̌ pòŋə̀ chyâ e ɨ̀sàʼa ɨ̀tse àtwuə̀ pànə̀ nɨ pobə pənə taʼà ŋwùə̀ pobə pɨ Kristù Yěsû apə̀, 2ntiinə mbòomə Àzhwùə̀ wa nɨ à pənə amwuə Yěsû à ghɨ̀rə̀ mə lo n̂furə̀ amwuə mbòomə wa nɨ à tônə nɨ tɨ̀pòŋə̀ pobə nɨ̀wɨghə̀ la. 3Nẅùə̀ à lə̀ ghɨ̀rə̀ a zhyə̀ za nɨ mbə̀ʼə ka mbòomə a lə̀ chyə̂ ghɨ̀rə̀ e ntiinə mbòbə̀ mbɨ̀ŋmə̀ ŋwùə̀ mɨsoŋə ɨ̀ lə̀ porə̀nə. À lə̀ twuumə̀ moonə̀ e a shwuʼə̀ mbə tsaʼa ŋwùə̀ mɨsoŋə wa nɨ à wa ngɨ̀rə̀ a tɨ̀pòŋə̀ la lo â tyiʼə̀ mbə àzwuumə̀ nɨ̀shwàʼà, nsùu a tɨ̀pòŋə̀ pànə̀ pɨ mɨsoŋə, lenəla, ntsə̀ŋə̀ mɨ̀tɨ̀ŋnə̀ mɨ tɨ̀pòŋə̀ amwuə mbòbə̀ mbɨ̀ŋmə̀ ŋwùə̀ mɨsoŋə. 4Nẅùə̀ à lə̀ ghɨ̀rə̀ a lenə la mbə̀ʼə lẅenə̀ mɨ̀nwùə̀ mɨ təəmə̀nə ma nɨ mbòomə à tàʼnə ambo pə̀ənə̀ pa nɨ pə̀ənə̀ chyə̂nə pə tsaʼnə Àzhwùə̀ a tàʼnə, ka pə zùŋə̀ wə̀ənə̀ pə mbòbə̀ mbɨ̀ŋmə̀.

5Pànə̀ nɨ pɨ chyə̂nə pə tsaʼnə mbòbə̀ mbɨ̀ŋmə̀ ɨ̀ tàʼnə tə̂ ɨ̀twuə̀ ɨ̀pobə la aŋunə ɨ̀nwùə̀ nɨ mbòbə̀ mbɨ̀ŋmə̀ ɨ̀ tàʼnə. La pànə̀ nɨ pobə chyə̂nə pə tsaʼnə Àzhwùə̀ a tàʼnə tə̂ ɨ̀twuə̀ ɨ̀pobə la aŋunə ɨ̀nwùə̀ nɨ Àzhwùə̀ a tàʼnə. 6Nɨ̀tə̂ àtwuə̀ aŋunə ɨ̀pwuumə̀ nɨ mbòbə̀ mbɨ̀ŋmə̀ ɨ̀ tàʼnə à tô nɨ nɨ̀wɨghə̀. La nɨ̀tə̂ àtwuə̀ aŋunə ɨ̀pwuumə̀ nɨ Àzhwùə̀ a tàʼnə à tô nɨ nɨ̀chyə̂mbyə̂ pobə àporə̀porə̀. 7Lenəla, ŋwùə̀ mɨsoŋə ǎ tyiʼə̀ pə ngàŋə̀ mbwùunə̀ Nẅùə̀ nɨ à tə̂nə àtwuə̀ pə aŋunə ɨ̀pwuumə̀ nɨ mbòbə̀ mbɨ̀ŋmə̀ ɨ̀ tàʼnə, ntiinə ka à zuʼnə̀ e a mbòomə Nẅùə̀; a tyìʼə̀ nkǔŋə nkuŋə mbə̀ʼə a zuʼnə̀ e apə̀. 8Mbə̀ʼnə pànə̀ pa nɨ pobə pa ngɨ̀rə̀ a ghobə pə ànwùə̀ nɨ mbòbə̀ mbɨ̀ŋmə̀ ɨzobə ɨ̀ tàʼnə la laʼa ngɨ̀rə̀ a ghobə ànwùə̀ àtse a pòŋə̀ Nẅùə̀ apə̀.

9La ngə̀ aŋunə pɨghə, ka nɨ̀ mə nchyə̂ a wɨghə la tsaʼnə mbòbə̀ mbɨ̀ŋmə̀ ɨ̀ tàʼnə; nɨ̀ chyə̂ pə tsaʼnə Àzhwùə̀ a tàʼnə, mbə̀ʼə a pə nkǔŋə nkuŋə lo Àzhwùə̀ Nẅùə̀ a zə̀ nchyə̂ amwuə pɨghə. Ŋònə̀ nɨ ka à pə e nɨ Àzhwùə̀ Kristù ka à pə e ŋwùə̀ e. 10La Kristù à tə mbə amwuə pɨghə mbaa pə tsaʼnə mbòbə̀ mbɨ̀ŋmə̀ ɨ̀zɨghə ɨ̀ kwɨghə̀ mə ntii tɨ̀pòŋə̀ la, yi àzhwùə̀ àzɨghə a zə̀ nchyə̂ ntiinə Nẅùə̀ à ghɨ̀rə̀ mə mɨ̀nwùə̀ ɨ̀mɨghə təəmə̀. 11Àzhwùə̀ Nẅùə̀ nɨ a lə̀ zhwuumə̀nə a Yěsû aŋunə nɨ̀wɨghə̀ a tə mbə amwuə mɨ̀ntɨŋmə̀ ɨ̀mɨghə, yi ze wa nɨ à lə̀ zhwuumə̀nə a Kristù à pɨ ŋâ nɨ̀chyə̂mbyə̂ ambo mbòbə̀ mbɨ̀ŋmə̀ ɨzɨghə nɨ ɨ̀ ghǎ kwɨghə̀, làŋə̀ a ndzùmə̀ Àzhwùə̀ za nɨ a pənə amwuə pɨghə la.

12Lenəla, nɨ pɨlyimə ɨ̀pâ, ka pə̀ənə̀ pə wəənə̀ ɨ̀pùʼù ambo mbòbə̀ mbɨ̀ŋmə̀ nɨ mbə̀ʼə pə̀ənə̀ chyə̂ a nɨ̀chyə̂mbyə̂ ɨ̀wə̀ənə̀ ndzùŋə̀ tsaʼnə mbòbə̀ mbɨ̀ŋmə̀ ɨ̀ nèrə̀nə. 13Mbə̀ʼnə pə̀ənə̀ tə mmə nchyə̂ ndzùŋə̀ tsaʼnə mbòbə̀ mbɨ̀ŋmə̀ ɨ̀ nèrə̀nə yi pə̀ənə̌ kwɨghə̀. La pə̀ənə̀ làŋə̀ a ndzùmə̀ Àzhwùə̀ nzhwuutə̀ mɨ̀nwùə̀ nɨ mbòbə̀ mbɨ̀ŋmə̀ ɨ̀ tàʼnə, yi pə̀ənə̌ chyə̂.

14Pànə̀ pɨ̀tsùmə̀ nɨ pobə pa nchyə̂ tsaʼnə Àzhwùə̀ Nẅùə̀ a tàʼnə, la ɨ̀poonə̀ pɨ Nẅùə̀. 15Ka Nẅùə̀ a lə̀ ŋâ e a wɨghə nɨ Àzhwùə̀ nɨ a ghɨ̀rə̀ lo nɨ̀ pə ɨ̀pùʼù àkẅàrə̀. La à lə̀ ŋâ wɨghə pə nɨ Àzhwùə̀ nɨ a ghɨ̀rə̀nə lo nɨ̀ pə ɨ̀poonə̀ ɨ̀pe, ntyiʼə̀ ndàŋə̀ a ndzùmə̀ Àzhwùə̀ ghu ngyìi nshwəŋə̀ lo “Abà! Tǎ ɨwəə!” 16La Àzhwùə̀ Nẅùə̀ àtwuə̀ ɨ̀pɨ̀ŋmə̀ e nɨ a pwuutə̀nə pobə pɨ àzhwùə̀ àzəənə̀ a nɨ shwəŋə̀ lo pə̀ənə̀ la ɨ̀poonə̀ pɨ Nẅùə̀. 17Tsaʼnə pə̀ənə̀ chyə̂nə mbə ɨ̀poonə̀ ɨ̀pe la, pə̀ənə̌ pwuutə̀ pə̀ənə̀ pɨ Kristù a nɨ pə nɨ ɨ̀pwuumə̀ nɨ Tǎ à nùŋə̀nə ambo ɨ̀poonə̀ ɨ̀pe, mbə̀ʼə pə̀ənə̀ mə ndzəənə̀ ngəʼə̀ tsaʼa Kristù, njiilo pə̀ənə̀ kɨ mbə nɨ àghuʼtə̀ e.

Nɨ̀ghaʼà nɨ à ghǎ tô

18Ǹdzəənə̀ lo ngəʼə̀ nɨ pə̀ənə̀ zəənə̀nə tɨ̀tsòŋə̀ ka ɨ̀ kùʼnə̀ e àghuʼtə̀ nɨ Nẅùə̀ à ghǎ nèrə̀ ambo pə̀ənə̀. 19Ɨ̀pwuumə̀ pa ɨ̀tsùmə̀ nɨ Nẅùə̀ à lə̀ tsùŋə̀nə pə mbyabə̀ a nɨ zəənə̀ njyə̂ za nɨ Nẅùə̀ à ghǎ nèrə̀ ɨ̀poonə̀ ɨ̀pe a sàŋə̀ nɨ ntɨŋmə̀ ɨ̀ghobə ɨ̀tsùmə̀. 20Mbə̀ʼnə la à lə̀ kòŋə̀ e Nẅùə̀ ntsə̀ŋə̀ ɨ̀pwuumə̀ ɨ̀tsùmə̀ nɨ à lə̀ tsùŋə̀nə pèrə tyìʼə̀ àfǐfǐ, ka pə e ɨ̀pwuumə̀ pɨ̀ghu. Mbaa pə tsaʼnə à lə̀ tsə̀ŋə̀nə la, à lə̀ pə nɨ àkwàŋə̀ lo 21ɨ̀pwuumə̀ pèrə pə nɨ à lə̀ tsùŋə̀nə la ghǎ furə̀ ambo nɨ̀wɨghə̀ wa nɨ à lə̀ ghɨ̀rə̀nə pèrə kwɨghə̀ ndə̂ la, tyiʼə̀ pə àtwuə̀ nɨ pobə amwuə nɨ̀ghaʼà ɨ̀poonə̀ pɨ Nẅùə̀ ghù ngẅùunə.

22Pə̀ənə̀ zhyə̂ lo ɨ̀pwuumə̀ nɨ Nẅùə̀ à tsùŋə̀nə pyə̀ mmə nchwùunə̀ amwuə àndzaŋə tsaʼa mə̀ngyə̌ nɨ à kòonə a moonə̀ tə mbyàa tɨ̀tsòŋə̀. 23Ka pə e pə ɨ̀pwuumə̀ pɨ̀ghu ndàʼà; la pə̀ənə̀ nɨ pə̀ənə̀ kẅiirə̀ mə mɨntyaŋnə mɨ Àzhwùə̀ mɨ ntsàambyə̀ nɨ pə̀ənə̀ pə nkɨ mmə nchwùunə̀ amwuə pə̀ənə̀ mbyabə̀ lo Nẅùə̀ a lòo a wə̀ənə̀ aŋunə ɨ̀poonə̀ ɨ̀pe ntyiʼə̀ nfuukə̀ mbɨ̀ŋmə̀ ɨ̀zəənə̀ amwuə ngəʼə̀. 24Tsaʼnə Nẅùə̀ à lə̀ fuukə̀nə a wə̀ənə̀ amwuə ngəʼə̀ la, pə̀ənə̌ kɨ tyiʼə̀ mmə pyabə̀ lo Nẅùə̀ a lòo a wə̀ənə̀ aŋunə ɨ̀poonə̀ ɨ̀pe pə̀ənə̀ pirə̀ a wə̀ənə̀ tɨ zəənə̀ àzwuumə̀ nɨ pə̀ənə̀ mənə mbyabə̀. A ɨ̀wə̌ nɨ mbə̀ʼə a mə ndzəənə̀ àzwuumə̀ nchi mmə mbyabə̀ a zèrə? 25La pə̀ənə̀ tə pəla nnùŋə̀ ntɨŋmə̀ mmə mbyabə̀ àzwuumə̀ nɨ ka pə̀ənə̀ mə ndzəənə̀ a wə̀ənə̀, a pòŋə̀ lo pə̀ənə̀ ẅìimə̀ ntɨŋmə̀ mmə mbyabə̀ tyìʼə̀ pyabə̀nə.

26Tsaʼnə pə̀ənə̀ mənə mbyabə̀ la, lə̌ tsaʼnə Àzhwùə̀ Nẅùə̀ a zə ngyèmpə̀ a wə̀ənə̀ ntiinə pə̀ənə̀ porə̀nə. Mbə̀ʼnə ka pə̀ənə̀ zhyə̂ a wəənə̀ mɨ̀nwùə̀ nɨ mbə̀ʼə pə̀ənə̀ chàʼtə̀ a Nẅùə̀ aŋunə la. La Àzhwùə̀ Nẅùə̀ àtwuə̀ ɨ̀pɨ̀ŋmə̀ e nɨ a za nchàʼtə̀ a Nẅùə̀ àtwuə̀ nɨ pə̀ənə̀ amwuə ndwuumə̀ nɨ mbə̀ʼə ka ŋwùə̀ mɨsoŋə a zhyə̂ shwəŋə̀ e. 27Ze wa nɨ à zhyə̂nə àkwàŋə̀ nɨ a pənə amwuə mɨ̀ntɨŋmə̀ pə̀ənə̀ la, à kɨ nzhyə̂ àkwàŋə̀ nɨ a pənə amwuə Àzhwùə̀, ntiinə Àzhwùə̀ a za nchàʼtə̀ a Nẅùə̀ àtwuə̀ nɨ pànə̀ pɨ Nẅùə̀ amwuə ndwuumə̀ nɨ Nẅùə̀ à tàʼnə.

28Pə̀ənə̀ zhyə̂ lo Nẅùə̀ à tsùŋə̀ àzwuumə̀ àtsùmə̀ lo â pòŋə̀ la ambo pànə̀ nɨ pɨ kòŋə̀nə e; mbə pànə̀ pa nɨ à fuŋə̀nə a ghobə njiilo pobə ghɨ̀rə̀ mɨ̀nwùə̀ nɨ à lə̀ pyə̀ mə nkwàŋə̀. 29Pànə̀ pa nɨ Nẅùə̀ à lə̀ tsoʼnə a ghobə lo pobə gha mbə pə̀ənə̀ ɨ̀pe, à lə̀ nùŋə̀ lo pobə ghǎ pə tsaʼa moonə̀ e, njiilo moonə̀ e wə̀ a tyiʼə̀ mbə ntsàambyə̀ moonə̀ a tɨ̀tɨ̀rə̀ ɨ̀poonə̀ ɨ̀pe pɨ̀noʼnə. 30Lenəla, Nẅùə̀ à lə̀ kɨ nfuŋə̀ pànə̀ pèrə pə nɨ à lə̀ tsoʼnə nnùŋə̀ la. Pyə̀ pa nɨ à lə̀ fuŋə̀nə la, à lə̀ ghɨ̀rə̀ mɨ̀nwùə̀ ɨ̀mobə təəmə̀. Pyə̀ nɨ à lə̀ ghɨ̀rə̀nə mɨ̀nwùə̀ ɨ̀mobə təəmə̀, à lə̀ kɨ ndòo a ghobə nkwuunə̀ amwuə àghuʼtə̀ e.

Yěsû a nèrə̀ tsaʼnə Nẅùə̀ à kòŋə̀nə a wə̀ənə̀

31Pə̀ənə̀ tyiʼə̀ nshwəŋə̀ lə lo àkə aŋunə ànwùə̀ zèrə zə̀? Nẅùə̀ à tə mbəla mbə pə̀ənə̀ pɨ pobə, a wə̀ənə̀ a tyiʼə̀ mbètə̀ ɨ̀wə̌? 32Ka Nẅùə̀ à lə yìʼtə̀ e a moonə̀ e, la ŋŋâ e lo â tô nkwɨghə̀ àtwuə̀ pə̀ənə̀ pɨ̀tsùmə̀, mbə̀ʼə a kɨ ka tyiʼə̀ ŋâ e a wə̀ənə̀ nɨ ɨ̀pwuumə̀ pɨ̀noʼnə kẅìʼnə̀ aŋunə moonə̀ e wə̀? 33A ɨ̀wə̌ nɨ mbə̀ʼə a chyâ ɨ̀sàʼa aŋunə pànə̀ pɨ Nẅùə̀ nɨ à tsoʼò mə? A tyìʼə̀ Nẅùə̀ nɨ à ghɨ̀rə̀nə lo mɨ̀nwùə̀ mɨ pànə̀ təəmə̀. 34A ɨ̀wə̌ nɨ mbə̀ʼə a chyâ ɨ̀sàʼa àtwuə̀ pobə? A Yěsû Kristù wa nɨ à lə̀ kwɨghə̀nə la. Ze wa nɨ pɨ lə̀ zhwuumə̀nə e aŋunə nɨ̀wɨghə̀ a tyiʼə̀ nnwuunə̀ a pàa àpô Nẅùə̀ yè zɨghə̀nə nchàʼtə̀ a Nẅùə̀ àtwuə̀ nɨ pə̀ənə̀ la? 35A ɨ̀wə̌ nɨ mbə̀ʼə a ghàpə̀ a wə̀ənə̀ pɨ ɨ̀kòŋnə̀ Kristù? Mbə̀ʼə lə a pə ngəʼə̀, kə̀ mɨ̀nwùə̀ mɨ tɨ̀ŋnə̀, kə̀ ntòmnə̀, kə̀ njyə̀, kə̀ àfumə̀, kə̀ nɨ̀pə a ntswùə̀ nɨ̀wɨghə̀, kə̀ nɨ̀wɨghə̀? 36Tsaʼnə pɨ ŋwàʼnə̀nə amwuə àŋwàʼnə̀ Nẅùə̀ lo,

“Ntii o, pəə pə a ntswùə̀ nɨ̀wɨghə̀ njyə̂ ɨ̀tsùmə̀:

Pɨ mə naŋə̀ a wəə tsaʼa mɨ̀mbyə̂ mɨ ndzìrə̀ nɨ pɨ pə ntàʼà lo kyiimə̀.”

37Ngaŋə, aŋunə ɨ̀nwùə̀ pèrə pə ɨ̀tsùmə̀, pəə zɨghə̀ mə ntsòo ndàŋə̀ a ndzùmə̀ ze wa nɨ à lə̀ kòŋə̀nə a wə̀ənə̀ la. 38Mbə̀ʼnə ǹzhyə̂nə nkǔŋə nkuŋə lo ka àzwuumə̀ àtse a pə e ghu nɨ mbə̀ʼə a ghàpə̀ a wə̀ənə̀ aŋunə ɨ̀kòŋnə̀ Nẅùə̀. Kə̀ a pə nɨ̀wɨghə̀, kə̀ nɨ̀chyə̂mbyə̂, kə̀ pəngèrə̀, kə̀ mɨ̀tɨ̀ŋnə̀ mɨ ndzùmə nɨ mɨ pənə a àtwuə̀ ɨ̀shyə̂ ghə, kə̀ mɨ̀nwùə̀ mɨ tɨ̀tsòŋə̀, kə̀ mɨ̀nwùə̀ nɨ mɨ ghǎ tô, kə̀ mɨ̀tɨ̀ŋnə̀ mɨ̀tse, 39kə̀ ɨ̀pwuumə̀ nɨ pèrə pənə àtɨ̀ghə a nɨ̀pwuurə̀ kə̀ pyə̀ nɨ pèrə pənə a ɨ̀sùmə ɨ̀shyə̂, kə̀ àzwuumə̀ àtsùmə̀ nɨ a pənə a àtwuə̀ ɨ̀shyə̂ ghə. Ka àzwuumə̀ àtse a àtwuə̀ ɨ̀shyə̂ ghə nɨ mbə̀ʼə a gha ngàpə̀ a wə̀ənə̀ aŋunə ɨ̀kòŋnə̀ Nẅùə̀ nɨ ɨ pənə amwuə Kristù Yěsû Ndòʼnə̀mbyə̂ ɨ̀wə̀ənə̀.

Currently Selected:

Roman 8: pny

Highlight

Copy

Compare