Röm 4

Bëëdi Abrɑhɑm Á Nyuudhi

1Á ngø ɑ kwøb yi yɑn kì ri wïyee Abrɑhɑm, ɑ́ ngø ɑ ɑ́cwöb kipere? 2Keløg e di yïëy yi Jwøk kinni tir kɑ per gïg-ɑ ɑ́gwøge, kööre di pwöde kidyër, de pɑ di nenni yi Jwøk e tir. 3#Cɑ̈gø 15.6; Gɑl 3.6 Mɑ́ wɑ̈nyi kwërø okööbø kinni, “Abrɑhɑm kwøbbi Jwøk ɑ́yïëye, kɑ kwɑny yi Jwøk ɑ́ ngɑntir kì bɑng yïëye.” 4Ngɑn göögø, köönge bɑ mee, de nuti cɑɑg kɑ wɑ̈dhø mëggii. 5De tyëng-ɑ bëëdø kì ri yïëyø, e pɑth ki gwøg, ɑ ree bëëd yi gen, kí tyëng-ɑ gɑ̈nni Jwøk ɑ nyi kwøb kinni ngɑn-ɑ ɑ́bɑ̈jji bong cɑ́y kì köme këti, ceg bëëdø ɑ́ yïëyø menɑni ɑ nyi lidh yi Jwøk, o kööbe kinni bong kwöör orøg kì kömi gen. 6Bɑ per møgɑni, ɑ ɑ́kwøb yi Debïd e lejj-ɑ medi pyëw ngɑn-ɑ ɑ́gwøg e tir yi Jwøk, e bong gïn gwøøg en kinni,

7 # Wör 32.1-2 “Tyëng-ɑ orøøg gen nyi lɑ̈ɑ̈ny, ri gen dɑ gyëdh;

mɑ́ Jwøk lɑɑwe nyi dwööge’ piny kipe orøøg gen!

8Ngɑn-ɑ orøge pɑ kwɑ̈nnii yi Jwøk ree dɑ gyëdh!”

9De gyëdh møg-ɑ kømmi yi Debïd bɑ kipe tyëng-ɑ ɑ́ngøl keti gen, wɑlɑ̀ bɑ kipe ji bënn? Wɑ nyii kööbø kinni, Abrɑhɑm cwølli yi Jwøk ɑ́ ngɑntir kì bɑng yïëye. 10Á ɑ́wën ɑ ɑ́cwöb møgɑni; ge ɑ́cwöb e ngølø cɑ̈gø wɑlɑ̀ nuti cɑ̈gø? 11#Cɑ̈gø 17.10 Abrɑhɑm ɑ́ngøl-ɑ cyɑ̈n e rum yïëyø. De ngølɑni ɑ́nyodh dhwɑ̈ng-ɑ ɑ́yod yi en e nuti ngølø. O bɑ per møgɑni ɑ ɑ́göög Abrɑhɑm ki wïyi ji-ɑ nyi yïëy bënn ge nuti ngølø, kipe kinni o ge yïddi gen ki dhwɑ̈ng, cɑgg ɑ́ kɑ̀ nuti ngøl gen. 12O Abrɑhɑm bɑ wïyi tyëng-ɑ ɑ́ngøl møg-ɑ pɑ mïdhi ciggi ngøl keti gen, de ge bëëd-ɑ bëëdi Abrɑhɑm ɑ ɑ́yïëy e nuti ngølø.

Kwënggi Jwøk nyi Yod-ɑ Bɑng Yïëyø

13 # Cɑ̈gø 17.4-6; 22.17-18; Gɑl 3.29 Møg-ɑ ɑ́köbbi Abrɑhɑm yi Jwøk kinni, piny bëne ógöögø ki mee geki kwɑrre, bɑ kì bɑng yïëye, de pɑth ki bɑng Ciggi Mosɑ̀. 14#Gɑl 3.18 Mɑ́ keløg e di bëëd ɑ́ bɑng Ciggi Mosɑ̀ ɑ di lɑɑg piny, ti yïëyɑni di gɑ̈g. Kɑ møg-ɑ ɑ́kwëng yi Jwøk di bong per gen. 15Cigg nyii kɑ̈nø ki rënyi pyëw Jwøk, o keny-ɑ bong Cigg bong pëëmø.

16 # Gɑl 3.7 Köngø cung-ɑ́ɑ̀ kömi yïëyø, o kwënggi Jwøk cungi gen ɑ́ gïn-ɑ ɑ́muuj yi Jwøk, e thödh-ɑ nyigi Abrɑhɑm bënn; pɑ mëgg-ɑ tyëng-ɑ mïdhi Cigg keti gen, dɑ́ kí tyëng-ɑ ɑ́yïëy bënn ni Abrɑhɑm thyew. Mɑ́ Abrɑhɑm bɑ wïyee wɑ bënn, 17#Cɑ̈gø 17.5 ni kɑ̀ kööb wɑ̈nyi kwërø kinni, “Yï ɑ́gwøgɑ yïn ɑ́ wïyi jurrì mø ngenyø.” O kwënggɑni døøj kì yï Jwøk, eni Jwøng-ɑ ɑ́yïëy yi Abrɑhɑm; Jwøng-ɑ nyi dwöög tyëngthøø be nënni, kɑ gïjø mɑ ɑ́bëëd e bogøn nyii cwöbø kɑ̀ kööbe. 18#Cɑ̈gø 15.5 Abrɑhɑm ɑ́yïëy e yïe dɑ gɑ̈ɑ̈nø, kì keny me bong gïn gɑ̈nni, codhe ɑgööge ki “wïyi pödhh mø ngenyø.” Ni kɑ ɑ́kwøbii yi wɑ̈nyi kwërø ceth kinni, “Kwɑrrí óbëëd ge gïïr ni kyell.” 19Abrɑhɑm ɑ́bëëd runne cyɑ̈ngø gwøg ki miyø kì bøli kenyɑni, o yïëye nuti nyönhø keny-ɑ ɑ́lïdhe kinni dële rum thøø, o nyödi Sɑrɑ̀ cyëge rum thøø thyew.#Cɑ̈gø 17.17 20Yije nuti pyërø ki møg-ɑ ɑ́kwëng yi Jwøk; de pyëwe ɑ́wëggi tëngø yi yïëye. 21E gɑ̈nn-ɑ kinni, Jwøk, gïn-ɑ ɑ́kwøbe ógwøg yi en ceth. 22Bɑng yïëyɑni ɑ ɑ́kwɑɑny Abrɑhɑm yi Jwøk, ɑ́ ngɑntir. 23Kwøbbi kinni, “Ákwɑny ɑ́ ngɑntir yi Jwøk” nuti gwedø kɑ pere kete. 24Ge ɑ́gwed kɑ peree thyew, wɑ ɑ ókwɑny wɑ bɑ tyëngtir, wɑ tyëng-ɑ ɑ́yïëyii, en ɑ ngɑn-ɑ ɑ́tug Wë Yëso kì yij thøø. 25#Icɑ 53.4-5 Ámuuj yi en kɑ per lɑ̈ɑ̈nyi orøgee, kɑ gø tuge kì yij thøø kipe løgi wɑ tyëngtir.

Currently Selected:

Röm 4: shkDCB

Highlight

Copy