Kwɑn 22
22
Ödi Rɑ̈ɑ̈dh Moɑb Yï Bɑlɑɑm
1Tyëng Isrɑil ɑ́dhwödh, kɑ ge gudd-ɑ thwøri Moɑb kì løøg Nɑm Urdun kì kuni wɑɑng cyɑ̈ɑ̈ng mwøl kì bøli Yerikö.
2Kɑ gïg-ɑ ɑ́göggi tyëng Amör yi Isrɑil, lïngi yi Rɑ̈dh Bɑlɑk wɑ̈d Dhipor, rɑ̈ɑ̈dh tyëng Moɑb. 3Kɑ Moɑb obwøgø ki mendwøng yi tyëng Isrɑil, mɑ́ kwɑnni gen ɑ́bëëd ge gïïr. 4Kɑ pëjji Midyɑn köbbi yi Moɑb kinni “Nënni gïg-ɑ butee jwɑn kɑ rënyø yi tyëngwïïnø møgɑni, ni wɑdh kenyi nwɑɑje lum dhøge kì pɑ̈l.” Codhe, kɑ Rɑ̈dh Bɑlɑk, 5#Kwɑn 31.8; 2 Pït 2.15-16; Yeudɑ̀ 10 oödø ki jøg mø cwööl Bɑlɑɑm wɑ̈d Beor, e ying-ɑ Pethur kì kömi Nɑm Porɑt kì piny Amɑw, gø ɑ́öde ki wöödø kinni, “Dɑ ji mɑ ɑ́bï ge kɑ̈ɑ̈l-ɑ Rïp, jiɑni ɑ́tɑɑy yij piny bëne, o ɑnɑn ge bëëdø ge rwööm ki pödhɑ. 6Bïí kɑ ge lɑ̈mmí cyën, o ge ótyɑm yi yɑn, men-ɑ́ kwɑnni gen gïïr kibøli wøn. Yɑ ngɑ̈ny wøw kinni lɑmmí pɑ nyi pɑ̈dhi piny, ngɑn lɑ̈mmí gyëdh nyi ceg kɑ gyëdhø, o ngɑn lɑ̈mmí cyën, nyi ceg kɑ cyenø.”
7Codhe, kɑ jøgdøngi Moɑb geki jøgdøngi Midyɑn ókedhø ge ókɑ̈ddø ki köggi lɑm. Awɑ̈dhi gen yï Bɑlɑɑm, kɑ gø köbbi gen ciggi Bɑlɑk. 8Aköbbi gen yi Bɑlɑɑm kinni, “Nin wun kì keny, wu ódwöggɑ møg-ɑ óköbbi yɑn yi Jwøng-ɑ Ácwɑ̈ɑ̈j dhuki.” Codhe, kɑ jɑggi Moɑb geki jɑggi Midyɑn nïnn-ɑ gøl Bɑlɑɑm.
9Kɑ Jwøk bï-ɑ yï Bɑlɑɑm, ɑpëjje kinni, “Jøg-ɑ gølí bɑ møg?”
10Alöggi Bɑlɑɑm kinni, “Jøgɑni ɑ́ör-ɑ yïɑ yi rɑ̈ɑ̈dh Moɑb, Bɑlɑk wɑ̈d Dhipor ki wöödø kinni, 11“Dɑ ji mɑ ɑ́bï ge kɑ̈ɑ̈l-ɑ Rïp, ge ɑ́tɑɑy yij piny bëne, bïí lɑ̈mmi gen yɑn, o ge tyɑm yi yɑn, o ge cyeddɑ.”
12Aköbbi Bɑlɑɑm yi Jwøk kinni, “Yï ko kedh ki jøgɑni, o tyëng Isrɑil ko lɑɑm ki lɑm mø rijjø, mɑ́ gyëdhhɑ ying-ɑ kömi gen.”
13Akedhi Bɑlɑɑm yï jøg-ɑ ɑ́ör yi Bɑlɑk, kɑ gï köbbe kinni, “Døøg wun pödhi wun, Jwøng-ɑ Ácwɑ̈ɑ̈j yɑ ɑ́mɑ̈ɑ̈ne kedhø ki wun.” 14Codhe, ɑdøøg gen yï Bɑlɑk kɑ ge okööbø kinni, “Bɑlɑɑm ɑ́bɑ̈nyi bëënø.”
15Codhe, kɑ Bɑlɑk cig-ɑ ör ki jøgdøngø mø kwɑnni gen ngenyø, o per gen teeg kibøli jø tyeli mɑl. 16Ge ɑ́kedhi yï Bɑlɑɑm kɑ gø köbbi gen wöön-ɑ ɑ́kɑ̈ɑ̈l yi gen kì yï Bɑlɑk kinni, “Yɑ kwɑjj-ɑ yïn kinni, ko di gïn mɑ̈ɑ̈n yïn bëënø. 17Yï ótheg yi yɑn ki mendwøng. O gïg-ɑ ókwøb yi yïn ógwøg yi yɑn ge bënn, lɑ̈mmí yɑn jiɑni.”
18Alöggi Bɑlɑɑm kinni, “Bɑlɑk, cɑgg yɑ mëgge gøle gø pɑ̈ɑ̈ng en ki dhɑb geki ngyënyø ɑ́tegø, møg-ɑ kwøb yi Jwøgɑ, Jwøng-ɑ Ácwɑ̈ɑ̈j, pɑ pyem yi yɑn, cɑgg ɑ́ kì ri kwøb mø yöd. 19De nin wun kì keny ni jø tyeli mɑl, o yɑ óyodɑ møg-ɑ ócigi köbbi yɑn yi Jwøng-ɑ Ácwɑ̈ɑ̈j.”
20Kɑ Jwøk bï-ɑ yï Bɑlɑɑm kì wɑ̈rɑni, ɑkööbe kinni “Keløg jøgɑni bëën-ɑ be dwɑ̈ɑ̈yi yïn, kedh ki gen, de gwøg gïn-ɑ óköbbɑ yïn ceth.” 21Adhwödh Bɑlɑɑm kì mwøl, kɑ pëgg-ɑ kömi ɑdere, ɑkedhe geki jɑggi Moɑb.
Bɑlɑɑm geki Adere
22Jwøk ɑ́bëëd pyëwe orɑ̈mø ki kedhi Bɑlɑɑm. Bɑlɑɑm ɑ́kedh e cyɑ̈dh-ɑ ɑdere, kí bɑ̈ngge ɑ́ryew kì bɑnge, ɑrødhii yi wëywöni Jwøng-ɑ Ácwɑ̈ɑ̈j. 23Kɑ wëywönɑni lidh yi ɑdere e ócungø kì dïyöö ki pilø kì cinge, ɑkëjji ɑderø e töng-ɑ yij pwödhø, ɑgøøj ɑderø yi Bɑlɑɑm gø dwööge’ yij yöö. 24Codhe, ɑcungi wëywönɑni kì kɑɑm bɑ̈ggi oløg ɑ́ryew mø kelli gen cyɑ̈gi, o dörri gen bɑ ɑger ki kïttì. 25Keny-ɑ ɑ́liidh wëywödø yi ɑderø, ɑkëjje ree dijje’ ri dörø, kɑ tyeli Bɑlɑɑm pög yi dörɑni. Kɑ ɑderø cigi gøjø yi Bɑlɑɑm. 26Kɑ wëywönɑni cig-ɑ kedhi bøli gen, ɑcunge kì kɑɑm me dhiing ki mendwøng, me bong keny këjji. 27Keny-ɑ ɑ́liidh wëywödø yi ɑderø, ɑbudde kì piny kí Bɑlɑɑm kì köme, ɑrënyi pyëw Bɑlɑɑm kɑ ɑderø gøje. 28Codhe, kɑ ɑderø dhøge tug yi Jwøng-ɑ Ácwɑ̈ɑ̈j, ɑköbbe Bɑlɑɑm kinni, “Á ngø ɑ ɑ́göggɑ yïn, ɑ pere gøøj yɑn ki tyel ɑ́dɑ̈g?”
29Alöggi Bɑlɑɑm kinni, “Yï ɑ́pwöd yi yɑn kɑ per kɑ ɑ́gwøøg dhëg! Ke di bëëde e dɑ pilø kì cingɑ yï di nɑ̈gɑ.”
30Alöggi ɑderø kinni, “Yɑ pɑth ki ɑder-ɑ köme nyi cyɑ̈dhi yi yïn cøn? Dɑ gïjø me ni men mɑ ɑ́pɑ̈nyɑ ki göggi yïn?”
Kɑ Bɑlɑɑm okööbø kinni, “Bong gøn!”
31Codhe, ɑyieeb nyingi Bɑlɑɑm yi Jwøng-ɑ Ácwɑ̈ɑ̈j, kɑ wëywönɑni lidhe e ócungø ki pilø kì cinge, ɑleeng Bɑlɑɑm ree piny wïje kuul en piny. 32Apëjji wëywödø kinni, “Ede ɑderø ɑ ɑ́gøjí ki tyel ɑ́dɑ̈g? Yɑ ɑ́bï-ɑ be cyëëgi yuuí, mɑ́ yï nuti dwɑddø kinni o yï kedh. 33De yɑ ɑ́lidh yi ɑderø, ɑkëjje ki tyel ɑ́dɑ̈g. Keløg e pɑ di këjji, yï di nɑ̈g yi yɑn kɑ ɑderø wiyɑ.”
34Alöggi Bɑlɑɑm kinni, “Yɑ ɑ́røngi, kwïj yi yɑn kinni yï ócungø kì yuuɑ. De ɑnɑn keløg yï pɑ dwɑddi kinni o yɑ kedhɑ, yɑ ceg-ɑ døøg pɑc.”
35Akööb wëywödø kinni, “Pɑth, kedh wuki jøgɑni, kɑ yï kwøb møg-ɑ óköbbɑ yïn keti gen.” Codhe, ɑkedh Bɑlɑɑm geki jøg-ɑ ɑ́ör yi Bɑlɑk.
Pɑɑri Bɑlɑɑm yi Bɑlɑk
36Keny-ɑ ɑ́lïng Bɑlɑk kinni i Bɑlɑɑm obëënø, ɑkedhe be pɑɑrii Aɑr, kɑɑl-ɑ ying kömi Nɑm Arnön kì wïj tuung Moɑb. 37Kɑ Bɑlɑɑm pyëje kinni “Yïde ɑ bɑɑny bëënø keny-ɑ ɑ́kwøngɑ yïn ki cwølø? Yï ɑ́ceg-ɑ rumø kinni yï koo theg yi yɑn?”
38Aköbbi Bɑlɑk yi Bɑlɑɑm kinni, “Dɑ́ ngø yɑ ɑ́bï ɑnɑn yøw? O yɑ koo kwøb-ɑ møgɑ, de yɑ ókwøb-ɑ møg-ɑ óköbbi yɑn yi Jwøng-ɑ Ácwɑ̈ɑ̈j ceth.” 39Codhe, ɑdhwödh Bɑlɑk geki Bɑlɑɑm kɑ ge kedh-ɑ kɑɑl Kudhöt. 40Kɑ Bɑlɑk ongɑ̈dø ki dhög kí dyëg gɑ gëdhhì, kɑ Bɑlɑɑm geki jyɑ̈gg-ɑ cyɑ̈dhi ki en nënge ki rïngø.
Møg-ɑ Ákwøng ki Töngø yi Bɑlɑɑm
41Dhuki ɑkïdhi Bɑlɑɑm Bɑmöth Bɑɑl yi Bɑlɑk kun-ɑ nënni kwï tyëng Isrɑil.
Currently Selected:
Kwɑn 22: shkDCB
Highlight
Copy
Compare
Share
Want to have your highlights saved across all your devices? Sign up or sign in
Shilluk DC Bible © Bible Society in South Sudan, 2011.
