Kedhø 24

Cïbi Lwöbø Keje

1Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Bïu yïɑ, yïn kí Aɑron, kí Nɑdɑb, kí Abiu kí ji pyɑ̈r ɑ́bïryew kì kelli jøgdøngi Isrɑil, kɑ ri wun bøødh wun piny wu nudd wu lɑ̈wi. 2Yï ketí ɑ ówɑ̈nhi butɑ, de jøg-ɑ kyeelø ko wɑ̈nhi butɑ, ji ko yedhi wïj kït thyew.”

3Mosɑ̀ ɑ́kedh kɑ ji köbbe kwøbbi Jwøng-ɑ Ácwɑ̈ɑ̈j geki cigge bënn. Kɑ ji ólöggø bënn wïj ɑ́kyel kinni, “Møg-ɑ ɑ́kwøb yi Jwøng-ɑ Ácwɑ̈ɑ̈j bënn ógwøg yi wøn!” 4Kɑ kwøbbi Jwøng-ɑ Ácwɑ̈ɑ̈j gwed yi Mosɑ̀ ge bënn. Kɑ ogëdø dhuki ki këli lɑm kì thɑ kït, gø ɑ́ger yi en kɑ ɑ́tuggi kïttì mø døngø, gɑ pyɑ̈rø wïdɑ́ryew, ge cungi gɑ kwɑnni wɑ̈thi kɑ̈lli Isrɑil. 5Codhe, ɑöde ki yɑɑg-ɑ wøbb møg kedhi be rɑ̈bbi Jwøng-ɑ Ácwɑ̈ɑ̈j kene men-ɑ ɑ́ngɑ̈llii, kɑ ge ongɑ̈dø ki dhög kiper mër. 6Kɑ budi remø kwɑny yi Mosɑ̀, kɑ gø kïdhe yethi löd. Kɑ bun-ɑ kyeelø kinye ri këli lɑm. 7Codhe, ɑkwɑnye wɑ̈nyi lwöbø, wɑ̈ny-ɑ yije ógweed Ciggi Jwøng-ɑ Ácwɑ̈ɑ̈j. Kɑ gø rɑ̈nge ji e óryeerø. Kɑ ge okööbø kinni, “Kwøbbi Jwøng-ɑ Ácwɑ̈ɑ̈j ólïngi yi wøn, o gïg-ɑ ɑ́kwøb yi Jwøng-ɑ Ácwɑ̈ɑ̈j ógwøg yi wøn ge bënn.”

8 # Mt 26.28; Mk 14.24; Lk 22.20; 1 Kör 11.25; Ibru 9.19-20; 10.29 Codhe, ɑkwɑɑny rem-ɑ yethi löd yi Mosɑ̀ kɑ gø wiide ri ji. Akööbe kinni, “Men bɑ rem-ɑ cïb lwöm-ɑ kɑɑm wun ki Jwøng-ɑ Ácwɑ̈ɑ̈j keje.”

9Kɑ Mosɑ̀, kí Aɑron, kí Nɑdɑb kí Abiu geki jøgdøngi Isrɑil pyɑ̈r ɑ́bïryew yedh-ɑ mɑl wïj kït. 10Kɑ Jwøøg Isrɑil lidh yi gen. Pɑ̈ltyelle bɑ óbɑng nɑ kïdi mɑl, e ceg-ɑ orɑ̈ng, e lïw nɑ kïn-ɑ cwøl ɑ́ sɑpir yi dhïw-ɑ dhïwe. 11De bong gïnrɑj mɑ ɑ́gögge jøgdøngi Isrɑil. Ge ɑ́nenni yï Jwøk kidyër, codhe ɑcyɑ̈ɑ̈m gen kɑ ge omɑ̈dhø kì kej ɑ́kyel.

Mosɑ̀ kì Wïj Kïti Sinɑy

12Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Yïnhí yïɑ wïj kït. Kɑ yï bëëd kì keny, yï óthödhɑ ki ópɑ̈nni kït. Kömi ópɑ̈nnɑni ɑ ɑ́gweedɑ ciggɑ, gɑ møg-ɑ ópwönyi ji.” 13Kɑ Mosɑ̀ odhwödhø geki Jöcwø nyel-ɑ nyi kønyii, kɑ Mosɑ̀ yedh-ɑ mɑl wïj Kïti Sinɑy, Kïti Jwøk. 14Kɑ jøgdøngø köbbe kinni, “Bëëd wun kì keny gïti keny-ɑ ódwöög wøn yï wun. Aɑron geki Ur ɑ keny èn ki wun, ngɑn yïe di gøny, nyi gönye yï gen.”

15Ayedhi Mosɑ̀ wïj Kïti Sinɑy, kɑ kïnɑni kum yi yïrø. 16Kɑ mɑ̈ɑ̈r Jwøng-ɑ Ácwɑ̈ɑ̈j pëgg-ɑ kömi Kïti Sinɑy. Kɑ obëëdø ɑ́ ɑkum yi yïrø ki cyɑ̈ng ɑ́bïkyel. Kɑ Mosɑ̀ cwøl yi Jwøng-ɑ Ácwɑ̈ɑ̈j kì ri bïryeew cyɑ̈ng, e cwɑgge kɑ̈ɑ̈l-ɑ yij yïrø. 17O mɑ̈ɑ̈r Jwøng-ɑ Ácwɑ̈ɑ̈j nenni yi Isrɑil ɑ́ mɑc me lyel kì wïj kït. 18#Jølø 9.9 Kɑ Mosɑ̀ kedh-ɑ yij yïrɑni. Kɑ Mosɑ̀ obëëdø kì wïj kïnɑni ki cyɑ̈ng pyɑ̈r ɑ́ngwen, kí wɑ̈rr pyɑ̈r ɑ́ngwen.

Currently Selected:

Kedhø 24: shkDCB

Highlight

Copy

Compare