Kedhø 25

Jwödhi Kemi Kwër

(Kedhø 35.4-9)

1Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, 2“Köbbí wɑ̈ddi Isrɑil kinni, muuj yɑn ki lwøl yi ngɑn pyëwe dwɑddi thödhi yɑn. 3Gïg-ɑ cuggi kwɑnyø yi wun kì yï gen bɑ dhɑb, kí ɑ́tegø, kí dilɑl, 4kí ógudh-ɑ kïddi gen bɑ ówɑw kí ɑ́cwïcwïl, kí møg kwɑrø, kí ógudh-ɑ bɑ ɑcwɑ̈j gɑ korø, kí møg-ɑ bɑ ɑcwɑ̈j gɑ yëyyi dyëg, 5kí pënni dyëg møg-ɑ ójwɑ̈ɑ̈gø ki kïn-ɑ kwɑrø, ki pënn-ɑ yöm, kí yɑdh ɑ́lwiy. 6Kí møøw lɑ̈mbɑ̈ɑ̈, kí mɑ̈th-ɑ nyi gïïny møg-ɑ yømi gen med, kí bɑkur, 7kí ócï geki tigg-ɑ kyeelø mø tɑɑg lɑni Ókwër-ɑ Dwøng, geki pɑrø.#25.7 pɑrø: pɑrø, o nyi cwøl ɑ́ pɑri kwër, bɑ ógødh me cyeeg; dhøge ying-ɑ wɑ̈thi ólùm. Bɑ ɑcwɑ̈j ki kor mø per gen teeg, o ree dɑ bøj men yije nyi kïdhi Urïm geki Thumïm, møg-ɑ nyi rɑ̈ɑ̈ng kipe yodi gïn-ɑ dwɑddi yi Jwøk. 8Gëddi yɑn yi ji ki kej kwër kipe kinni o yɑ bëëdɑ kì kelli gen. 9Geru en ceth e pɑ̈r ki kej bëëdø, kí jɑmm-ɑ yije ge nɑ møg-ɑ ónyudhɑ yïn.

Sɑnduug Cigg

(Kedhø 37.1-9)

10“Göög ki Sɑnduug yɑdh ɑ́lwiy bɑ̈re bɑ sentimïtïr miyø kí pyɑ̈rø, o lɑ̈je bɑ sentimïtïr pyɑ̈r ɑ́bïkyel wïdɑ́bïkyel, o döre bɑ sentimïtïr pyɑ̈r ɑ́bïkyel wïdɑ́bïkyel. 11Kɑ gøøj ki dhɑm dhïw kì yije geki köme, kɑ göggí ki dööli dhɑb kì wɑ̈thi tøgge. 12Kɑ kunyí ki yëll ɑ́ngwen mø dhɑb, kɑ ge gøød wɑ̈thi tøgge gɑ ɑ́ngwen, ɑ́ryew kì tuung, kí ɑ́ryew kì tung-ɑ kyeelø. 13Codhe, kɑ yï tëëng ki lødhi ɑ́lwiy, kɑ ge gøøj ki dhɑb. 14Kɑ lødhɑni cød yethi yëll-ɑ tøggi Sɑndug, gɑ møg nyi kɑ̈llii. 15Kɑ wiy lødhɑni bëëd gen kì ri yëlli Sɑndug, ge ko kɑ̈ɑ̈l wɑ̈g kì ree. 16Kɑ lwöm-ɑ ɑ́lwøb yi wɑ cïb yij Sɑndungɑni.

17 # Ibru 9.5 “Göggí ki kum ki dhɑm-ɑ dhïw, bɑ̈re bɑ sentimïtïr miyø kí pyɑ̈rø, o lɑ̈je bɑ sentimïtïr pyɑ̈r ɑ́bïkyel wïdɑ́bïkyel. 18Kɑ yï thɑ̈ɑ̈dh ki kerobb ɑ́ryew, gwøg gen ki dhɑb, kɑ ge cuung kì wɑ̈thi tøggi kumɑni. 19Cïb kerob ɑ́kyel wïj tøg kumɑni kì tuung, kɑ men-ɑ kyeelø cïb tøge kì tung-ɑ kyeelø. Mɑɑg gen ri kum, o ge cyɑ̈dhi gen kyeel. 20Gwøg kerobb ge nenn-ɑ nyingi gen, e obërri gen tïng gen mɑl, gï peedh gen, ge gëng-ɑ kumɑni, e wɑ̈thi gen nenn-ɑ yï gøn. 21Cïb kumɑni kömi Sɑnduug Cigg. Kɑ Ópɑ̈nni Cigg-ɑ ómëggɑ yïn ócïb yij Sɑndungɑni. 22Yɑ óyïddi ki yïn kì kenyɑni, o yɑ kööbɑ ki yïn, yɑ ying-ɑ wïj kumɑni, kì kɑɑm kerobbɑni ryeet, kì kömi Sɑnduug Cigg, o møg-ɑ cïgɑ tyëng Isrɑil nyi köbbɑ yïn.

Tɑrɑbenh-ɑ Köme nyi Cïb Gïncɑm Men-ɑ Mëggi Jwøk

(Kedhø 37.10-16)

23“Göög ki tɑrɑbedhɑ̀ mi gïncɑm ki yɑdh ɑ́lwiy, bɑ̈re bɑ sentimïtïr pyɑ̈r ɑ́bïdɑ̈g wïdɑ́bïdɑ̈g, o lɑ̈je bɑ sentimïtïr pyɑ̈r ɑ́ngwen wïdɑ́ngwen, o döre bɑ sentimïtïr pyɑ̈r ɑ́bïkyel wïdɑ́bïkyel. 24Kɑ gøøj ki dhɑm dhïw, kɑ tøgge dööl ki dhɑb. 25Kɑ göggí ki gël me döre bɑ mïlimïtïr pyɑ̈r ɑ́bïryew wïdɑ́bïj, kì tøgge bënn. Kɑ gëlɑni dööl ki dhɑb. 26Kɑ göggí ki yëlli dhɑb ɑ́ngwen, kɑ ge cïb wɑ̈thi tøggi tɑrɑbenhɑni gɑ ɑ́ngwen kì ri, kì kɑ̈jj-ɑ di tyelle gɑ ɑ́ngwen. 27Cïb yëll ge cyɑ̈gi ki dööl-ɑ tøggi tɑrɑbedhɑ̀, mɑ́ gen ɑ ómïdhi lødh møg-ɑ nyi kɑ̈llii. 28Gwøg lødhɑni gɑ ɑ́lwiy, kɑ ge gøøj ki dhɑb, kɑ tɑrɑbedhɑ̀ nyi kɑ̈lli ki lødhɑni. 29Kɑ siniy møge, kí thɑnhhe, kí óthɑ̈gge, kí ɑ́thïwwe køny ge bënn gɑ dhɑm dhïw. 30#Kwɑrr 24.5-8 Kɑ gïncɑm men-ɑ bɑ lwølɑ nyi cïb kenyɑni ceth, kì kömi tɑrɑbenhɑni.

Teggi Lɑ̈mbɑ̈ɑ̈

(Kedhø 37.17-24)

31“Göög ki teggi lɑ̈mbɑ̈ɑ̈ ki dhɑm dhïw, kɑ tyele geki kööre kí bɑ̈dde gwøøg ki dhɑm-ɑ ɑtøg, geki gwedde kí okøgge, wiy bëëd gen gɑ ɑ́kyel bënn, e bong men cuggi puth wɑ̈ye. 32Bɑ̈dd ɑ́bïkyel ɑ kɑr kì wɑ̈thi tùnge, ɑ́dɑ̈g kì tuung kí ɑ́dɑ̈g kì tuung. 33Bɑ̈ddɑni bënn ri gen dɑ ɑbuj, kí ɑnɑ̈bb, kí okøgg mø ógwøgø kì ri gen, ge bɑ kɑ̈jj ɑ́dɑ̈g, kì ri bɑ̈dd-ɑ kɑrø bënn. 34O bëëde wïj tengi lɑ̈mbɑ̈ ɑ́kyel dɑ ɑbuj ɑ́ngwen mø bɑ ɑ́tug, kí ɑnɑ̈bb, kí okøgg. 35Göggí thɑ̈thi bɑ̈dd-ɑ kɑrø ki ɑnɑ̈bb bënn, göggí bɑ̈ddɑni bënn gɑ ɑ́bïkyel. 36Wiy tyele geki kööre kí bɑ̈dde bënn, bëëd gen gɑ ɑ́kyel e bong men cuggi puth wɑ̈ye, e bɑ ɑgwøg bëne ki dhɑm dhïw. 37Codhe, kɑ yï göög ki lɑ̈mbɑ̈ɑ̈ ɑ́bïryew møg thønhø, kɑ ge cïb wɑ̈thi teggɑni, o ge mënyyi gen bøle. 38Gwøg digɑ̈bbe, geki óthɑ̈ngge gɑ dhɑm dhïw. 39Dhɑm-ɑ gwøøg teggɑni geki jɑmme bënn røm ɑ́ kïllì pyɑ̈r ɑ́dɑ̈g wïdɑ́bïj. 40#Gwøg 7.44; Ibru 8.5 Nëën kidøøj cyee, o men-ɑ ógwøg yi yïn bëëde e nɑ men-ɑ ɑ́nyudhɑ yïn kì wïj kït.”

Currently Selected:

Kedhø 25: shkDCB

Highlight

Copy

Compare