Kuen 34
34
Këth muɔ̱ɔ̱n Kɛ-naan
1Kä cu Kuoth Nhial Muthɛ jiök i̱, 2“Ruacni kɛ ji̱ I-thɛ-rɛl läri jɛ kɛ, mi wä yɛn coth muun Kɛ-naan (ɛ jɛn mun in bia ciɛŋ, ɛn mun Kɛ-naan kɛɛliwdɛ). 3Kä bɛ kui̱c cuëëcdun ka̱n ni rɛy dɔaar Dhin a wä ni gekä Ɛ-dɔm, kä bi keydɛ a pek Bar Gutdä kui̱ käny ca̱ŋ. 4Kä bɛ rɔ riet cuëëc Ak-ra-bim a wä guut ni kui̱ Dhin, kä bi pekdɛ wa̱a̱ ni Ka-dɛc-bar-ni-ya. Kä bɛ räth ni kä Ɣä-dhar-a-dar a pal ni kä Adh-mon. 5Kä bɛ lɛ jiɛɛn kä Adh-mon bɛ wä rɛy tɔ̱ɔ̱rä I-jëp, kä bɛ wä guut ni Bar in Bo̱r min te kam wi̱i̱ni.
6“Kä bi key kuec konyä ca̱ŋ a Bar in Bo̱r min te kam wi̱i̱ni.
7“Kä bɛ keydu kui̱c caam ka̱n ni Bar in Bo̱r in te kam wi̱i̱ni a wee yiath ni Pääm Ɣor. 8Kä bɛ lɛ ka̱n pääm Ɣor bɛ wä yiath ni dup Ä-math, bɛ wä guut ni kä Dhɛ-dad. 9Kä bɛ wä amäni Dhip-ron, kä bi pekdɛ wa̱a̱ni Ɣä-dhar-e-nan. Nɔmɔ ba jɛn pek këthdu kui̱c caam.
10“Kä bɛ keydu kui̱c känyä ca̱ŋ ka̱n kä Ɣä-dhar-e-nan a wä kä Cɛ-pam. 11Kä bɛ lɛ ka̱n kä Cɛ-pam a wä piny kä Rib-laa kui̱c käny ca̱ŋ A-yin. Kä bɛ räth ni kiir Ki-nɛ-rɛth kui̱ käny ca̱ŋ. 12Kä bɛ wä ni piny kä Jɔr-dɛn, kä bi pekdɛ wa̱a̱ ni Bar Gutdä. Ɛn nɔmɔ ba jɛn mundu kɛɛliw nikɛ këth kɛ.”
13Kä cu Muthɛ ruac kɛ ji̱ I-thɛ-rɛl wee i̱, “Nɛmɛ ɛ jɛn mun in bia da̱a̱k kɛ yor gaakni, min ci Kuoth Nhial ɛ ka̱m thuk duëli da̱ŋ bäŋuan kɛ tha̱a̱ŋ thuɔk duëël Ma-na-thɛ. 14Kɛ ɣöö ci thok duëël gan Rɛ-u-ben kɛ dho̱r gua̱n kɛnɛ thok duëël gan Gad kɛ dho̱r gua̱ni kɛ tha̱a̱ŋ thuɔk duëël gan Ma-na-thɛ kɛnɛ dho̱r gua̱ni pekdiɛn ka̱n. 15Ci thuk duëli da̱ŋ rɛw kɛ tha̱a̱ŋ thuɔk duëël pekdiɛn ka̱n kui̱ yiëër Jɔr-dɛn kä Jɛ-ri-ko kui̱ käny ca̱ŋ.”
Bööth tin ba mun da̱a̱k
16Kä cu Kuoth Nhial Muthɛ jiök i̱, 17“Ti̱ti̱ kɛ nɛy tin ba ji̱ dääk kä mun in ba ciɛŋ. Bo̱o̱th palä ni Ɛl-a-dhar kɛnɛ Jɔ-cua gat Nun. 18Kä bi bööth ram kɛl ka̱n thok duëël ɔ kɛ ɣöö ba mun in ba ciɛŋ da̱a̱k. 19Kä ti̱ti̱ kɛ ciöötkiɛn Ka-leb gat Yɛ-pö-nɛ thok duëël Juda. 20Thok duëël gan Cim-on cua Cɛ-mu-el gat A-mi-ɣud. 21Kɛ Ɛli-dad gat Kith-lon thok duëël Ben-ya-min. 22Kɛ Buki gat Yɔg-li bo̱o̱th thuɔk duëël Gad. 23Kɛ Ɣa-ni-el gat E-pod, bo̱o̱th thuɔk duëël Ma-na-thɛ gat Jo-thɛp. 24Kɛ Kɛ-mu-ɛl gat Cip-tam bo̱o̱th thuɔk duëël Ɛ-pa-rim. 25Kɛ Ɛli-dha-pan gat Par-nak bo̱o̱th thuɔk duëël Dhɛ-bu-lun. 26Kɛ Pɛ̈l-ti-el gat A-dhan bo̱o̱th thuɔk duëël Yi-tha-kar. 27Kɛ Ä-ɣi-ɣud gat Cɛ-lo-mi bo̱o̱th thuɔk duëël A-cɛr. 28Kɛ Pɛ-da-el gat A-mi-ɣud, bo̱o̱th thuɔk duëël Nap-ta-li. 29Cu tɔ̱tɔ̱ a nɛy tin ci Kuoth Nhial kɛ la̱r ɣöö ba mun Kɛ-naan dääk kä ji̱ I-thɛ-rɛl ala duŋdiɛn.”
Currently Selected:
Kuen 34: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
