Kuen 32

Thuk duëli tin cieŋ kui̱ yiëër Jɔr-dɛn

(Ŋuɔ̱t 3:12-22)

1Kä täämɛ cu gaat Rɛ-u-ben kɛnɛ gaat Gad tekɛ ɣɔ̱k ti ŋuan. Kä cukɛ mun Ya-dhɛr kɛnɛ mun Gil-yad nɛn ɛ mun la̱k ɣɔ̱ɔ̱k. 2Kä cukɛ ben kä Muthɛ kɛnɛ Ɛl-a-dhar bo̱o̱th palä kɛ bööth dolä ji̱ I-thɛ-rɛl jiök i̱, 3“Ä-ta-roth, kɛ Di-bon, kɛ Ya-dhɛr, kɛ Nim-raa kɛ Ɛc-bon, kɛ Ɛl-a-le, kɛ Thɛ-bam, kɛ Nɛbo, kɛnɛ Be-on, 4mun ëë ci Kuoth Nhial ji̱kɛ jak kä na̱kɛ ɛ ji̱ I-thɛ-rɛl, ɛ mun la̱k ɣɔ̱ɔ̱k. Kä te nɛy kɛ ɣɔ̱k.” 5Kä cu kɛ wee i̱, “Mi nhɔki jɛ, käm ni nɛy mun ɛ mɔ ba̱kɔ ciɛŋ. /Cuarɛ kɔ lɛ naŋ kui̱ yiëër Jɔr-dɛn.”

6Kä cu Muthɛ gaat Rɛ-u-ben kɛnɛ gaat Gad jiök i̱, “Bi gaatmuɔɔri wä ko̱o̱r kä ku yɛn lɛ te nyuurä wa̱nɛ mi? 7Ɛŋu bi yɛn lo̱c ji̱ I-thɛ-rɛl jak kä jiäk ɔ kɛ wä muun in ci Kuoth Nhial ɛ ka̱m kɛ? 8Ɛ jɛn mëë ci guurikun ɛ la̱t mëë cä kɛ jäk kä Ka-dɛc-bar-ni-ya wa mun guic. 9Kä mëë ca mun nɛn kä Ɛc-kol cua lo̱c ji̱ I-thɛ-rɛl jak kä jiäk kɛ wä muun in ci Kuoth Nhial ɛ ka̱mkɛ. 10Kä cu Kuoth Nhial kɛ̈c ɛn cäŋ ɛmɔ, kä cuɛ rɔ yac wee i̱, 11‘Ɛ puc thilɛ ram mi bi mun nɛn kä nɛy tëë bä raar kä I-jëp a känɛ kä nɛy tin te run ti jiɛɛn da̱ŋ rɛw a wä nhial, mun ëë cä yac i̱ bä ka̱m Ab-ram kɛnɛ Ay-dhɛk kɛ Je-kɔb, kɛ ɣöö /ken kɛn ɣä guɔ̱ɔ̱r kɛ lɔcdiɛn kɛɛliw. 12Ɛ ni Ka-leb gat Yɛ-pö-nɛ raan Kɛ-nadh kɛnɛ Jɔ-cua gat Nun, kɛ ɣöö ca Kuoth Nhial guɔ̱ɔ̱r kɛ lɔcdiɛn kɛɛliw.’ 13Kä cu kɛ̈c Kuɔth Nhial ben kä ji̱ I-thɛ-rɛl, kä cuɛ kɛ jak kä yi̱c rɛy dɔaar kɛ run ti jiɛɛn ŋuaan, amäni mëë ci ri̱c ëë lät jiäk waaŋ Kuɔth Nhial thuɔ̱k. 14Kä yɛn täämɛ cia gua̱th guuri ka̱n, yɛn ri̱c mi ji̱ dueeri, jak yɛn waŋ lɔaac Kuɔth Nhial kɛ ɣöö bɛ rɔ nyɔk kɛ ben kä I-thɛ-rɛl! 15Mi wä yɛn rɔ ri̱t kɔɔrɛ, bɛ nɛy ti̱ti̱ nyɔk kɛ päl däärdɔaar. A bi yɛn kɛ jak kä duɔ̱p kɛn diaal.”

16Kä cukɛ ben thieekä Muthɛ kä cukɛ wee i̱, “Ba̱kɔ detkɔ lät kä lueek ɛn wa̱nɛ kä ba̱kɔ gaatkɔ lät kä ti̱ec. 17Kä ba̱kɔ wä ko̱o̱r kɛɛl kɛ ji̱ I-thɛ-rɛl, amäni mi ca̱kɔ kɛ naŋ guäthdiɛn. Mi wä gaatkɔ te rɛy ti̱ecni ti buɔ̱m buɔ̱ɔ̱m kɛ kui̱ nɛɛni tin ciaŋ kɛ mun. 18Kä /ca̱kɔ rɔ bi ri̱t amäni mi ci ji̱ I-thɛ-rɛl gua̱thkiɛn ka̱n. 19Kɛ ɣöö /ca̱kɔ bi wä cieŋ kɛɛl kɛ kɛ kui̱ yiëër Jɔr-dɛn a wä nhiam. Kɛ gua̱a̱thda ni kui̱ yiëër Jɔr-dɛn kui̱c käny ca̱ŋ.” 20Kä cu Muthɛ kɛ jiök i̱, “Mi bia nɛmɛ la̱t, a bia wä ko̱o̱r nhiam Kuɔth Nhial, 21a bi wutni köörun diaal wä kui̱ yiëër Jɔr-dɛn nhiam Kuɔth Nhial, amäni mi cɛ ji̱ tɛ̈rɛ joc nhiamdɛ. 22Kä cia mun ka̱n nhiamdɛ. Kɛ kɔrɛ bia rɔ cu ri̱t, kä bia cu thil riɛk kä Kuoth Nhial kɛnɛ ji̱ I-thɛ-rɛl. Kä bi mun ɛ mi a duŋ duŋdun nhiam Kuɔth Nhial. 23Kä mi /cia nɛmɛ bi la̱t, ŋa̱cɛ jɛ i̱, cia duer lät kä Kuoth Nhial. Kä ŋa̱cɛ jɛ bi duerun yɛ jek. 24Ta̱thɛ gaatkun ti̱ec kä la̱tdɛ detkun kä lueek. Kä la̱tdɛ min cia lar.” 25Kä cu gaat Rɛ-u-ben kɛnɛ gaat Gad Muthɛ jiök i̱, “Bakɔ la̱t ce̱tnikɛ min ci lar. 26Bi gaatkɔ, kɛ mänkɔ, kɛ detkɔ, nikɛ ɣɔ̱ɔ̱kɔ diaal duɔth wi̱i̱ni Gil-yad. 27Kä kɔn wutni ko̱o̱r diaal ba̱kɔ wä ko̱o̱r kui̱ yiëër Jɔr-dɛn nhiam Kuɔth Nhial ce̱tnikɛ min ci lar.”

28Kä cu Muthɛ ruac kɛ Ɛl-a-dhar bo̱o̱th palä kɛnɛ Jɔ-cua gat Nun kɛ bööth thuk duëli ji̱ I-thɛ-rɛl. 29Kä cu Muthɛ kɛ jiök i̱, “Mi wä gaat Gad kɛnɛ gaat Rɛ-u-ben wutni ko̱o̱r wä ko̱o̱r nhiam Kuɔth Nhial kui̱ yiëër Jɔr-dɛn a bia mun ka̱n, bia kɛ ka̱m mun Gil-yad ba ciɛŋ ɛ kɛn. 30Duundɛ ɣöö mi /kenkɛ wä kui̱ yiëër Jɔr-dɛn kɛɛl kɛ yɛ, bikɛ cieŋ rɛydun muun Kɛ-naan.” 31Kä cu gaat Rɛ-u-ben kɛnɛ gaat Gad jɛ loc i̱, “Ce̱tkɛ min ci Kuoth Nhial ɛ lar ba̱kɔ la̱t. 32Ba̱kɔ wä ko̱o̱r Nhiam Kuɔth Nhial Muun Kɛ-naan, bi gua̱th ciɛŋäda te kui̱ yiëër Jɔr-dɛn.”

33Kä cu Muthɛ gaat Rɛ-u-ben kɛnɛ gaat Gad kɛ tha̱a̱ŋ thuɔk duëël Ma-na-thɛ gat Jo-thɛp ka̱m wec Thi-yon kuäär ji̱ Ɛ-mor, kɛ wec Ög kuäär Ba-can, mun kɛ wi̱i̱kɛ diaal. 34Kä cu gaat Gad Di-bon, kɛnɛ Ä-ta-roth kɛ Ä-ro-er, 35Kɛ At-rot-co-pan, kɛnɛ Ya-dhɛr, kɛ Yɔg-baa, 36kɛ Beth-nim-ra, kɛnɛ Bet-ɣa-ran täth, wi̱i̱ ti buɔ̱m buɔ̱ɔ̱m kɛ lueek deet. 37Kä cu gaat Rɛ-u-ben Ɛc-bon, kɛnɛ Ɛl-a-le, kɛ Kir-ya-tha-yim, 38kɛ Nɛbo, kɛnɛ Baal-me-on (tin ba ciöötkiɛn tit) kɛ Thi-bɛ-ma täth kä cu kɛ kɛ moc ciööt. 39Kä cu gaat Ma-kir gat Ma-na-thɛ Gil-yad wä ka̱n kä ji̱ Ɛ-mor tëë cieŋ thi̱n. 40Kä cu Muthɛ jɛ ka̱m jɛ kä cuɛ cieŋ thi̱n. 41Kä cu Ya-ir gat Ma-na-thɛ wi̱i̱kɛ wä ka̱n, kä cuɛ kɛ cɔl i̱ Ɣa-woth-ya-ir#32:41 Ɣa-woth-ya-ir Kɛ thok Ɣi-bɛ-ru lotdɛ ni ɣöö wi̱i̱ Ya-ir.. 42Kä cu No-bɛ̈k Kɛ-nat kɛnɛ wi̱i̱kɛ ka̱n, kä cuɛ kɛ cɔl kɛ ciötdɛ i̱, No-bɛ̈k.

Currently Selected:

Kuen 32: nusNHB

Highlight

Copy

Compare