Kuen 31
31
Ko̱r mi rɛl gɔɔydɛ rɔ kɛ ji̱ Mid-yan
1Kä cu Kuoth Nhial Muthɛ jiök i̱, 2“Col ji̱ I-thɛ-rɛl kä Mid-yan. Kɛ kɔrɛ bi cu li̱w.” 3Kä cu Kuoth Nhial Muthɛ jiök i̱, “A tha̱a̱ŋkun ka̱n kɛ yio̱w kööriɛn, akɛ wä nyiëëny kɛ ji̱ Mid-yan, akɛ wa Kuoth Nhial col kä ji̱ Mid-yan. 4A thok duëël ɔ jäk nɛy ti bathdɔɔr kä thuk duëli ji̱ I-thɛ-rɛl kɛ ɣöö bikɛ wä ko̱o̱r.” 5Kä cu nɛy ti bathdɔɔri wäl rɛw rɔ̱ rialikä kɛ ko̱r, nɛy ti bathdɔɔr thok duëëlɔ kä ji̱ I-thɛ-rɛl. 6Kä cu Muthɛ kɛ jäk kä ko̱o̱r, kɛɛl kɛ Pi-nɛ-ɣath gat Ɛl-a-dhar bo̱o̱th palä, mëë cu kuak ka̱n rɛy kɛmɛkä ro̱mä kɛ Kuoth Nhial, kɛ kaaŋ kɛ kui̱ läärä. Nɛy ti bathdɔɔr kɛl thok duëëlɔ. 7Kä cu kɛ wä nyiëëny kɛ ji̱ Mid-yan ce̱tkɛ min ci Kuoth Nhial ɛ la̱r Muthɛ, kä cuɛ wutni diaal näk. 8Kä cu kɛ kua̱r Mid-yan näk kɛɛl kɛ duɔth nath, Ɛwi kɛnɛ Rɛ-kɛm kɛ Dhur, kɛnɛ Ɣur, kɛ Rɛbä kua̱r ji̱ Mid-yan da̱ŋ dhieec. Kä cukɛ Bil-am gat Bɛ-or näk. 9Kä cu ji̱ I-thɛ-rɛl män Mid-yan pɛc kɛ gaatkiɛn. Kä cu kɛ ɣɔ̱ɔ̱kiɛn diaal kɛ det diaal kɛ kuak diaal pɛc. 10Kä cu kɛ wi̱i̱kiɛn diaal kɛ gua̱th tin ci kɛ pua̱t thi̱n waŋ kɛ mac. 11Kä cu kɛ pɛ̈ɛ̈c diaal ka̱n, naath kɛnɛ ley. 12Kä cu kɛ pɛ̈ɛ̈c diaal nöŋ Muthɛ kɛnɛ Ɛl-a-dhar bo̱o̱th palä, kɛ duɔl ji̱ I-thɛ-rɛl kɛɛliw, wec dɛɛkä Mo-ab kui̱ yiëër Jɔr-dɛn kä Jɛ-ri-ko.
Riet rɛ̈m kɛ rɔ
13Kä cu Muthɛ kɛnɛ Ɛl-a-dhar bo̱o̱th palä kɛ bööth dolä diaal wä raar wa kɛ lor jɔk wec. 14Kä cu Muthɛ gaak kɛ bööth rɛ̈m, bööth bathdɔɔri kɛnɛ bööth kuri, tëë bä ko̱o̱r. 15Kä cu Muthɛ kɛ jiök i̱, “Cia män diaal päl a tëk? 16Kä nɛ̈nɛ kɛ, kɛ kɛn män tëë guɔ̱ɔ̱rkɛ ruac Bil-am, kä jakɛ I-thɛ-rɛl kä loc jɔk kä Kuoth Nhial kɛ kui̱ kuɔth Pɛ-or, kä cu juey ben rɛy nɛɛni Kuɔth Nhial. 17Kɛ kui̱c ɛmɔ täämɛ na̱kɛ dhɔɔl kä gaatkiɛn, kä na̱kɛ män diaal tin ci tɔ̱ɔ̱c kɛ wutni. 18Kä pa̱lɛ nyier tin /ken tɔ̱ɔ̱c kɛ wutni ala nyinkun. 19Kä pua̱tdɛ raar jɔk wec kɛ ni̱n bärɔw. Kä nɛy tin ci naath näk kɛnɛ tin ci nɛy ti ci li̱w käp akɛ lakɛ rɔ amäni pɛ̈ɛ̈ckiɛn kɛ diɔ̱k ni̱ni kɛnɛ bärɔw ni̱ni. 20Kä lakɛ bieyni diaal, kɛ kuak tin la̱tkɛ kɛ guɔ̱p, kɛ tin la̱tkɛ kɛ miem böwni kɛ tin la̱tkɛ kɛ jiɛɛn.”
21Kä cu Ɛl-a-dhar bo̱o̱th palä nɛy tin ci wä ko̱o̱r jiök i̱, “Nɛmɛ ɛ ŋuɔ̱t in ci Kuoth Nhial ɛ la̱r Muthɛ. 22Bia päl ni da̱a̱p kɛnɛ ciɛk in bo̱r kɛ ciɛk in do̱l, kɛ ladiit kärɔ̱. 23Kä tin diaal tin dëë mac rut, la̱thɛ kɛ maac bikɛ cu gɔw. Kä ba kɛ lak bäkɛ pi̱ la̱k. Kä tin /ca mac dëë rut la̱thɛ kɛ rɛy pi̱i̱ni. 24Kä bi bi̱i̱du lak kɛ pi̱w kɛ bärɔw ni̱ni, kä bi cu gɔaa. Kä kɛ kɔrɛ bi cu ben wi̱c.”
Dääk pɛ̈ɛ̈cni
25Kä cu Kuoth Nhial Muthɛ jiök i̱, 26“Kuɛ̈nɛ pɛ̈ɛ̈c diaal, naath kɛnɛ ley yɛnɛ Ɛl-a-dhar bo̱o̱th palä kɛ bööth dho̱ri ji̱ I-thɛ-rɛl. 27Kä da̱a̱kɛ pɛ̈ɛ̈c kä pek rɛw, kam nɛɛni tin ci wä ko̱o̱r kɛnɛ duɔl kɛɛliw. 28Moc Kuoth Nhial tho̱lbo̱k kä nɛy diaal tin ci wä ko̱o̱r, käni kɛl kä kur dhieec pɛ̈ɛ̈cni, kä naath, kɛ ɣɔ̱k kɛ muɔ̱li, kɛnɛ det. 29Kä käm nikɛ Ɛl-a-dhar bo̱o̱th palä ala muc Kuɔth Nhial. 30Kä kɛ kui̱ dolä ji̱ I-thɛ-rɛl, käni kɛl kä jiɛɛn dhieec, kä naath kɛnɛ ɣɔ̱k kɛ muɔ̱li kɛnɛ det ala tho̱lbo̱k, kä bikɛ ka̱m ji̱ Lii-bay tin guɛckɛ kɛmɛkä Kuɔth Nhial.” 31Kä cu Muthɛ kɛnɛ Ɛl-a-dhar bo̱o̱th palä jɛ la̱t ce̱tnikɛ min ci Kuoth Nhial ɛ la̱r Muthɛ.
32Kä pɛ̈ɛ̈c tëë ca pɛc ɛ nɛy tëë ci wä ko̱o̱r. Kɛ Det ti bathdɔɔri ti kur bäkɛl wi̱cdɛ jiɛɛn bärɔw wi̱cdɛ dhieec. 33Kɛ ɣɔ̱k ti bathdɔɔri ti jiɛɛn bärɔw wi̱cdɛ rɛw. 34Kɛ muɔ̱li ti bathdɔɔri ti jiɛɛn bäkɛl wi̱cdɛ kɛl. 35Kɛ män ti bathdɔɔri ti jiɛɛn diɔ̱k wi̱cdɛ rɛw ti /ken met tɔ̱ɔ̱c kɛ wutni. 36Kä cu kui̱c nɛɛni tëë ci wä ko̱o̱r a det ti bathdɔɔri ti kur diɔ̱k wi̱cdɛ jiɛɛn diɔ̱k wi̱cdɛ bärɔw wi̱cdɛ kur dhieec. 37Kä cu tho̱lbo̱k Kuɔth Nhial a det ti kur bäkɛl wi̱cdɛ jiɛɛn bärɔw wi̱cdɛ dhieec. 38Kä cu ɣɔ̱k a bathdɔɔri ti jiɛɛn diɔ̱k wi̱cdɛ bärɔw, kä cu tho̱lbo̱k Kuɔth Nhial ɛ jiɛɛn bärɔw wi̱cdɛ rɛw. 39Kä cu muɔ̱li a bathdɔɔri ti jiɛɛn diɔ̱k, kä cu tho̱lbo̱k Kuɔth Nhial a jiɛɛn bäkɛl wi̱cdɛ kɛl. 40Kä cu naath a bathdɔɔri wäl bäkɛl, kä cu tho̱lbo̱k Kuɔth Nhial a nɛy ti jiɛɛn diɔ̱k wi̱cdɛ rɛw. 41Kä cu Muthɛ tho̱lbo̱k in ca thöp Kuoth Nhial ka̱m Ɛl-a-dhar bo̱o̱th palä, ce̱tnikɛ mëë ci Kuoth Nhial ɛ la̱r jɛ.
42Kä pek ji̱ I-thɛ-rɛl ëë ci Muthɛ jɛ la̱th go̱lä kä pek nɛɛni tëë ci wä ko̱o̱r. 43(Cu kui̱ dolä a bathdɔɔri ti kur diɔ̱k wi̱cdɛ jiɛɛn duëlu wi̱cdɛ bärɔw, wi̱cdɛ kur dhieec kä det. 44Kɛ ɣɔ̱k ti bathdɔɔri ti jiɛɛn diɔ̱k wi̱cdɛ bäkɛl. 45Kɛ muɔ̱li ti bathdɔɔri ti jiɛɛn diɔ̱k wi̱cdɛ kur dhieec. 46Kɛ nɛy ti bathdɔɔri wäl bäkɛl.) 47Kä pek dolä ji̱ I-thɛ-rɛl cu Muthɛ kɛl ka̱n kä jiɛɛn dhieecni nath kɛnɛ ley, kä cuɛ kɛ ka̱m ji̱ Lii-bay tin guɛckɛ kɛmɛkä ro̱mä kɛ Kuoth Nhial. Ce̱tnikɛ mëë ci Kuoth Nhial ɛ la̱r Muthɛ.
48Kä cu bööth tëë te wi̱i̱ bathdɔɔri rɛ̈m, bööth bathdɔɔri kɛnɛ bööth kuri ben kä Muthɛ. 49Kä cukɛ jɛ jiök i̱, “Ca̱kɔ nɛy tin bo̱o̱th nɛɛkɛ kuɛn kä thilɛ ram mi ci dueer kä kɔ. 50Kä ca̱kɔ Kuoth Nhial nöŋ muc, da̱a̱p kɛ ciik tin bo̱o̱r kɛ kuat ŋua̱a̱k. Kɛ ciik yɛtni, kɛnɛ ciik ji̱thni, kɛ tiɛk ti luɛl nɛy kɛ rɔ nhiam Kuɔth Nhial.” 51Kä cu Muthɛ kɛnɛ Ɛl-a-dhar bo̱o̱th palä da̱a̱p ka̱n kä kɛ, kɛ tin diaal tin ca la̱t. 52Kä cu Muthɛ kɛnɛ Ɛl-a-dhar da̱a̱p thöp Kuoth Nhial ala muc mi theemdɛ bathdɔɔri wäl bäkɛl wi̱cdɛ kur bärɔw wi̱cdɛ yio̱w ti jiɛɛn dhieec. 53(Kä cu ji̱ ko̱o̱r rɔ moc pɛ̈ɛ̈c ti ŋuan.) 54Kä cu Muthɛ kɛnɛ Ɛl-a-dhar da̱a̱p ka̱n tetni bööthni bathdɔɔri kɛnɛ kur kä cua naŋ rɛy kɛmɛkä Kuoth Nhial, ala mi tiɛmkɛ ji̱ I-thɛ-rɛl nhiam Kuɔth Nhial.
Currently Selected:
Kuen 31: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
