Kuen 29
29
Muc ca̱ŋ ŋarä tuk runä
(Liib 23:23-25)
1“Kɛ cäŋ kä kɛl kä pay bärɔw bia tekɛ duɔl mi rɛl gɔɔydɛ rɔ. Kä thilɛ la̱t mi bia la̱t. Ɛ cäŋ mi bia koth ni kaaŋ. 2Kä bia tho̱p ni muc tin waŋkɛ, ala ŋuäny mi gɔaa kä Kuoth Nhial. Ruath tha̱a̱k, kɛ ruath dɛ̈ɛ̈l böwä kɛl, kɛ dɛy rɔɔmni da̱ŋ bärɔw ti gur kɛli kä thilɛ kɛ diw. 3Bikɛ thöp kɛɛl kɛ nup mi ko̱k ko̱k kä ca lia̱a̱p kɛ liɛɛth, diɔ̱ɔ̱k wäli lirä nuɔ̱p kɛ thäk, kɛ rɛw wäli lirä nuɔ̱p kɛ ruath dɛ̈ɛ̈l böwä, 4kɛ wäl wäli lirä nuɔ̱p kɛ dɛy rɔɔmni da̱ŋ bärɔw. 5Kɛ thäk dɛ̈ɛ̈l böwä kɛ kui̱ dui̱rä, mi luɛli rɔ. 6Bikɛ thöp kɛ gëk mucä runä, kɛ muc bɛɛlkɛ, kɛnɛ muc ciɛŋä tin wen kɛ muc bɛɛlkɛ, kɛ kɔaŋdiɛn, ce̱tkɛ ŋuɔ̱tkɛ, ala ŋuäny mi gɔaa kä Kuoth Nhial.”
Muc ca̱ŋ luël
(Liib 23:26-32)
7“Kä kɛ cäŋ kä wäl kä pay bärɔw bia tekɛ duɔl mi rɛl gɔɔydɛ rɔ, kä bia rɔ lëy Kuoth. Kä thilɛ la̱t mi bia la̱t. 8Kä tho̱p ni Kuoth Nhial muc in waŋkɛ, ala ŋuäny mi gɔaa. Ruath tha̱a̱k, kɛ ruath dɛ̈ɛ̈l böwä kɛl, kɛ dɛy rɔɔmni da̱ŋ bärɔw ti gur kɛli. Kä akɛ thil diw. 9Kɛɛl kɛ nup mi ko̱k ko̱k mi ca lia̱a̱p kɛ liɛɛth, bi diɔ̱ɔ̱k wäli lirä thöp kɛɛl kɛ thäk, kɛ rɛw wäli lieeri thöp kɛɛl kɛ ruath dɛ̈ɛ̈l böwä. 10Kɛ wäl wäli kɛɛl kɛ dɛy rɔɔmni da̱ŋ bärɔw. 11Kä bi thäk dɛ̈ɛ̈l böwä thöp bäkɛ kui̱ dui̱rä, kɛ gëk mucä dui̱rä luel, kɛ muc ciɛŋä min wen in la waŋkɛ kɛ muc bɛɛlkɛ, kɛ kɔaŋdɛ.”
Muc ca̱ŋ ŋarä bi̱lɛkä
(Liib 23:33-44)
12“Kɛ cäŋ kä wäl dhieec kä pay bärɔw bia tekɛ duɔl mi rɛl gɔɔydɛ rɔ. Kä thilɛ la̱t mi bia la̱t, kä bia ŋar ŋar Kuoth Nhial kɛ ni̱n bärɔw. 13Kä bia thöp ni muc tin waŋkɛ kɛ mac, ala ŋuäny mi gɔaa kä Kuoth Nhial, rueeth thääkni da̱ŋ wäl diɔ̱k kɛ rueeth deet böwni da̱ŋ rɛw, kɛ dɛy rɔɔmni da̱ŋ wäl ŋuaan ti gur kɛli, kä thilɛ kɛ diw. 14Kɛɛl kɛ muc bɛɛl ti ca lia̱a̱p kɛ liɛɛth, bi diɔ̱ɔ̱k wäli lieeri nuɔ̱p thöp kɛɛl kɛ thäk kɛl kä thääk da̱ŋ wäl diɔ̱k, kɛ rɛw wäli lieeri nuɔ̱p kɛɛl kɛ ruath dɛ̈ɛ̈l böwä kɛl. 15Kɛ wäl wäli nuɔ̱p kɛɛl kɛ kɛl kä dɛy rɔɔmni da̱ŋ wäl ŋuaan. 16Kä bi thäk dɛ̈ɛ̈l böwä thöp ala muc dui̱rä kɛ gëk mucä ciɛŋä min wen min la waŋkɛ kɛnɛ muc bɛɛlkɛ kɛ kɔaŋdɛ.
17“Kɛ cäŋ in rɛwdɛ, bi thääk wäl rɛw kɛ rueeth deet böwni da̱ŋ rɛw kɛ dɛy rɔɔmni da̱ŋ wäl ŋuaan ti gur kɛli kä thil diw thöp, 18kɛɛl kɛ muc bɛɛl kɛnɛ kɔaŋ kɛ thäk kɛl. Biɛ lät kä ruath dɛ̈ɛ̈l kɛnɛ dɛy rɔɔmni bikɛ thöp ce̱tkɛ pekdiɛn. 19Kä bi thäk dɛ̈ɛ̈l böwä thöp kɛ kui̱ dui̱rä kɛ gëk mucä min wen in la waŋkɛ kɛnɛ muc bɛɛl kɛ kɔaŋ.
20“Kɛ diɔ̱ɔ̱k ni̱ni bi thääk wäl kɛl kɛ rueeth deet da̱ŋ rɛw kɛ dɛy rɔɔmni da̱ŋ wäl ŋuaan ti gur kɛli kä thilɛ kɛ diw thöp, 21kɛɛl kɛ muc bɛɛl kɛnɛ kɔaŋ kɛ thäk, kɛ ruath dɛ̈ɛ̈l, kɛ dɛy rɔɔmni thöp ce̱tkɛ pekdiɛn. 22Kä bi thäk dɛ̈ɛ̈l böwä thöp bäkɛ kui̱ dui̱rä kɛ gëk mucä min wen in la waŋkɛ kɛ muc bɛɛl kɛnɛ kɔaŋ.
23“Kä kɛ ŋuaan ni̱ni bi thääk wäl kɛ rueeth deet rɛw, kɛ dɛy rɔɔmni da̱ŋ wäl ŋuaan ti gur kɛli kä thil diw thöp. 24Kɛɛl kɛ muc bɛɛl kɛ kɔaŋ kɛ thäk kɛl, kɛ ruath dɛ̈ɛ̈l, kɛ dɛy rɔɔmni ce̱tnikɛ pekdiɛn. 25Kä bi thäk dɛ̈ɛ̈l böwä thöp bäkɛ kui̱ dui̱rä kɛ gëk mucä min wen in la waŋkɛ kɛ muc bɛɛl kɛnɛ kɔaŋ.
26“Kä kɛ dhieec ni̱ni bi thääk bäŋuan, kɛ rueeth deet rɛw, kɛ dɛy rɔɔmni da̱ŋ wäl ŋuaan ti gur kɛli kä thil diw, 27thöp kɛɛl kɛ muc bɛɛl kɛ kɔaŋ kɛ thäk kɛl, kɛnɛ ruath dɛ̈ɛ̈l, kɛ dɛy rɔɔmni ce̱tnikɛ pekdiɛn. 28Kä bi thäk dɛ̈ɛ̈l böwä thöp kɛ kui̱ dui̱rä gekä mucä min wen in la waŋkɛ kɛ muc bɛɛl kɛnɛ kɔaŋ.
29“Kɛ bäkɛl ni̱ni bi thääk bädäk, kɛ rueeth deet rɛw kɛ dɛy rɔɔmni da̱ŋ wäl ŋuaan ti gur kɛli kä thil diw, 30thöp kɛɛl kɛ muc tha̱a̱k kɛ muc bɛɛl kɛ kɔaŋ, kɛ ruath dɛ̈ɛ̈l, kɛ dɛy rɔɔmni ce̱tnikɛ pekdiɛn. 31Kä bi thäk dɛ̈ɛ̈l böwä thöp bä ala muc dui̱rä, kɛ gëk mucä min wen in la waŋkɛ kɛ muc bɛɛl kɛ kɔaŋ.
32“Kɛ bärɔw ni̱ni bi thääk bärɔw, kɛ rueeth deet rɛw, kɛ dɛy rɔɔmni da̱ŋ wäl ŋuaan ti gur kɛli kä thil diw, 33thöp kɛɛl kɛ thäk kɛl kɛ muc bɛɛl, kɛ ruath dɛ̈ɛ̈l kɛ dɛy rɔɔmni ce̱tnikɛ pekdiɛn. 34Kä bi thäk dɛ̈ɛ̈l böwä thöp ala muc dui̱rä kɛ gëk mucä min wen in la waŋkɛ kɛ muc bɛɛl kɛ kɔaŋ.
35“Kɛ bädäk ni̱ni bia tekɛ duɔl mi rɛl gɔɔydɛ rɔ. Kä thilɛ la̱t mi bia la̱t. 36Kä bia thöp ni muc in waŋkɛ kɛ mac, ala ŋuäny mi gɔaa kä Kuoth Nhial. Bia thöp ni thäk kɛnɛ ruath dɛ̈ɛ̈l kɛ dɛy rɔɔmni da̱ŋ bärɔw ti gur kɛl kä thil diw. 37Kɛɛl kɛ muc bɛɛl kɛnɛ kɔaŋ kɛ thäk, kɛ ruath dɛ̈ɛ̈l, kɛ dɛy rɔɔmni ce̱tnikɛ pekdiɛn. 38Kä bi thäk dɛ̈ɛ̈l böwä thöp bä ala muc dui̱rä, kɛ gëk mucä min wen in la waŋkɛ kɛ muc bɛɛl kɛ kɔaŋ.
39“Kɛn ti̱ti̱ bia kɛ thöp Kuoth Nhial kɛ gua̱thdiɛn, kä bia kɛ mat kɛ muc yäcädun, kɛnɛ muc tɛthkä lɔacdun, ala mucdun in waŋkɛ kɛ muc bɛɛlkun, kɛ muc nyuaakädun.”
40Kä cu Muthɛ ji̱ I-thɛ-rɛl la̱t ti diaal ce̱tnikɛ min ci Kuoth Nhial ɛ la̱r jɛ.
Currently Selected:
Kuen 29: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
