Kuen 21
21
Juc Kɛ-naan
1Kä mëë ci Kɛ-naan kuäär Ä-radh min cieŋ kä Nɛ-gɛb ɛ liŋ i̱, bä ji̱ I-thɛ-rɛl kɛ duɔ̱ɔ̱p Ä-ta-rim, cuɛ nyiëëny kɛ kɛ, kä cuɛ tha̱a̱ŋkiɛn käp ala pɛ̈ɛ̈c. 2Kä cu ji̱ I-thɛ-rɛl rɔ ya̱c Kuoth Nhial wä kɛ i̱, “Mi deri nɛy ti̱ti̱ la̱th tetkäda, kɔn dëë kɔ wi̱i̱kiɛn da̱k ni piny.” 3Kä cu Kuoth Nhial jɔw ji̱ I-thɛ-rɛl liŋ, kä cuɛ ji̱ Kɛ-naan la̱th tetädiɛn. Kä cukɛ kɛ da̱k ni piny amäni wi̱i̱kiɛn. Kä cua gua̱th ɛmɔ cɔl i̱ Ɣɔr-ma.#21:3 Ɣɔr-ma Lotdɛ ni ɣöö däk.
Thɔ̱l mi ca la̱t kɛ yiëëth in do̱l
4Kä cukɛ jiɛɛn Pääm Ɣor wäkɛ Bar Gutdä gɔ̱a̱lkɛ mun ji̱ Ɛ-dɔm. Kä cu naath thil päl lɔaac piny dup. 5Kä cu naath ruac a jiäk kɛ Kuoth kɛnɛ Muthɛ wäkɛ i̱, “Ɛŋu no̱o̱ŋi nɛy raar kä I-jëp ɔ kɛ ɣöö ba̱kɔ ben li̱w rɛy dɔaar ɔ? Kä thilɛ mi̱eth kä thilɛ pi̱w, kä ci nɛy ŋɔ̱a̱ŋ kɛn mi̱eth ɛ jiäk ɛ mi.” 6Kä cu Kuoth Nhial thɔ̱ɔ̱l ti na̱kɛ naath luɔny rɛy nath, cukɛ naath cam, cu nɛy ti ŋuan li̱w kä ji̱ I-thɛ-rɛl. 7Kä cu naath ben kä Muthɛ wäkɛ i̱, “Ca̱kɔ duer kɛ ɣöö ca̱kɔ ruac a jiäk kɛ Kuoth Nhial kɛnɛ ji̱. Pal Kuoth Nhial kɛ ɣöö bɛ thɔ̱ɔ̱l woc kä nɛy.” Kä cu Muthɛ pal kɛ kui̱ nath. 8Kä cu Kuoth Nhial Muthɛ jiök i̱, “Lätni thɔ̱l, kä läthni jɛ ri̱kä. Kä ram mi ca kac ɛ thɔ̱l bɛ jɛ guic kä bɛ cu tëk.” 9Kä cu Muthɛ thɔ̱l la̱t kɛ yiëëth in do̱l, kä cuɛ jɛ la̱th ri̱kä. Mi ca raan kac ɛ thɔ̱l, bɛ thɔ̱l cikä min do̱l guic kä bɛ cu tëk.
Ɣöth nath kä Mo-ab
10Kä cu ji̱ I-thɛ-rɛl ɣöth, cukɛ ben pua̱t kä O-bot. 11Kä cukɛ jiɛɛn kä O-bot cukɛ ben pua̱t kä Iye-ä-ba-rim rɛy dɔaar min lot ni Mo-ab kui̱ käny ca̱ŋ. 12Kä cukɛ jiɛɛn thi̱n cukɛ ben pua̱t rɛy lo̱o̱lä Dha-rɛd. 13Kä cukɛ ɣöth thi̱n cukɛ ben pua̱t kui̱ Ar-non rɛy dɔaar in wä këth ji̱ Ɛ-mor. Kɛ ɣöö ɛn Ar-non ɛ wec Mo-ab, mi te kam Mo-ab kɛnɛ Ɛ-mor. 14Ɛ jɛn min lat bok ko̱o̱r Kuɔth Nhial i̱,
“Wa-ɣeb tëë kä Thupaa,
kɛnɛ löli Ar-non
15kä tɔ̱ɔ̱r löli wëë kä Ar,
kä wëë rɔ thi̱eŋ ni këth Mo-ab.”
16Kä cukɛ jiɛɛn ɛn wi̱ni cukɛ ben kä Bëër, min la jiw ëë jio̱k Kuoth Nhial Muthɛ thi̱n i̱, “Mat naath guäth kɛl, bäkɛ moc pi̱w.” 17Kä cu ji̱ I-thɛ-rɛl dit ɛmɛ kɛt i̱,
“Ɛ pi̱ku lo̱ny lö jiw!
(Ba ji̱ ket dit!)
18Jiw ëë tɛ̈tkɛ ɛ bööth naath,
mëë tɛ̈tkɛ ɛ nɛy tin gɔw,
mëë tɛ̈tkɛ kɛ kɛtni, kɛnɛ to̱ŋ.”
Kä cukɛ jiɛɛn rɛy dɔaar wäkɛ kä Ma-ta-naa. 19Kä cukɛ jiɛɛn kä Na-ɣä-li-el wäkɛ kä Na-ɣä-li-el, kä cukɛ jɛ rɛ̈t piny wäkɛ kä Ba-mot. 20Kä cukɛ jiɛɛn kä Ba-mot wäkɛ rɛy lo̱o̱lä mi te kä Mo-ab nhial Pi̱dh-ga min guic ni rɛy dɔar.
Juc Thi-yon kɛnɛ Ög
(Ŋuɔ̱t 2:26—3:11)
21Kä cu ji̱ I-thɛ-rɛl naath jäk kä Thi-yon kuäär ji̱ Ɛ-mor wee i̱, 22“Jakni nɛy kä wä kɛ wecdu. /Ca̱kɔ bi wä kɛ rɛy kakä kiɛ kak wal kɛ kui̱ kɔaŋ. Ba̱kɔ luk ni rɛy duɔ̱p kua̱r in di̱i̱t, amäni mi ca̱kɔ wecdu bäl.” 23Duundɛ ɣöö /ken Thi-yon ji̱ I-thɛ-rɛl nhök wä kɛ rɛy wecdɛ. Cuɛ ma̱a̱t ni nɛɛkɛ diaal, cuɛ wä nyiëëny kɛ ji̱ I-thɛ-rɛl rɛy dɔaar kä Yaadh. 24Kä cu ji̱ I-thɛ-rɛl ɛ näk, kä cukɛ wecdɛ ka̱n a känɛ ni kä Ar-non cu mäni Ya-bɔk, a räth ni kä A-mon kɛ ɣöö keydiɛn bumɛ. 25Kä cu ji̱ I-thɛ-rɛl kɛn wi̱i̱ tɔ̱ diaal ɛ tɔ̱ ka̱n. Kä cukɛ wi̱i̱ ji̱ Ɛ-mor diaal ciɛŋ Ɛc-bon kɛnɛ wi̱i̱kɛ diaal. 26Kä ɛn Ɛc-bon ɛ wec Thi-yon kuäär ji̱ Ɛ-mor, mëë ci kɔn nyiëëny kɛ kuäär Mo-ab ëë nhiam, kä cuɛ wi̱i̱kɛ diaal ka̱n kä jɛ, cu mäni Ar-non. 27Kɛ kui̱c ɛmɔ cu cääk tuaari wee i̱,
“Bia kä Ɛc-bon a jɛ nyɔakɛ
kɛ ta̱th,
ɛ wec Thi-yon luɔ̱ckɛ jɔk.
28Kɛ ɣöö ci mac wä raar
kä Ɛc-bon,
bo̱l maac wec Thi-yon.
Cɛ wec ji̱ Mo-ab ni Ar pɛt,
kuäär wec päämni Ar-non.
29Riɛk akɛ ji̱ lö Mo-ab!
Ca yɛ däk lö ji̱ Kɛ-moc!
Cɛ gaatkɛ jak kä barkɛ rɔ,
kä cɛ nyieekɛ jak kä pɛ̈ɛ̈c
Thi-yon kuäär ji̱ Ɛ-mor.
30Duundɛ ɣöö ca̱kɔ kɛ näk,
ca̱kɔ Ɛc-bon däk a räth
ni kä Di-bon.
Kä ca̱kɔ kɛ däk amäni Me-dɛ-ba.”
31Inɔ cu ji̱ I-thɛ-rɛl cieŋ muun ji̱ Ɛ-mor. 32Kä cu Muthɛ nɛy ti wa Ya-dhɛr lim ja̱k. Kä cukɛ jɛ wä ka̱n kɛnɛ wi̱i̱kɛ, kä cukɛ ji̱ Ɛ-mor tin cieŋ thi̱n juɔc raar. 33Kä cukɛ rɔ ri̱t wäkɛ dup Ba-can. Kä cu kuäär Ba-can ni Ög ben kɛnɛ nɛɛkɛ diaal, wäkɛ nyiëëny kɛ ji̱ I-thɛ-rɛl kä Ɛ-dhɛ-ri. 34Duundɛ ɣöö cu Kuoth Nhial Muthɛ jiök i̱, “/Cu dual kɛ jɛ. Kɛ ɣöö cä la̱th tetädu, kɛnɛ nɛɛkɛ diaal nikɛ mundɛ. Kä lätni jɛ min ci lät kä Thi-yon kuäär ji̱ Ɛ-mor mëë cieŋ kä Ɛc-bon.” 35Inɔ cukɛ jɛ näk, kɛnɛ gaatkɛ, kɛ nɛɛkɛ diaal, amäni mëë cuɛ thilɛ ram kɛl mi cu duɔth a tëk kä jɛ. Kä cukɛ wecdɛ ciɛŋ.
Currently Selected:
Kuen 21: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
