Kuen 22
22
Ciöt Ba-lak kɛ Bil-am
1Kä cu ji̱ I-thɛ-rɛl ɣöth, cukɛ ben pua̱t rɛy tɔ̱ɔ̱rä Mo-ab kui̱ kiɛɛr Jɔr-dɛn kä Jɛ-ri-ko. 2Kä ci Ba-lak gat Dhi-por tëë diaal tëë ci ji̱ I-thɛ-rɛl kɛ lät kä ji̱ Ɛ-mor nɛn. 3Kä cu ji̱ Mo-ab dual ɛlɔ̱ŋ kɛ ji̱ I-thɛ-rɛl, kɛ ɣöö ŋuankɛ. Cukɛ dual ɛlɔ̱ŋ kɛ kɛ. 4Kä cu ji̱ Mo-ab bööth Mid-yan jiök i̱, “Kɛn nɛy ti̱ti̱ täämɛ ba tin diaal tin te gekädan thuk ɛ kɛn, ce̱tkɛ min la thäk wal a cam.” Inɔ cu Ba-lak gat Dhi-por mëë la kuäär Mo-ab ɛn guäth ëë, 5naath jäk kä Bil-am gat Bɛ-or kä Pɛ-tur, min thiek kɛ yier Yu-pɛ-ree-tidh muun ɛmɔ wee i̱, “Nɛnɛ, ci naath ben raar kä I-jëp. Kä ca wi̱c muɔ̱ɔ̱n kum ɛ kɛn kä cieŋkɛ lotädä. 6Bër ɛn täämɛ bi kɛn nɛy ti̱ti̱ ben lam, kɛ ɣöö bum nikɛn kä ɣä. Kä dɔ̱ŋ dëë kɛ luäŋ kɛ mi juɔcä kɛ, a bäkɛ juɔc raar wi̱c. Kɛ ɣöö ŋa̱cä jɛ i̱ nɛy ti ci poth cakɛ poth, kä nɛy ti ci lam cakɛ lam.”
7Kä cu bööth Mo-ab kɛnɛ bööth Mid-yan däk piny a te tetkiɛn kɛ yio̱w ti ba wä ka̱m ti̱et. Kä cukɛ ben kä Bil-am cua ben la̱t ruac Ba-lak. 8Kä cu Bil-am kɛ jiök i̱, “Niɛnɛ wa̱nɛ ɛn wääri nɛmɛ, kä bä yɛ luɔ̱c thok, ce̱tnikɛ mɔ bi Kuoth Nhial ɛ la̱t ɣä mɔ.” Kä cu bööth Mo-ab te kɛɛl kɛ jɛ. 9Kä cu Kuoth Bil-am ben jiök i̱, “Kɛ ŋaani kɛn nɛy tɔ̱tɔ̱?” 10Kä cu Bil-am Kuoth loc i̱, “Kɛ nɛy ti ci Ba-lak gat Dhi-por kɛ jäk kä ɣä wee i̱, 11‘Nɛnɛ ci naath ben raar kä I-jëp, kä ca wi̱c muɔ̱ɔ̱n kum. Bër ɛn täämɛ bikɛ ben la̱m ɣä. Dɔ̱ŋ dëë ko̱riɛn luäŋ a bäkɛ juɔc raar.’ ” 12Kä cu Kuoth Bil-am jiök i̱, “/Ci bi wä kɛɛl kɛ kɛ. Kä /Ci naath bi lam kɛ ɣöö cakɛ poth.” 13Kä cu Bil-am keer kɛ runwaŋ. Kä cuɛ bööth Ba-lak jiök i̱, “Wiaa muundun, kɛ ɣöö ci Kuoth Nhial ɣä pen wä kɛɛl kɛ yɛ.” 14Kä cu bööth Mo-ab wä, cua Ba-lak wä jiök i̱, “/Ci Bil-am ben lo̱k kɛɛl kɛ nɛy.”
15Kä cu Ba-lak bööth ti ŋuan nikɛn kä tekɛ luth kä nɛy tëë nhiam nyɔk kɛ jäkni. 16Kä cukɛ Bil-am ben jiök i̱, “Nɛmɛ ɛ min ci Ba-lak gat Dhi-por jɛ lar i̱, ‘A thil mi pen ji̱ ben kä ɣä, 17kɛ ɣöö bä ji̱ la̱t a gɔaa, kä mɔ bi la̱r ɣä mɔ bä la̱t. Ber läm ni ɣä nɛy ti̱ti̱.’ ” 18Duundɛ ɣöö cu Bil-am kɛ loc wee i̱, “A cäŋ bi Ba-lak ɣä ka̱m dhɔrɛ a thiäŋ kɛ ciɛk in bo̱r, kɛnɛ da̱a̱p, /cä luek Kuɔth Nhial Kuothdä dëë bäl, a bä mi tɔt kiɛ mi di̱i̱t wä la̱t. 19Kä täämɛ kua niɛn ɛn wääri ce̱tkɛ mëë ca la̱t ɛ nɛy te nhiam, kä bä mɔ bi Kuoth Nhial ɛ lɛ la̱r ɣä mɔ lɛ jek.” 20Kä cu Kuoth ben kä Bil-am kɛ wäär jiökɛ jɛ i̱, “Mi bä nɛy tɔ̱tɔ̱ ben cɔl ni ji̱, jiɛc rɔ, wër kɛɛl kɛ kɛ. Duundɛ ɣöö lätni ni min cä la̱r ji̱ kärɔa.”
Bil-am kɛnɛ muulɛ
21Kä cu Bil-am keer kɛ runwaŋ kä cuɛ muulɛ rialikä kä cuɛ wä kɛnɛ bööth Mo-ab. 22Duundɛ ɣöö gak Kuoth kɛ ɣöö cɛ wä. Kä cu jääk Kuɔth Nhial cuɔ̱ŋ dupdɛ. Kä jɛn tëë jɔk muɔ̱lɛ, kä te la̱a̱tkɛ da̱ŋ rɛw kɛɛl kɛ jɛ. 23Kä cu muul jääk Kuɔth Nhial nɛn cuŋä dup kɛ thɛp tetädɛ. Kä cu muul ciɛc dup, cuɛ wä kɛ rɛy dɔar. Kä cu Bil-am muul yɔ̱t kɛ ɣöö bɛ loc dup. 24Kä cu jääk Kuɔth Nhial wä cuɔ̱ŋ dup mi ciw ciw kam ka̱a̱kni wal kɛ kui̱ kɔaŋ da̱ŋ rɛw ti tekɛ pa̱nyni. 25Kä min ci muul jääk Kuɔth Nhial nɛn cuɛ rɔ ti̱ec puɔ̱ny pa̱ny, cuɛ ciök Bil-am yieny puɔ̱ny pa̱ny. Kä cu Bil-am ɛ nyɔk kɛ yɔ̱a̱t. 26Kä cu jääk Kuɔth Nhial wä nhiam, kä cuɛ wä cuɔ̱ŋ guäth mi ril ril, mi thil gua̱a̱th mi deri rɔ riet thi̱n. 27Kä min ci muul jääk Kuɔth Nhial nɛn cuɛ tɔ̱ɔ̱c. Kä cu Bil-am kɛ̈c, kä cuɛ mul yɔ̱t kɛ kɛɛt. 28Kä cu Kuoth Nhial thok muɔ̱l lɛp, kä cuɛ Bil-am jiök i̱, “Ɛŋu mi cä lät kä ji̱, mɔ ci ɣä duäc ni kä diɔ̱ɔ̱k ɔ?” 29Kä cu Bil-am muul loc i̱, “Ɛ ɣöö ci ɣä jak kä dɔ̱a̱r. Ɣän cä go̱r ni mi te tetdä kɛ mut, dëë ji̱ näk.” 30Kä cu muul Bil-am jiök i̱, “/Ciɛ ɣän muulu, min la ko̱tdi jɔkdä teekädu kɛɛliw ni wal cu mäni walɛ? Ɛ mi la la̱tdä kä ji̱ ɛn nɔmɔ?” Kä cu Bil-am ɛ loc i̱, “Eey.”
31Kä cu Kuoth Nhial waŋ Bil-am lɛp, kä cuɛ jääk Kuɔth Nhial nɛn tëë cuŋä dup, kɛ thɛp mi te tetädɛ. Kä cu Bil-am rɔ ka̱m mua̱a̱l kä cuɛ rɔ goŋ. 32Kä cu jääk Kuɔth Nhial ɛ jiök i̱, “Ɛŋu ci muulu duäc ni kä diɔ̱ɔ̱k ɔ? Kä nɛnɛ, ɣän ci ben gɛw wa̱nɛ mi, kɛ ɣöö ja̱lu jiäkɛ nhiamdä. 33Kä muul cɛ ɣä nɛn kä cɛ ciɛc nhiamdä kä diɔ̱ɔ̱k. Duŋ mi /kenɛ cɛc kä ɣä, ɛn täämɛ ce̱t cä ji̱ näk, kä dëë jɛ päl a tëk.” 34Kä cu Bil-am jääk Kuɔth Nhial jiök i̱, “Ɣän cä duer, kɛ ɣöö ɣän kuecä jɛ ti̱i̱ cuŋä dupdä gɛɛwi ɣä. Kä täämɛ mi ci lɔcdu jiäk bä loc jɔk.” 35Kä cu jääk Kuɔth Nhial Bil-am jiök i̱, “Wër kɛɛl kɛ nɛy tɔ̱tɔ̱. Duundɛ ɣöö bi lat ni ruac in bä la̱r ji̱ kärɔa.” Kä cu Bil-am wä kɛɛl kɛ bööth Ba-lak.
Bil-am kɛnɛ Ba-lak
36Kä min ci Ba-lak ɛ liŋ i̱ ci Bil-am ben, cuɛ jɛ wä lor därwec Mo-ab këth Ar-non, ni pek ciëŋdɛ. 37Kä cu Ba-lak Bil-am jiök i̱, “Ɣän /ka̱n ji̱ jäk kä raan? Kuɛ la ŋu /keni ben kä ɣä mɔ? A /ci ɣän ji̱ dëë ku luäŋ kɛ cul duɔ̱ɔ̱r?” 38Kä cu Bil-am Ba-lak jiök i̱, “Ɣän ci ben kä ji̱ mi! Kä ɣän ta̱a̱ kɛ buɔ̱m mi dëë ruac kɛ ɣä ɛn täämɛ? Bä lat ni ruac in bi Kuoth Nhial ɛ la̱r ɣä.” 39Kä cu Bil-am wä kɛɛl kɛnɛ Ba-lak, cukɛ ben kä Kir-yath-u-dhoth. 40Kä cu Ba-lak thääk kɛnɛ rɔɔm thöp ala muc, kä cuɛ Bil-am kɛnɛ bööth tin te kɛɛl kɛ jɛ jäk ikä.
Ruac go̱o̱kä Bil-am in nhiam
41Mëë ruɔ̱ndɛ cu Ba-lak Bil-am ka̱n kä cuɛ jɛ nööŋ kä Ba-moth-baal. Ɛn wi̱ni cuɛ nɛy tin thia̱k nɛn.
Currently Selected:
Kuen 22: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
