Kuen 18

Lät bööthni palä kɛnɛ ji̱ Lii-bay

1Kä cu Kuoth Nhial Ä-ron jiök i̱, “Ji̱n yɛnɛ gaatku kɛ dhɔr guur bia tekɛ riɛk kɛ kui̱ kuethni luaak Kuɔth. Kä yɛnɛ gaatku bia tekɛ riɛk kuethni bo̱o̱thä palä. 2Kä no̱o̱ŋni gaatmuɔɔr ji̱ thuɔk duëël Lii-bay kɛ ji̱ kɛɛl bä, amäni thok duëël guur bɛ rɔ ma̱t yɛ, ba yɛ ku lɛ lätikä min lät yɛn nhiam kɛmɛkä ro̱mä kɛ Kuoth Nhial. 3Kä ba ji̱ lätikä, kɛnɛ riali lätni kɛmɛkä ro̱mä kɛ Kuoth Nhial diaal. Duundɛ ɣöö /cikɛ bi ben thiekä kuakni rɛy luaak kiɛ yi̱k, kɛ ɣöö /ci bi li̱w yɛnɛ kɛ. 4Kä ba ji̱ luäk kɛ lät rɛy kɛmɛkä ro̱mä kɛ Kuoth Nhial. Kä thilɛ ram mi dɔ̱ŋ mi bi ben thiekädu. 5Kä ji̱n bi lät rɛy kɛmɛkä rɛci kɛnɛ yi̱k kɛ ɣöö thilɛ jiäk mi bi lɛ ben kä ji̱ I-thɛ-rɛl. 6Kä nɛnɛ ɣän cä gaat muɔɔr ni ji̱ Lii-bay ka̱n rɛy ji̱ I-thɛ-rɛl. Kɛ muc kä ji̱, ti kämi Kuoth Nhial, kɛ ɣöö ba lät kɛmɛkä ro̱mä kɛ Kuoth Nhial la̱t. 7Kä ji̱n yɛnɛ gaatku bia la̱t bo̱o̱thä palä la̱t kɛ kui̱ yi̱kä kɛnɛ rɛy geelä. Ɣän cä ji̱ ka̱m lät bo̱o̱thä palä ala muc, kä thilɛ ram mi dɔ̱ŋ mi bi ben thiekä, ram mi wä ben ba näk.”

Kui̱ bööthni palä

8Kä cu Kuoth Nhial Ä-ron jiök i̱, “Nɛnɛ, ɣän cä ji̱ ka̱m muc diaal tin ca ka̱m ɣä, nyin ji̱ I-thɛ-rɛl diaal tin rɛ̈l kɛ rɔ̱ bäkɛ ka̱m ji̱ yɛnɛ gaatku ala kui̱dun mi bia̱ duŋdun. 9Ɛn nɛmɛ ba kui̱du kä muc in rɛl gɔɔydɛ rɔ min ca tha̱a̱ŋdɛ waŋ. Kä luurikiɛn diaal tin ca nöŋ ɣä, kɛnɛ muc bɛɛlkiɛn, kɛ muc dui̱rädiɛn, kɛ muc cutädiɛn tin ca ka̱m ɣä, ba mi rɛl gɔɔydɛ rɔ kä yɛnɛ gaatku. 10Camɛ jɛ ala mi rɛl gɔɔydɛ rɔ. Ba cam ɛ tutku diaal. Kä biɛ la̱t ala mi rɛl gɔɔydɛ rɔ. 11Kä nɛmɛ bä ba duŋdu kä muc luurikiɛn, muc yäcä ji̱ I-thɛ-rɛl diaal. Cä kɛ ka̱m ji̱ yɛnɛ gaatku tin dhɔɔl, kɛ nyieeku tɔ̱ te kɛɛl kɛ ji̱ tɔ̱, ala duŋdun mi bia ka̱n. Kä nɛy diaal tɔ̱ gɔw tɔ̱ dhɔru deekɛ mi̱th thi̱n bä. 12Kä lith diaal tin gɔw kɛ kɔaŋ diaal tin gɔw kɛ bɛl, kɛ dɛy wal tin nhiam tin ca ka̱m ɣä, cä kɛ ka̱m ji̱. 13Kɛn tin diaal tin ŋɛ̈rkɛ kɛ nhiam kä ca nöŋ ɣä, bikɛn a nyinku. Bi nɛy diaal tin gɔw dhɔru mi̱th thi̱n. 14Kä tin diaal tin ca lëy ɣä kä I-thɛ-rɛl kɛ nyinku. 15Kä key diaal ɛ raan kiɛ ley kä ca nöŋä kɛ nyinku. Duundɛ ɣöö bi kɛ̱̈ɛ̱̈ ran luɛl, kä bi ke̱y leeni ti jiäk luɛl. 16Kä ba gat ran luɛl kɛ yio̱w (mi tëë kɛ pay kɛl di̱eth) ba kɛ luɛl kɛ yio̱w dhieec ce̱tkɛ kök luaak Kuɔth. 17Duundɛ ɣöö kɛ kɛ̱̈ɛ̱̈ yaaŋ, kiɛ rɔam, kiɛ böw, /ciɛ bi luɛl rɛl gɔɔydiɛn rɔ. Bi riɛmdiɛn kiɛth wi̱i̱ yi̱kä, kä bi thiɔliɛn waŋ ala muc, ɛ ŋuäny mi gɔaa kä ɣä. 18Kä bi riŋdiɛn a duŋdu, ce̱tdɛ kɛ kaw mi ca ŋuaŋ kɛnɛ ɣäm cuëëc kɛ nyinku. 19Kɛn muc diaal tin rɛl gɔɔydiɛn rɔ tin ca nöŋä ɛ ji̱ I-thɛ-rɛl cäkɛ ka̱m ji̱, yɛnɛ gaatku tin dhɔɔl kɛ nyieeku tɔ̱ te kɛɛl kɛ ji̱ tɔ̱ ala duŋdun mi bia ka̱n. Ɛ guk milɛ kä mi do̱raar nhiamdä kɛ kui̱du yɛnɛ kuayku.” 20Kä cu Kuoth Nhial Ä-ron jiök i̱, “Ji̱n /ci bi tekɛ kui̱c muundiɛn kä /ci bi tekɛ gua̱a̱th rɛydiɛn. Ɛ ɣän la kui̱du mɔ kä gua̱a̱thdu rɛy ji̱ I-thɛ-rɛl.”

Kui̱ ji̱ Lii-bay

21“Kä kɛ kui̱ ji̱ Lii-bay cäkɛ ka̱m wa̱l wa̱a̱li I-thɛ-rɛl ala kui̱diɛn, kɛ kui̱ la̱t in lät kɛnɛ rɛy kɛmɛkä ro̱mä kɛ Kuoth Nhial. 22Kä a tɛmɛ niɛ täämɛ /ci ji̱ I-thɛ-rɛl bi ben thiekä kɛmɛkä ro̱mä kɛ Kuoth Nhial, amäni mi bikɛ duer a bikɛ li̱w. 23Kä bi ji̱ Lii-bay lät kɛmɛkä ro̱mä kɛ Kuoth Nhial la̱t, kä bikɛ riɛkdɛ rut. Kä ba ŋuɔ̱t mi do̱raar ri̱cnikun. Kä bikɛ thil pek rɛy ji̱ I-thɛ-rɛl. 24Kɛ ɣöö wa̱l wa̱a̱li ji̱ I-thɛ-rɛl tin ba nöŋä ala muc, cäkɛ ka̱m ji̱ Lii-bay ala kui̱diɛn. Kɛ kui̱c ɛmɔ ɛ jɛn laarä jɛ mɔ i̱, bikɛ thil kui̱c rɛy ji̱ I-thɛ-rɛl.”

Wa̱l wa̱a̱li ji̱ Lii-bay

25Kä cu Kuoth Nhial Muthɛ jiök i̱, 26“Biɛ la̱r ji̱ Lii-bay i̱, ‘Mi wä yɛn wa̱l wa̱a̱li tin cä ka̱m yɛ wä ka̱n kä ji̱ I-thɛ-rɛl ala kui̱dun, bia Kuoth Nhial thöp muc thi̱n ala wa̱l wa̱a̱li. 27Kä ɛn mucdun bɛ ce̱tkɛ bɛl döör kɔ̱mä bɛɛl, kɛnɛ gua̱th nhiäcä kɔaŋni. 28Kä bia Kuoth Nhial thöp muc bä kä wa̱l wa̱a̱likun diaal, tin bia ka̱n kä ji̱ I-thɛ-rɛl. Rɛydiɛn bia muc Kuɔth Nhial ka̱m bo̱o̱th palä ni Ä-ron. 29Kä muc diaal tin ba ka̱m yɛ, bia muc Kuɔth Nhial thöp thi̱n, kä tin diaal tin gɔw, kɛnɛ pek in rɛl gɔɔydɛ ni rɔ.’ 30Kɛ kui̱c ɛmɔ bikɛ jiök i̱, ‘Mi wä yɛn min gɔaani jɛn wä thöp thi̱n, ba duɔthdɛ cu ciɛŋ ce̱tkɛ mi bä guäth kɔ̱mä bɛɛl kä ji̱ Lii-bay, kɛnɛ gua̱th nhiäcä kɔaŋ. 31Kä bi pekdɛ cua̱ gua̱th mi camɛ jɛ thi̱n, yɛn kɛ ji̱ dho̱rikun. Kɛ ɣöö ɛmi ca ka̱m yɛ kɛ kui̱ la̱tdun rɛy kɛmɛkä ro̱mä kɛ Kuoth Nhial. 32Kä /cia bi tekɛ duer kɛ kui̱dɛ, mi wä yɛn min gɔaa ni jɛn thi̱n wä thöp. Kä /cuarɛ nyin ji̱ I-thɛ-rɛl tin rɛl gɔɔydiɛn rɔ ya̱r, kɛ ɣöö /cia bi li̱w.’ ”

Currently Selected:

Kuen 18: nusNHB

Highlight

Copy

Compare