Kuen 14

Go̱o̱ny nath kɛ Kuoth Nhial

1Ɛ jɛn cu duɔl kɛɛliw jɔwdiɛn kap nhial. Kä cu nath wiee kɛ jɛn wäär ɛ mɔ. 2Kä cu ji̱ I-thɛ-rɛl diaal gaak kɛ Muthɛ kɛnɛ Ä-ron. Cu duɔl kɛɛliw kɛ jiök i̱, “Ci dëë gɔaa ni mi cakɔ li̱w ro̱o̱l I-jëp! Kiɛ dëë ŋua̱n ni lia̱a̱da däärdɔaar ɛ mi! 3Ɛŋu mi no̱o̱ŋ Kuoth Nhial nɛy ɛn muun ɛ mi, ɛ ɣöö bakɔ li̱w kɛ mut? Kä bi mänkɔ kɛnɛ nyintiɛnikɔ a pɛ̈ɛ̈c. Ci dëë gɔaa ni ɣöö bakɔ loc kä I-jëp?”

4Kä cu ramɔ ramɔ jiök i̱, “Kuënynɛ rɔ̱ bo̱o̱th, banɛ cu loc kä I-jëp.” 5Inɔ cu Muthɛ kɛnɛ Ä-ron wuɔ̱thkiɛn yiath piny nhiam dolä ji̱ I-thɛ-rɛl diaal. 6Kä cu Jɔ-cua gat Nun kɛnɛ Ka-leb gat Yɛ-pö-nɛ, tëë te rɛy nɛɛni tëë wa mun lim, bieynikiɛn rɛ̈t. 7Kä cukɛ duɔl ji̱ I-thɛ-rɛl diaal jiök i̱, “Ɛn mun in cakɔ rët kɛ jɛ in wa̱kɔ lim, kɛɛliwdɛ ɛ mun mi gɔaa. 8Kä mi te Kuoth Nhial rɛydan, bɛ kɔn naŋ ɛn muun ɛmɔ, kä bɛ jɛ ka̱m kɔn. Ɛ mun caak kɛnɛ liɛɛth tuar. 9Ɛ ni ɣöö, /cuarɛ tɛr kɛ Kuoth Nhial. Kä /cuarɛ dual kɛ kɛn ji̱ muɔ̱ɔ̱n, kɛ ɣöö kɛ mi̱th kɔn. Thilɛ kɛ mi gaŋ kɛ, kä te Kuoth Nhial kɛɛl kɛ kɔn. /Cuarɛ dual kɛ kɛ.” 10Duundɛ ɣöö cu duɔl kɛɛliw wee böknɛ kɛ kɛ pääm.

Ɛn wa̱nɔ cu gɔɔy Kuɔth Nhial jɔɔc kä ji̱ I-thɛ-rɛl diaal rɛy kɛmɛkä ro̱mä. 11Kä cu Kuoth Nhial Muthɛ jiök i̱, “A bi ku mäni nɛy bi nɛy ti̱ti̱ ɣä yaak ɔ? Kä bi mäni nɛy ci kɛn ɣä bi ŋäth ɔ, rɛy nyuthni diaal tin ga̱ykɛ naath tin cä la̱t rɛydiɛn? 12Bäkɛ moc juey mi bikɛ näk, kä bä ji̱ cu jak kä nɛy ti ŋuan kä bum ni kɛn kä kɛ.”

13Kä cu Muthɛ Kuoth Nhial jiök i̱, “Kä bi ji̱ I-jëp ɛ liŋ, nɛy tëë kämi kɛ raar rɛydiɛn kɛ buɔ̱mdu. 14Kä bi kɛn ɛ la̱r nɛy tin ciaŋkɛ mun ɛ mi. Tëë ciɛ liŋ i̱, ji̱n Kuoth Nhial ti̱i̱ rɛydiɛn, kä ji̱n Kuoth Nhial ci rɔ nyuɔ̱th kɛ waaŋdiɛn, kä te pua̱ru cuŋä wi̱i̱diɛn kä bo̱o̱thi kɛ kɛ pua̱r wunä kɛ cäŋdäär kä kɛ pua̱r maac kɛ wäär. 15Kä mi wi̱i̱ kɛ näk kɛn nɛy ti̱ti̱ diaal kä kɛɛl guäth kɛl, kä bi kɛn nɛy tɔ̱ ba kɛ̈kdɛ liŋ tɔ̱ wee i̱, 16‘Cɛ jɛ luäŋ ɛn Kuoth Nhial kɛ mi bɛ kɛn nɛy tɔ̱tɔ̱ naŋ muun ëë cɛ yac i̱ bɛ ka̱m kɛ, ɛ jɛn cɛ näk nikɛ rɛy dɔaar ɔ.’ 17Ɛn täämɛ, ɣän la̱ŋä ni ji̱, a ci buɔ̱m Kuɔth Nhial dëë ku di̱t, ce̱tkɛ mëë cɛ lar i̱, 18‘Kuoth Nhial kui̱c gakdɛ, kä tëë nhök mi thil pek, kä tëë päl dueeri kɛnɛ jiäk, kä cɛ duer bäny piny a /kenɛ thuɔ̱k. Kä la duäcɛ gaat kɛ dueer gua̱nikiɛn amäni ri̱c in diɔ̱ɔ̱kdiɛn kɛnɛ ŋuaandiɛn.’ 19Kä kɛ kui̱ nhökdu min thil pek, päli nɛy ti̱ti̱ dueerkiɛn, ce̱tnikɛ mëë cikɛ pälikä kä I-jëp amäni walɛ.”

Duäc Kuɔth kɛ ji̱ I-thɛ-rɛl

(Ŋuɔ̱t 1:34-40)

20Ɛ jɛn cu Kuoth Nhial wee i̱, “Ɣän cä kɛ pälikä kɛ ɣöö ci thiec. 21Duundɛ ɣöö ɣän Kuoth in tëk bi wi̱c muɔ̱n thia̱ŋ kɛ liakdä. 22Kä nɛy diaal tëë ci buɔ̱mdä nɛn kä I-jëp kɛnɛ lätkä tin ga̱ykɛ naath rɛy dɔaar kä ca ɣä ɣɔ̱n ni kä wäl ɛn täämɛ kä /ka̱n ruacdä liŋ. 23/Ca mun ëë cä la̱r gua̱ni bi nɛn. Kɛn tin diaal tin yɔaŋkɛ ɣä. 24Duundɛ ɣöö ja̱ŋdä ni Ka-leb bä jɛ naŋ ɛn muun in cɛ wä thi̱n, kɛnɛ karkɛ ba duŋdiɛn. Kɛ ɣöö tëë kɛ ca̱r mi göl kä cɛ guɔ̱ɔ̱r ni ruacdä kɛɛliw. 25Täämɛ, min ci ji̱ Ä-ma-lek kɛnɛ ji̱ Kɛ-naan cieŋ wi̱i̱ lo̱o̱lä, ɣöthɛ ni ruun wiaa däärdɔaar kɛ duɔ̱p Bar Gutdä.”

26Ɛ jɛn cu Kuoth Nhial Muthɛ kɛnɛ Ä-ron jiök i̱, 27“A bi ku mäni nɛy bi kɛn nɛy ti thil luɔt ti ŋɛ̈ɛ̈ny kɛ ɣä? Ɣän cä gak ji̱ I-thɛ-rɛl liŋ, min gaak kɛn ɛ kɛ ɣä. 28Jiök ɛ kɛ i̱, laar Kuoth Nhial ɛ i̱, ‘Ce̱tnikɛ tëkdä min lat yɛnɛ cä liŋ, bä lät kä yɛ. 29Bia li̱w a bia riaw ɛn rɛy dɔaar ɛmɛ, amäni nɛy diaal tëë ca kuɛn a känɛ ni kä run ti jiɛɛn da̱ŋ rɛw a wä nhial, tëë ci gaak kɛ ɣä, 30thilɛ kɛl mi bi wä muun ëë cä lar i̱, bä ka̱m yɛ i̱ bia ciɛŋ, ɛ ni Ka-leb gat Yɛ-pö-nɛ kɛnɛ Jɔ-cua gat Nun bi wä thi̱n tɔ̱. 31Duundɛ ɣöö gaatkun tin cia lar i̱ bi ka pɛ̈ɛ̈c, bäkɛ naŋ thi̱n, a bikɛ mun ëë cia lim wä ciɛŋ. 32Kä duundɛ ɣöö, kɛ kui̱dun bia li̱w ni rɛy dɔaar. 33Bi gaatkun a yiëën deet ɛn rɛy dɔaar kɛ run ti jiɛɛn da̱ŋ ŋuaan, kä bikɛ cuc kɛ thil ŋäthädun amäni mi ci ram in jɔakdun li̱w rɛy dɔaar. 34Nikɛ pek ni̱ni tëë lim yɛn kɛ ni mun, ni̱n ti jiɛɛn da̱ŋ ŋuaan, bi cäŋ kɛl a ruɔ̱n, bia riɛkdun rut kɛ run ti jiɛɛn ŋuaan, a bi yɛn jiääk gaakdä ŋa̱c kɛ yɛ.’ 35Ɛ ɣän Kuoth Nhial ruacɔ. Ɛ thuɔ̱k, ɣän bä lät kä kɛn nɛy ti ca rɔ dol ti. Gakɛ kɛ ɣä. Ɛn rɛy dɔaar ɛmɛ bikɛ thuuk thi̱n, bikɛ li̱w thi̱n.”

36Kä wutni tëë ci Muthɛ kɛ ja̱k i̱, wa mun lim, kä ci luny jɔk kä ca duɔl kɛɛliw jak kä gak kɛ Muthɛ kɛ no̱o̱ŋdiɛn kɛ ruac mi jiääk kɛ kui̱ muɔ̱ɔ̱n, 37kɛn nɛy tɔ̱ nööŋkɛ ruac mi jiäk tɔ̱ kɛ kui̱ muɔ̱ɔ̱n, cikɛ li̱w kɛ juey nhiam Kuɔth Nhial. 38Cu duɔth ni Jɔ-cua gat Nun kɛnɛ Ka-leb gat Yɛ-pö-nɛ kɛ tëk kä nɛy tëë ci mun wä lim.

Juc I-thɛ-rɛl kä Ɣɔr-ma

(Ŋuɔ̱t 1:41-46)

39Ɛ jɛn cu Muthɛ rieet tɔ̱ tɔ̱ la̱t ji̱ I-thɛ-rɛl diaal, kä cu lo̱ckiɛn jiath kɛn diaal ɛlɔ̱ŋ. 40Kä mëë ruɔ̱ndɛ cukɛ keer nikɛ runwaŋ, kä cukɛ wä wi̱i̱ pa̱a̱m wec Päämni larkɛ jɛ i̱, “Guicɛ, kɔn tin, ba̱kɔ wä ni guäth ëë ci Kuoth Nhial ɛ la̱r kɔ. Kɛ ɣöö ca̱kɔ duer.” 41Ɛ ni ɣöö cu Muthɛ wee i̱, “Ɛŋu /ci yɛn ruac Kuɔth Nhial luthɔ, ɛn täämɛ, /cɛ rɔ bi lot? 42/Cuarɛ wä amäni mi bia röm kɛ gua̱n tɛ̈run, kä /ci Kuoth Nhial te kɛɛl kɛ yɛ. 43Kɛ ɣöö ji̱ Ä-ma-lek kɛ ji̱ Kɛ-naan a nhiamdun, ba yɛ näk, kɛ ɣöö cia rɔ ri̱t kä Kuoth Nhial, kä /cɛ bi te kɛɛl kɛ yɛ.” 44Kä cukɛ ŋot kɛ mi wä kɛ nhial wi̱i̱ pa̱a̱m wec päämni, a cukɛ Muthɛ kɛnɛ thanduk matdä ruac Kuɔth ba̱ny wi̱c. 45Ɛ jɛn cu ji̱ Ä-ma-lek kɛnɛ ji̱ Kɛ-naan tin cieŋ nhial wi̱i̱ pa̱a̱m ben piny, cukɛ ji̱ I-thɛ-rɛl joc, kä cukɛ kɛ guɔ̱ɔ̱r amäni Ɣɔr-ma.

Currently Selected:

Kuen 14: nusNHB

Highlight

Copy

Compare