Ɣöth 25

Luuri gua̱th palä

(Ɣöth 35:4-9)

1Cu Kuoth Nhial Muthɛ jiök i̱, 2“Ruacni kɛ ji̱ I-thɛ-rɛl, akɛ ma̱a̱tkɛ ɣä kä luuri, bia mɔ luäŋ raan ɛ kɛ ŋun ɔ no̱o̱ŋ. 3Kä kɛn luuri tɔ̱ bia ma̱a̱t tɔ̱, bikɛ la luuri dääpä, kɛnɛ ciɛk in bo̱r kɛ ciɛk in yian, 4kɛ bieyni tin yiël, kɛnɛ bieyni tin mɛ̈ri kɛ bieyni tin dööli kɛ bieyni ti bo̱o̱r ti ca lathdiɛn mɛn agɔaa, kɛ mi̱em böwni, 5kɛ tuac rɔɔmni ti ca bil kɛ biɛl mi lual, kɛ guɔ̱p mi puɔth puɔth, kɛ jiath thëëp, 6kɛ liɛɛth lɛmbärni, kɛ juaac ti kuɔ̱r kuɔ̱ɔ̱r kɛ kui̱ liɛth yi̱rä, kɛnɛ kui̱ jiɛn tin la tuɔ̱ɔ̱lkɛ due̱l kɛ kui̱ ŋuänyä mi gɔaa. 7Kɛ dɔ̱a̱k ti puath puaath kɛ kui̱ bööth palä min di̱t ni jɛn, kɛ gaakni kɛ kui̱ biey gɔ̱rädɛ in te kathdɛ. 8Akɛ la̱tkɛ ɣä kä gua̱a̱th mi bä ben cieŋ thi̱n rɛydiɛn. 9Bia due̱lä la̱t ni kɛ pe̱k kä ti diaal tin bä nyuɔ̱th yɛ kɛ la̱tdɛ amäni pääpnikɛ diaal.

Thanduk matdä ruac Kuɔth

(Ɣöth 37:1-9)

10“Täämɛ bikɛ thanduk täth kɛ thep. Bi bärɛ piny a jua̱th te̱tni da̱ŋ rɛw kɛ nuth. Kä bi bap baapdɛ kɛn ɣäp ɣääpdɛ a juäth tetdä kɛ nuth. 11Bia jɛ cu rɔth kɛ da̱a̱p mi lɛy lɛy rɛc ɔ kɛnɛ jɔk ɔ. Kä bia wi̱cdɛ ta̱th thɛɛr mi ca rɔth kɛ da̱a̱p kɛɛliw. 12Täthni jɛ ciik dääpä da̱ŋ ŋuaan, kä bi kɛ la̱th ciöknikɛ da̱ŋ ŋuaan, ciik rɛw kui̱ydɛ kui̱c kɛl, kɛ ciik rɛw kui̱ydɛ kui̱c in dɔ̱diɛn. 13Gäk nikɛ da̱ŋ rɛw bikɛ la to̱ŋ thëëp, kä bi kɛ rɔth kɛ da̱a̱p. 14Kä bi kɛ cuɔt kɛ rɛy ciikni tin te ŋɛpni thandukä, kɛ ɣöö ba jɛ la kapkɛ kɛ kɛ. 15Bi to̱ŋ ɛ tɔ̱ a te rɛy ciikni, /ca kɛ bi ka̱m raar puɔ̱ɔ̱nydɛ. 16Kä bi lueek matdä ruac ti bä ka̱m ji̱ kuëŋ thi̱n. 17Bi kum la̱t kɛ ciɛk mi da̱a̱p. Bi bärɛ piny a jua̱th te̱tni da̱ŋ rɛw kɛ nuth. Bi riewdɛ a juäth tetdä kɛl kɛ nuth. 18Täth pua̱ny da̱ŋ rɛw ti ce̱tkɛ pua̱ny ja̱a̱kni kɛ da̱a̱p mi bia dɛŋ kɛ de̱y, kä ba kɛ la̱th tuɔ̱ŋni kuumä da̱ŋ rɛw, 19täth kɛl pe̱e̱k kɛl, kä täth min dɔ̱diɛn pe̱e̱k in dɔ̱ŋ. Bia kɛn da̱ŋ rɛw ta̱th pëkni kuumä da̱ŋ rɛw kɛ jɛn cäŋ ɔ kɛl ɔ cia tääth ni kum ɔ. 20Bi pua̱ny tɔ̱tɔ̱ gɔ̱kiɛn ɣa̱r wi̱i̱dɛ, bi kɛ kum ɛmɔ ku yi̱k piny kɛ gɔ̱kiɛn kä cikɛ nhiamdiɛn röm, kukɛ kum lɛ guɛc piny. 21Bia pääm lueekni tɔ̱ bä ka̱m yɛ tɔ̱ cu la̱th rɛydɛ. Bia kum cu kuëŋ wi̱i̱dɛ. 22Nɔmɔ ɛ jɛn gua̱a̱th in bä jek kɛ yɛ thi̱n bi jɔwdä päl raar kɛ wi̱c kumä kɛ kam pua̱nyni da̱ŋ rɛw tin te wi̱i̱ thandukä lueekni. Ɣän bä ruac kɛ ji̱ kɛ kui̱ ŋuɔ̱tni diaal tin bä ŋun kɛ kui̱ ji̱ I-thɛ-rɛl.”

Tharbët mi̱eth mi lɛy rɔ

(Ɣöth 37:10-16)

23“Bia tharbët täth kɛ jiath thëëp. Bi bärɛ piny a jua̱th te̱tni da̱ŋ rɛw, kä bi riewdɛ a juäth tetdä kɛl. Kä bi bärɛ nhial a juäth tetdä kɛ nuth. 24Bia jɔkdɛ rɔth kɛ da̱a̱p mi lɛy lɛy. Bia wi̱cdɛ moc thɛɛr mi ca rɔth kɛ da̱a̱p kɛɛliw. 25Bia rɛ̈l la̱t thɛɛrädɛ kä bi pät päätdɛ pa̱a̱r kɛ pät tetdä, kɛ thɛɛr mi ca rɔth kɛ da̱a̱p ŋɛpnikɛ. 26Bia jɛ ta̱th ciik da̱ŋ ŋuaan kɛ da̱a̱p. Bia kɛ la̱th peknikɛ da̱ŋ ŋuaan tin ca ciökɛ pua̱t thi̱n. 27Bi ciik thiek kɛ rɛ̈l thɛɛrä min la to̱ŋ ti kapkɛ tharbët a cuɔtkɛ thi̱n ɛ ka̱a̱p. 28Bia to̱ŋ tɔ̱tɔ̱ jɔp jiaath mi ŋue̱r, kä bia kɛ rɔth kɛ da̱a̱p. Kä ba tharbët a kapkɛ kɛ kɛ. 29Ta̱thɛ jɛ thän ti tataal, kɛ liir kɛ buɔ̱li kɛ took ti ba la tiɛthkɛ ni luuri pi̱i̱ni dɛɛni wal piny, kɛ ti ba la waŋkɛ ni wal kɛ kui̱ tulä. 30Bia mi̱eth mi lɛy rɔ la̱th wi̱i̱ tharbëtdä gua̱thni diaal.”

Cuuŋ lɛmbärä

(Ɣöth 37:17-24)

31“Bia mi la cuɔ̱ŋkɛ lɛmbär thi̱n täth kɛ da̱a̱p mi lɛy lɛy. Bia thääkɛ täth kɛnɛ leerikɛ kɛ taŋdɛ, kä bi kɛn diaal te yieethä mɔ kɛl ɔ. 32Bɛ tekɛ kar bäkɛl ti ba rɔ̱ rɛ̈k kui̱cnikɛ diaal. Bi diɔ̱k kä ti la cuɔ̱ŋkɛ lɛmbär thi̱n te kui̱c kɛl, kä bi kar diɔ̱k kɔ̱kiɛn te kui̱c in dɔ̱diɛn a ca rɔ̱ go̱k ce̱t tuɔ̱ŋ yaaŋ. 33Kä bɛ tekɛ thääk da̱ŋ diɔ̱k ti ca la̱t ce̱tkɛ tual kɛl kä te tharɛ kɛnɛ gaaknikɛ wi̱i̱ tuɔ̱ɔ̱ŋ kɛl, kɛ thääk da̱ŋ diɔ̱k kɔ̱kiɛn kɛ thärkiɛn wi̱i̱ tuɔ̱ɔ̱ŋ in dɔ̱diɛn. Kɛn kar da̱ŋ bäkɛl bikɛ cuɔ̱ŋ inɔ. 34Kä jɛn taŋ lɛmbärä puɔ̱nydɛ bɛ tekɛ thääk da̱ŋ ŋuaan ti ca täth kɛ ta̱a̱ tuaali kɛ thärkiɛn kɛɛl kɛnɛ gaaknikiɛn. 35Bi rɛw thakdiɛn a kɛl kä kɛn kar da̱ŋ bäkɛl tin ca rɔ̱ rɛk puɔ̱ɔ̱ny taŋ. 36Ba thääkiɛn kɛnɛ karkiɛn dɛŋ kɛ jɛn yieeth ɛ kɛl ɔ. Ɛn nɔmɔ kɛɛliw ba dɛŋ dääpä mi lɛy lɛy. 37Bia lɛmbärni da̱ŋ bärɔw täth kɛ kui̱dɛ, kä ba kɛ dɔp kɛ ɣöö bikɛ nhiamdɛ mɛr. 38Ba tin la tɛ̈ŋkɛ ŋɛ̈thdɛ thi̱n täth kɛ da̱a̱p mi lɛy lɛy. 39Bia min la cuɔ̱ŋkɛ lɛmbär thi̱n amäni nyinkɛ diaal tin jäl kɛ jɛ kɛɛl täth kɛ theemni dääpä ti jiɛn diɔ̱k wi̱cdɛ dhieec ki̱i̱lugram.#25:39 Ki̱i̱lugram Lotdɛ ni ɣöö ce̱t thiakdɛ kɛ tha̱a̱ŋ thiekä ran. 40Tit ɛ, mi ca la̱t kɛ jɛn la̱t ëë ca nyuɔ̱th ji̱ wi̱i̱ pa̱a̱m.”

Currently Selected:

Ɣöth 25: nusNHB

Highlight

Copy

Compare