Ɣöth 26

Kɛmɛ ro̱mä

(Ɣöth 36:8-38)

1“Täämɛ, dɔ̱diɛn ɛn, yɛn bia ɣä lät kä kɛmɛ kɛ bieyni ti dël dëël ti nyin gɔw da̱ŋ wäl ti yiël kɛnɛ ti mɛ̈ri kɛ ti dööli ti ca lathdiɛn mɛn agɔaa, kä ca tak agɔaa, kä bi kɛ la̱t ni kuurä, ba kɛ biɛl rɛci kɛ pua̱ny ti ce̱tkɛ pua̱ny ja̱a̱kni. 2Bi bär biey kɛl a jua̱th te̱tni ti jiɛn rɛw wi̱cdɛ bädäk. Bi riewdɛ a jua̱th te̱tni da̱ŋ ŋuaan. Bieyni diaal ba themdiɛn pa̱a̱r. 3Ba bieyni da̱ŋ dhieec kɔc kɛɛl, kɛ dhieec kɔ̱kiɛn kɛɛl. 4Kä bi thuk biey ɔ a muooci go̱o̱ni kɛ lath mi yie̱l kä kɛn bieyni dhieec tin ca kɔc kɛɛl, kä biɛ la̱t ni nɔ, amäni bieyni da̱ŋ dhieec tin kɔ̱kiɛn, kä bi go̱o̱ni la̱th thuknikiɛn. 5Bi go̱o̱ni ti jiɛn dhieec la̱th thukni bieyni da̱ŋ dhieec tin ca kɔc kɛɛl, kɛnɛ go̱o̱ni ti jiɛn dhieec thukni bieyni da̱ŋ dhieec tin kɔ̱ŋ tin ca kɔc kɛɛl. Bi go̱o̱ni tɔ̱tɔ̱ rɔ̱ cu lot kɛɛl. 6Bi go̱o̱ni ti jiɛn dhieec tin ba bieyni dööp kɛ kɛ täth kɛ da̱a̱p kɛ ɣöö bi due̱l cua kɛl.

7“Bi bieyni tak kɛ mi̱em böwni kɛ kui̱ wec duëël. Kä bi kɛ tak ala wäl kɛl. 8Bi bi̱i̱ kɛl bärɛ a jua̱th te̱tni ti jiɛn diɔ̱k, kä bi riewdɛ a jua̱th te̱tni da̱ŋ ŋuaan. Kɛn bieyni da̱ŋ wäl kɛl, bikɛ pa̱a̱r. 9Bi dhieec kɔc kɛɛl, kä bi bäkɛl tin kɔ̱ŋ kɔc kɛɛl. Kä bi bäkɛliɛn mat ala jia̱a̱c rɛw thok thi̱ek in te nhiam kɛmɛkä. 10Bi go̱o̱ni ti jiɛn dhieec la̱th thukni bieyni da̱ŋ dhieec tin nhiam tin ca kɔc kɛɛl raar, kä bi go̱o̱ni ti jiɛn dhieec la̱th thukni biey kä tin kɔ̱kiɛn tin ca kɔc kɛɛl. 11Bi go̱o̱ni ti jiɛn dhieec täth kɛ ciɛk in yian, bi go̱o̱ni yio̱o̱ni tin kɔn cu cuɔt kɛ rɛy go̱o̱ni bieyni kɛ ɣöö bi kɛmɛ ro̱mä a kɛl kɛɛliw. 12Kä nuth biey in ci duɔth bieyni tin ci ba̱a̱n wi̱i̱ kɛmɛ ro̱mä in te nhial bikɛ rɔ̱ le̱p puɔ̱ɔ̱ny kɛmɛkä jɔɔdɛ. 13Kä bi juäth tetdä mi te kui̱c kɛl kɛnɛ min te kui̱c in dɔ̱ŋ, kä bieyni wec kɛmɛkä ro̱mä nhial, wi̱c kɛmɛkä kuɔ̱m piny kui̱c ɔ kɛnɛ kui̱c ɔ, bikɛ cu te le̱p le̱p kui̱cnikɛ da̱ŋ rɛw. 14Kä bi wi̱c kɛmɛkä moc kɛ kuum kɛ tuac rɔɔmni ti ca biɛl kɛ biɛl mi thiäŋ, kä bi wi̱cdiɛn yi̱k piny kɛ tuac böwni.

15“Bi cuɔ̱ɔ̱ŋ kɛmɛkä la̱t kɛ jiath thëëp. 16Bi cuɔ̱ŋ kɛl kä jiɛn tɔ̱ cuɔ̱ɔ̱ŋɛ kɛmɛ tɔ̱ bärɛ a jua̱th te̱tni da̱ŋ wäl, kä bi jiath ɔ kä jiɛn tin te ri̱i̱wädɛ bärɛ a juäth tetdä kɛl kɛ nuth. 17Bi jiath kɛl a tekɛ tuŋ mi ce̱tkɛ tuŋ ko̱r, bi kɛl te kui̱c in te piny, kä bi tuŋ kɛl te kui̱c in te nhial, kɛ ɣöö bikɛ rɔ̱ gɔn kɛɛl, ba kɛn diaal pa̱a̱r ɛyit kɛ ɣöö bikɛ röm ɛpot kɛnɛ jiath in dɔ̱ŋ. Bi cuɔ̱ɔ̱ŋ kɛmɛkä ro̱mä la̱t inɔ. 18Bi jiɛn la̱t kɛ kui̱ duëël, bi cuɔ̱ɔ̱ŋ jiɛn ti jiɛn da̱ŋ rɛw la̱t kui̱c targɛ̈w. 19Bi kääpni ciökni ti jiɛn da̱ŋ ŋuaan täth piny kɛ ciɛk in bo̱r, kä bi kɛ ta̱th thäri cuɔ̱ɔ̱ŋni jiɛn ti jiɛn rɛw. Bi kääpni da̱ŋ rɛw te thaar jiaath kɛl kɛ kui̱ ciöknikɛ da̱ŋ rɛw. Bi cio̱o̱k ɔ cuɔ̱ŋ wi̱i̱ kä kɛl, bi cio̱o̱k in dɔ̱ŋ cuɔ̱ŋ wi̱i̱ kä min dɔ̱diɛn, ba lɔathdiɛn diaal inɔ. 20Kui̱c duëël in dɔ̱ŋ in lot ni kui̱c kayŋuääk, bɛ tekɛ cuɔ̱ɔ̱ŋ jiɛn ti jiɛn da̱ŋ rɛw, 21kɛ kääpnikiɛn ti jiɛn ŋuaan ti ca ta̱th piny kɛ ciɛk mi bo̱r, kääpni rɛw kɔ̱kiɛn piny jiaath in dɔ̱diɛn. 22Bi cuɔ̱ɔ̱ŋ jiɛn da̱ŋ bäkɛl la̱th jɔk duëël kui̱c kony ca̱ŋ. 23Bi cuɔ̱ɔ̱ŋ jiɛn da̱ŋ rɛw la̱t kɛ kui̱ guɔ̱ɔ̱kni duëël jɔk ɔ. 24Jiɛn da̱ŋ rɛw tɔ̱tɔ̱ bikɛ ce̱tkɛ jiath kɛl dääriɛn kä ba kɛ mat ni kä ciɛk in nhiam, ba kɛn diaal la̱t ni nɔ, bikɛ guɔ̱ɔ̱k da̱ŋ rɛw cu la̱t. 25Bɛ cu tekɛ cuɔ̱ɔ̱ŋ jiɛn da̱ŋ bädäk kɛ kääpni da̱ŋ wäl bäkɛl ti ca ta̱th piny kɛ ciɛk mi bo̱r, ti bi kääpni da̱ŋ rɛw a te piny jiaath kɛl. Ɛ jɛn lɔathdiɛn diaal inɔ.

26“Bi to̱ŋ jɔp jiaath thëëp rieewni ti jiath kɛl wi̱cdɛ dhieec, kɛ kui̱ duëël kɛl. 27Dhieec kɛ kui̱ jiɛn duëël kui̱c kɛl, kɛ to̱ŋ dhieec kɛ kui̱ jiɛn kuec in dɔ̱ŋ kɛ to̱ŋ dhieec kɛ kui̱ jiɛn jɔak duëël konyä ca̱ŋ. 28Bi rieew in te däär pe̱k kuec ɔ kɛnɛ kui̱c ɔ cop. 29Bi cuɔ̱ɔ̱ŋ jiɛn rɔth kɛ da̱a̱p, kä bi ciikiɛn kɛ kääpni to̱ŋni rɔth kɛ da̱a̱p, amäni to̱ŋ. 30Kä bi due̱l yiath piny ni kɛ ca̱pdɛ mëë nyuɔ̱thä ji̱ wi̱i̱ pa̱a̱m.

Bi̱i̱ ge̱e̱lä

31“Bi ge̱e̱l la̱t kɛ biɛl mi yie̱l kɛnɛ mi mɛr kɛ mi do̱l mi ca la̱t agɔaa, kɛ pua̱ny ti ce̱tkɛ pua̱ny ja̱a̱kni. 32Biɛ ŋap puɔ̱ɔ̱ny thieeri jiɛɛn ŋuer da̱ŋ ŋuaan ti ca rɔth kɛ da̱a̱p kɛ go̱o̱ni dääpä wi̱i̱ kääpni cikä mi bo̱r da̱ŋ ŋuaan. 33Bi ge̱e̱l ŋap kɛ go̱o̱ni, kä bi thanduk matdä ruac la̱th rɛy ge̱e̱lä rɛc ɛ, kä bi ge̱e̱l gua̱a̱th in di̱t ni gɔɔydɛ rɔ da̱a̱k kɛnɛ gua̱a̱th in rɛl rɔ̱. 34Bi di̱i̱l luël dueeri la̱th wi̱i̱ thandukä luëëkni guäth Kuɔth kärɔa mi rɛl gɔɔydɛ rɔ. 35Bi tharbët kuëŋ raar jɔk ge̱e̱lä, kɛ taŋ lɛmbärä kui̱c duëël kui̱c targɛ̈w, kä lotdɛ ni tharbët in te kui̱c duëël kui̱c kayŋua̱a̱k.

36“Kä bi bi̱i̱ thi̱ek duëël raar tak kɛ biɛl mi yie̱l kɛnɛ mi mɛr, kɛ mi do̱l, kä biɛ tak kɛ lath mi ca mɛn agɔaa, kä ba ja̱m kɛ biɛɛl kɛ lath mi takɛ thi̱n kɛ tet. 37Kä bia thieer thëëp da̱ŋ dhieec jɔp kɛ kui̱ biey thi̱ek ɛmɔ, kä bia kɛ rɔth kɛ da̱a̱p, kä bi go̱o̱nikiɛn a da̱a̱p. Kä bi kääpni cikä mi yian da̱ŋ dhieec täth kɛ kui̱diɛn.”

Currently Selected:

Ɣöth 26: nusNHB

Highlight

Copy

Compare