Ɣöth 15

Dit Muthɛ

1Ɛ jɛn, ɛn wa̱nɔ, cu Muthɛ kɛnɛ ji̱ I-thɛ-rɛl Kuoth Nhial puany kɛ dit ɛmɛ, mi la larkɛ ɛ kɛn i̱,

“Ɣän bä diit ɛ ti kët Kuoth Nhial, kɛ ɣöö cɛ naath joc,

cɛ jio̱k kɛnɛ gua̱ndɛ muɔy Bar.

2Kuoth Nhial ca jɛn lua̱ŋdä, kä ca jɛn pakdä,

kä cɛ ŋɔa̱a̱ŋ ca jɛn ka̱ndä.

Ɛ jɛn Kuothdä pa̱ny, ɣän bä puany ni jɛ.

Ɛn Kuoth gua̱a̱r, ba liak.

3Kuoth Nhial ɛ raan ko̱o̱r,

cɔal ciötdɛ i̱ Kuoth Nhial.

4“Cɛ thurbiɛɛli Pɛro kɛnɛ rɛmkɛ töl yie̱e̱r,

amäni kua̱r rɛmnikɛ tin thuɔ̱ɔ̱k, cikɛ di̱ŋ yie̱e̱r Bar Gutdä.

5Ci pi̱w kɛ cuɔth,

a cikɛ wä li̱ŋ ni lool ce̱tkɛ päm.

6Kuoth Nhial, ɛn tet cuëëcdu, gui̱th maandɛ bumä,

kä thiäyɛ ji̱ tɛ̈ru ni dɔɔr.

7Curi ji̱ tɛ̈ru puɔ̱t kɛ di̱tdu,

curi kɛ këc kɛ̈c, kä cu kɛ̈c lɔaacdu kɛ thum ce̱tkɛ pök.

8Cu tul wuɔ̱mdu pi̱ gɛy,

cu muaŋdiɛn rɔ ge̱r ce̱tkɛ ti ca ke̱k,

cuɛ luɔl Bar roth ni piny i̱.

9Cu gua̱n tɛ̈r ɛ lar i̱, ‘Bä kɛ cuɔp lɛɛr,

Bä kɛ wä ka̱p lɛɛr,

Bä tin ci nɛɛkä kɛ pɛc dääk kä kɛ,

Bä min göörä kɛ lɔcdä cu cuɔ̱p kɛ kɛ.

Bä mutdä guath kä bä kɛ cu tɛŋ kɛ tetdä.’

10Kɛ yiëëdu cuɛ kɛ pa̱t, kä cu yier kɛ muɔy,

cukɛ di̱ŋ ce̱tkɛ pil rɛy lo̱nyä mi bum bum.

11“Kua ŋa mi ce̱t ji̱, ji̱n Kuoth Nhial, rɛy kuthni?

Kua ŋa päär ji̱ mɔ, mäni rɛy gɔɔyädu kɛɛliw,

kɛ rɛy lätniku tin gɔw,

kɛnɛ lätku tin ga̱ykɛ naath?

12Ci tet cuëëcdu riny,

cu piny kɛ bät.

13“Ci nɛɛku tin ci luɛl bo̱th kɛ nhök mi /ci rɔ wany.

Ci kɛ bo̱th kɛ buɔ̱mdu, bo̱thi kɛ guäth ciɛŋädu min rɛl rɔ.

14Cu naath kɛ̈kdu liŋ, kä cuɛ kɛ lath,

cuɛ ji̱ Pi-li-thɛt jia̱a̱ckiɛn wal kɛ dual.

15Ɛpuc, cu kua̱r ji̱ E-dɔm baath,

ci bööth Mo-ab lath kɛ käp.

Ji̱ Kɛ-naan diaal cukɛ ŋɛ̈ɛ̈r,

16Cu dual mi di̱i̱t ben kä kɛ,

kɛ min cikɛ di̱t tetädu nɛn.

Cukɛ rɔ̱ pär kɛ cuɔ̱ŋ ɛbi̱r ce̱tkɛ päm mëë cikɛ pi̱m, ji̱n kuäär.

Amäni mëë ci nɛɛku tëë ci luɛl cop raar.

17Bi kɛ jak kä bëë rɛc, kä bi kɛ ben pith wi̱i̱ pa̱a̱m, in la

pämdu.

Jɛn gua̱a̱th ciɛŋädu, min ci rial ikä, Kuäär.

Ɛn ciëëŋdu min ci yiath piny, Kuäär, ni kɛ te̱tku.

18Kuoth Nhial bɛ piny ruac amäni cäŋ kɛl.”

Dit Mir-yam

19Kɛ ɣöö mëë ci jio̱o̱k Pɛro coth yie̱e̱r kɛɛl kɛ thurbiɛɛlikɛ kɛ ji̱ jio̱o̱knikɛ, cu Kuoth Nhial pi̱ yiëër nyɔk kɛ mat wi̱i̱diɛn. Kä cu ji̱ I-thɛ-rɛl ja̱l kɛ där yiëër guäth mi kööt. 20Cu Mir-yam in la cääk din, min mɔ nyiman Ä-ron, bul ka̱n, kä cu män diaal buɔ̱l ka̱n kɛ jɛ kɛɛl, cukɛ wä raar kɛ puɔ̱t buɔ̱li kä duɔŋkɛ. 21Cu Mir-yam kɛ ket dit ɛmɛ, wee i̱,

“Ki̱et diit Kuoth Nhial kɛ ɣöö cɛ di̱t ɛlɔ̱ŋ,

kɛ ɣöö cɛ jio̱k kɛnɛ gua̱ndɛ joc,

cɛ kɛ cu muɔy yie̱e̱r.”

Pi̱ ti wac waac

22Cu Muthɛ ji̱ I-thɛ-rɛl ku böth nhiam, cukɛ jiɛn Bar Gutdä, cukɛ wä rɛy dɔaar kä Cur. Cukɛ ja̱l rɛy dɔaar kɛ ni̱n da̱ŋ diɔ̱k, thilɛ pi̱ ma̱th ti jekɛ. 23Mëë wäkɛ cop kä mara,#15:23 Min lot ni ɣöö kɛcɛ. cukɛ pi̱ je̱k thi̱n, kä /cikɛ kɛ dëë math kɛ kɛ̈cdiɛn, cu nɔmɔ cua thar kä min ca cäk ni jɛ ciöt i̱ mara. 24Cu naath wä luk kɛ Muthɛ kä thieckɛ jɛ i̱, “Bakɔ ŋu math?” 25Cu Muthɛ Kuoth Nhial cɔl kɛ wiee, cu Kuoth Nhial ɛ nyuɔ̱th ŋuɔ̱ny jiaath, cuɛ jɛ yuɔr rɛy pi̱i̱ni, cu pi̱ rɔ̱ looc ni ti gɔw.

Nɛmɛ ɛ jɛn gua̱a̱th ëë cu Kuoth kɛ la̱th ŋutdä mi wir wir kä cuɛ kɛ thɛm thi̱n. 26Cuɛ wee i̱, “Mi wiaa ruac Kuɔthdun ni Kuoth Nhial wä liŋ agɔaa, kä bia la̱t ni min la cuɔ̱ɔ̱ŋ nhiamdɛ, kä bia ji̱thkun lɛp agɔaa kɛ lieŋ lueeknikɛ, kä bia ŋuɔ̱tkɛ diaal ka̱p lɔɔcdun a bum, thilɛ liaw kɛl mi bä nöŋ yɛ kä kɛn liaw diaal tëë cä tɔ̱ɔ̱ŋ ni ji̱ I-jëp, kɛ ɣöö ɛ ɣän Kuoth Nhial min la te̱e̱kdun.”

27Ɛ jɛn, cukɛ cu ben kä E-lim gua̱a̱th mi tekɛ liɛl da̱ŋ wäl wi̱cdɛ rɛw, kɛ nöör ti jiɛn bärɔw, cukɛ cu pua̱t gekä pi̱i̱ni.

Currently Selected:

Ɣöth 15: nusNHB

Highlight

Copy

Compare