Ɣöth 14

Jiëthdiɛn kɛ bar gutdä

1Cu Kuoth Nhial ruac kɛ Muthɛ, cuɛ wee i̱, 2“Läri jɛ ji̱ I-thɛ-rɛl, akɛ loc jɔk, bikɛ wä pua̱t nhiam Pi-ɣa-ɣi-rot, kam Mig-dol kɛnɛ Bar Gutdä, nhiam Baal-dhɛ-pon, bia pua̱t cuɔcɛ rɔ̱ ni gekä Bar. 3Kɛ ɣöö bi Pɛro ɛ cu car, kä bɛ wee i̱, ‘Kɛn ji̱ I-thɛ-rɛl yi̱ckɛ rɛy dɔaar ci dɔr rɛ̈w kɛ ŋa̱a̱k rɛc.’ 4Kä bä lɔc Pɛro jak kä bum, bɛ yɛ cuɔp lɛɛr, kä bä cu tëë kɛ̈k kɛ ti̱emdä kɛ Pɛro kɛnɛ rɛmkɛ diaal, kä bi ji̱ I-jëp ɛ cu ŋa̱c i̱ ɛ ɣän Kuoth Nhial.” Cukɛ cu lät inɔ.

Cop gan I-thɛ-rɛl lɛɛr

5Täämɛ, mëë wa Pɛro kuäär I-jëp la̱r thëŋ ɛn ɣöö ci naath rɔ̱ bar, jɛn kɛnɛ ji̱ kɔaarɛ cukɛ lɔcdiɛn nyɔk kɛ ca̱r kɛ naath, cukɛ wee i̱, “Ɛŋu ɛnɛ canɛ la̱t ɛ, a jaknɛ ji̱ I-thɛ-rɛl kä wä raar a ba̱nykɛ la̱tdan piny?” 6Cuɛ thurbiɛɛlikɛ tin yɔ̱a̱ckɛ kɛ jio̱o̱k tuɔ̱ruɔ̱k rial ikä, kä cuɛ jiɛn kɛ rɛmkɛ, 7cuɛ thurbiɛɛli ti kur bäkɛl naŋ kɛnɛ thurbiɛɛli I-jëp diaal, kɛ kua̱r rɛ̈m wecdiɛn diaal. 8Cu Kuoth Nhial lɔc kua̱r I-jëp ni Pɛro jak kä bum, kä cuɛ ji̱ I-thɛ-rɛl cuɔp lɛɛr guäthdiɛn ëë wäkɛ thi̱n kä thilɛ mi gul riɛk kɛ kɛ. 9Cu ji̱ I-jëp kɛ cuɔp lɛɛr, cu jio̱o̱k Pɛro kɛnɛ thurbiɛɛlikɛ, kɛ ji̱ jio̱o̱knikɛ, kɛ rɛmkɛ kɛ cuɔp lɛɛr kä cukɛ kɛ wä mam piny guäth mi cikɛ pua̱t thi̱n piny wec gekä Bar kä Pi-ɣa-ɣi-rot nhiam Baal-dhɛ-pon.

10Mëë wä Pɛro kɛ ŋäth ikä, cu ji̱ I-thɛ-rɛl leth, cukɛ ji̱ I-jëp nɛn bä kɛ kɔɔriɛn. Cukɛ dual kɛ dual mi di̱i̱t, kä cukɛ Kuoth Nhial cu cɔl kɛ wiee. 11Cukɛ Muthɛ jiök i̱, “Dera thil muɔ̱ni ti dëë kɔ kony thi̱n kä I-jëp ɛn ɔ no̱o̱ŋi ni kɔ raar kɛ jɛ mɔ, a bakɔ ben li̱w rɛy dɔaar mi ce̱tkɛ nɛ? Kua mi ce̱t ŋuään ci lät kä kɔ mi, ɛn ɣöö curi kɔ no̱o̱ŋ raar kä I-jëp? 12Ciɛ jɛn mëë la̱rkɔ ji̱ kä I-jëp i̱, ‘Päl kɔ, a kɔ la̱tkɔ ji̱ I-jëp kä lätkiɛn?’ Kɛ ɣöö dëë ro̱ŋ ni mi cakɔ lät ni ji̱ I-jëp kä lätkiɛn kä ɣöö bakɔ ben li̱w rɛy dɔaar mi ce̱tkɛ nɛmɛ.” 13Cu Muthɛ naath jiök i̱, “/Cuarɛ dual, ka̱pɛ lo̱ckun piny, guɛcɛ ni ka̱n in bi Kuoth Nhial ɛ kään ni yɛ, mɔ bɛ la̱t ɔ wa̱lɛ kɛ kɛn ji̱ I-jëp ti guic yɛn kɛ ti, /cia kɛ bi me̱t nyɔk kɛ nën amäni cäŋ kɛl. 14Bi Kuoth Nhial ko̱run käth ikä, a bi duundun a biɛt.”

Mua ji̱ I-jëp däär baar

15Cu Kuoth Nhial Muthɛ ku jiök i̱, “Ɛŋu ciöli ɣä mɔ kɛ wiee? Läri jɛ ji̱ I-thɛ-rɛl i̱ akɛ ɣöth. 16Kä ji̱n, kapni kɛɛtdu nhial, bi tetdu cu riɛny wi̱i̱ Bar, ku yi̱er cu da̱a̱k däär, kɛ ɣöö bi ji̱ I-thɛ-rɛl Bar ŋuɔk kui̱c a köödtɛ. 17Kä ɣän bä lɔc ji̱ I-jëp jak kä bum, kä bikɛ kɛ guɔ̱ɔ̱r amäni rɛy yiëër. Bä rɔ cu moc kɛ̈k kä Pɛro kɛnɛ rɛmkɛ diaal, kɛ thurbiɛɛlikɛ, kɛ ji̱ jio̱o̱knikɛ. 18Bi ji̱ I-jëp ɛ ku ŋa̱c i̱ ɛ ɣän Kuoth Nhial, mi wa̱a̱ Pɛro kɛnɛ thurbiɛɛlikɛ kɛ ji̱ jio̱o̱knikɛ wä tiam.” 19Cu jääk Kuɔth ëë ci wä nhiam rɛ̈m ji̱ I-thɛ-rɛl rɔɔdɛ woc, cuɛ ben jɔkdiɛn, kä cu pua̱r in ci rɔɔdɛ cuŋ, rɔɔdɛ wä cuŋ jɔkdiɛn bä. 20Cuɛ ben kamä rɛ̈m ji̱ I-jëp kɛnɛ rɛm ji̱ I-thɛ-rɛl. Cuɛ tekɛ pua̱r kɛnɛ muth mi cu wäär cuɔth, kuiy kɛl, kä cuɛ tekɛ buay kui̱c in dɔ̱ŋ. A /ken rɛm rɔ̱ mat ɛn wäär ɛmɔ.

21Cu Muthɛ tetdɛ riɛny wi̱i̱ Bar, kä cu Kuoth Nhial pi̱ Bar cuac jɔk kɛ jiɔam känyä ca̱ŋ mi bum bum kä cukɛ rɔ̱ ke̱k kɛ wäär ɛmɔ kɛɛliw. Cuɛ Bar ko̱t ɛ ɣak, kä cua pi̱ Bar da̱a̱k däär. 22Kä cu ji̱ I-thɛ-rɛl Bar jiɛ̈th kui̱c kɛ duɔ̱ɔ̱p mi kööt, cu pi̱ ce̱t päny cueecdiɛn mäni camdiɛn. 23Cu ji̱ I-jëp ri̱i̱ŋ kɔɔriɛn. Cukɛ wä ni däär Bar, amäni jio̱o̱kiɛn diaal kɛ thurbiɛɛlikiɛn amäni ji̱ jio̱o̱knikiɛn diaal. 24Mëë ruɔ̱ndɛ, mëë pay naath ke̱e̱r, cu Kuoth Nhial rɛm ji̱ I-jëp guiɛc piny kɛ mac kɛnɛ pua̱r mi ti cuŋä wi̱i̱diɛn, cuɛ kɛ riäth. 25Cu thurbiɛɛlikiɛn do̱t, /kenkɛ lɛ wur agɔaa. Cu ji̱ I-jëp wee i̱, “Barnɛ rɔ̱ nhiam ji̱ I-thɛ-rɛl, kɛ ɣöö ci Kuoth Nhial ko̱riɛn ka̱th ikä nyieenyɛ kɛ ji̱ I-jëp.” 26Ɛn wan ɔ, cu Kuoth Nhial Muthɛ jiök i̱, “Rinyni tetdu wi̱i̱ Bar kɛ ɣöö bɛ pi̱ cu nyɔk kɛ le̱y ji̱ I-jëp, bikɛ ji̱ I-jëp cu ben muɔy, kɛnɛ thurbiɛɛlikiɛn, kɛ ji̱ jio̱o̱knikiɛn.” 27Cu Muthɛ tetdɛ riɛy thi̱n, cu pi̱ rɔ̱ nyɔk kɛ ruɔ̱l bakä ni kɛ ciaaŋdiɛn in wen, kä cu ji̱ I-jëp rɔ̱ bänikä kɛn kɛ pi̱, kä cu Kuoth Nhial ji̱ I-jëp cu ma̱r piny Bar. 28Cu pi̱ luny gua̱thnikiɛn kä cuɛ thurbiɛɛli diaal kɛnɛ ji̱ jio̱o̱kni diaal, kɛ rɛm Pɛro diaal tëë guɔ̱ɔ̱rkɛ ji̱ I-thɛ-rɛl muɔy, cuɛ thil ram kɛl mi cu duɔth te̱e̱kä. 29Kä cu ji̱ I-thɛ-rɛl Bar jiɛth kɛ gua̱a̱th mi kööt, a ci pi̱ rɔ̱ ke̱k ala päny cueecdiɛn kɛnɛ camdiɛn. 30Ɛn cäŋ ɛmɔ, cu Kuoth Nhial ji̱ I-thɛ-rɛl kän te̱tni ji̱ I-jëp, kä cu ji̱ I-thɛ-rɛl pua̱ny ji̱ I-jëp tin ci li̱w nɛn thok yiëër. 31Mëë ci ji̱ I-thɛ-rɛl ti̱em in di̱i̱t ëë ci Kuoth Nhial ɛ puɔ̱ɔ̱t ni ji̱ I-jëp nɛn, cukɛ Kuoth Nhial luɔ̱th kä cukɛ jɛ ŋäth, jɛn amäni läätdɛ ni Muthɛ.

Currently Selected:

Ɣöth 14: nusNHB

Highlight

Copy

Compare