Ɣöth 13

Ley Kuɔth key kä ti diaal

1Cu Kuoth Nhial ku ruac kɛ Muthɛ, cuɛ wee i̱, 2“Buɔ̱kɛ ɣä key diaal. Tin diaal tin nhiam tin lapkɛ kɛ nhiam rɛy ji̱ I-thɛ-rɛl, mi ɛ raan kiɛ ɛ le̱y ɛ duŋdä.”

Ŋar jurayä mi thil thuɔp

3Ɛn wan ɔ, cu Muthɛ naath ku jiök i̱, “Tiɛtdɛ cäŋ ëë be̱e̱ kɛ yɛ raar kä I-jëp ɛ, ala cäŋ ëë be̱e̱ kɛ yɛ raar rɛy yie̱e̱nä kɛ ɣöö ci Kuoth Nhial yɛ no̱o̱ŋ raar ɛn wanɛ kɛ tetdɛ min bum, a jɛ thil juray mi te thuɔp mi ba cam kɛ cäŋ ɛmɛ. 4Bia jiɛn ɛn wa̱lɛ mɛmɛ kɛ jɛn pay ɛmɛ min cɔal i̱ Duɔ̱ɔ̱ŋ.#13:4 Duɔ̱ɔ̱ŋ kɛ thok ji̱ Ɣi-bɛ-ru ɛ Abib kiɛ Ni-than. 5Kä mi wä Kuoth Nhial yɛ no̱o̱ŋ muun ji̱ Kɛ-naan, kɛ ji̱ ɣɛ̈th, kɛ ji̱ Ɛ-mor, kɛ ji̱ Iwi kɛnɛ ji̱ Yɛ-buth, jɛn mun ëë cɛ yac i̱ bɛ ka̱m guurikun, mun caak kɛnɛ liɛɛth tuar, la tiɛtdɛ Kuoth kɛ jɛn pay ɛmɛ inɛ, 6bia juray mi thil thuɔp a camɛ kɛ ni̱n bärɔw, kä bi bärɔw ni̱ni tɔ̱tɔ̱ a cäŋ mi̱thni kɛ kui̱ Kuɔth Nhial. 7Kɛ ni̱n bärɔw bia la camɛ ni juray mi thil thuɔp. Thilɛ mi̱eth mi ba nɛn ca la̱t kɛ thuɔp kä yɛ, kä thilɛ thuɔp mi ba nɛn rɛy röölun kɛɛliw. 8Kä bia jɛ dhil luɔ̱k lo̱cni gankun ɛn cäŋ ɛmɔ i̱, ‘Nɛmɛ ɛ cäŋ mi tiɛmkɛ ni mëë ci Kuoth Nhial jɛ lät kä kɔ mëë bakɔ raar kä I-jëp.’ 9Kä ba biɛl te̱tnikun, kä ba ŋi̱eec nhiamdun mi timɛ ɣöö bia lueek Kuɔth Nhial ka̱p thokdun gua̱thni diaal. Kɛ ɣöö ci Kuoth Nhial yɛ ka̱m raar kä I-jëp kɛ tet mi bum. 10Bia ŋut ɛmɛ a la̱tdɛ kɛ gua̱a̱thdɛ min ca mɛk, run kä run.

Key

11“Kä mi wä Kuoth Nhial yɛ wä no̱o̱ŋ muun ji̱ Kɛ-naan, ce̱tkɛ mëë cɛ ya̱c yɛ, kä cɛ ya̱c guuri, kä bɛ ka̱m yɛ, 12yɛn bia key diaal tin nhiam lɛ̈y go̱lä kɛ kui̱ Kuɔth Nhial. Key ɣɔ̱ɔ̱kun diaal tin tut, bikɛ a nyin Kuɔth Nhial. 13Key muɔ̱likun diaal bia kɛ a luɛ̈lɛ kɛ rue̱e̱th de̱e̱t, kä mi /cia kɛ bi luɛl, la tölɛ ŋua̱kkiɛn. Key nath diaal rɛy gankun tin dhɔɔl bia kɛ la luɛ̈lɛ. 14Mi wä gua̱a̱th cop in ba thi̱ec ni yɛ ɛ gaatkun i̱, ‘Nɛmɛ luɔtdɛ ɛŋu?’ Bia kɛ dhil jiök i̱, ‘Mëëdan ci Kuoth Nhial kɔ no̱o̱ŋ raar kä I-jëp, kɛ buɔ̱m te̱tädɛ, guäth yie̱e̱nä mëë ca kɔ yiɛn thi̱n ala ja̱a̱ŋ. 15Kɛ kui̱ kä ɣöö mëë ci Pɛro lɔcdɛ buɔ̱m lo̱kɛ ɣöö wakɔ raar, cu Kuoth Nhial key diaal näk muun I-jëp, key nath diaal, amäni key ɣɔ̱ɔ̱k diaal. Kɛ kui̱c ɛmɔ key diaal tin tut, la kɛ a na̱kɛ Kuoth Nhial, kä key gan diaal tin dhɔɔl la kɛ a luɛ̈l kɛ.’ 16Bɛ ce̱tkɛ biɛl te̱tnikun kɛnɛ nhiamdun, kɛ ɣöö ci Kuoth Nhial kɔn ka̱m raar kä I-jëp kɛ tet mi bum.”

Jiɛn ji̱ I-thɛ-rɛl cukɛ a I-jëp

17Täämɛ, mëë ci Pɛro naath pa̱l wä, /ken Kuoth kɛ bo̱th kɛ duɔ̱ɔ̱p in wä kɛ ro̱l ji̱ Pi-li-thɛt, cäŋɛ mëë thia̱k ni jɛn, kɛ ɣöö ci Kuoth ɛ car i̱, “Dɔ̱ŋ bi naath lɔcdiɛn jiath a bikɛ rɔ̱ riet kä I-jëp mi wa kɛ ka̱p ko̱r dup.” 18Kɛ kui̱ ɛmɔ, cu Kuoth nɛɛkɛ bo̱th kɛ duɔ̱ɔ̱p dɔaar mi wä kɛ gëk Bar Gutdä. Cu ji̱ I-thɛ-rɛl cu jiɛn ro̱o̱l I-jëp, cikɛ yio̱w kööriɛn guath. 19Cu Muthɛ cɔ̱w Jo-thɛp naŋ kɛ jɛ kɛɛl kɛ ɣöö ci Jo-thɛp bit mi bumbum la̱t kɛ ji̱ I-thɛ-rɛl, cuɛ kɛ jiök i̱, “Bi Kuoth yi̱k ben, bɛ yɛ ben gui̱l, naŋɛ cɔ̱wkä kɛ yɛ kɛɛl kä wuɔcɛ kɛ muun ɛmɛ.” 20Kä cukɛ ɣöth kä Thu-koth, kä cukɛ wä pua̱t kä E-tham thok dɔaar. 21Cu Kuoth Nhial kɛ bo̱th, kɛ cäŋdäär bo̱o̱thɛ kɛ kɛ pua̱r mi ci rɔ cuŋ nhiamdiɛn mi nyuth kɛ duɔ̱ɔ̱p. Kä bo̱o̱thɛ kɛ kɛ wäär kɛ pua̱r maac mi pɛt mi me̱r kɛ duɔ̱ɔ̱p kɛ wäär, kɛ ɣöö bikɛ cu tëë gua̱a̱th mi jäl kɛ kɛ, kɛ cäŋdäär kɛnɛ wäär. 22/ken pua̱r mi ci rɔ cuŋ kɛ cäŋdäär kä bi lɛ jɔɔc ala mac kɛ wäär, gua̱a̱thdɛ me̱t päl nhiam nath.

Currently Selected:

Ɣöth 13: nusNHB

Highlight

Copy

Compare