Ɣöth 12

Cäŋ bälä

1Cu Kuoth Nhial Muthɛ kɛnɛ Ä-ron jiök ro̱o̱l I-jëp i̱, 2“Pay ɛmɛ ba paydun mi tuk päthni, runä kä yɛ. 3Läri jɛ buɔ̱n I-thɛ-rɛl kɛɛliw i̱, ‘Kɛ cäŋ kä wäl paay ɛmɛ, a thok duëël ɔ moc rɔ ruath dɛ̈ɛ̈l rɔmä ni kɛ pe̱k gɔali gua̱nikun, a ciëŋ ɔ tëë ruath dɛ̈ɛ̈lɛ. 4Kä mi wä ji̱ ciëŋ kuɛ̈ɛ̈ a /cikɛ dɛl dëë thuk kɛ mi̱eth, a cieŋ ɛmɔ mät rɔ ji̱ thie̱e̱kädɛ kɛ pe̱k nɛɛni tin bi ro̱ŋ kɛ thuɔ̱k dɛ̈ɛ̈l ɛmɔ, bia pe̱kdun kuɛn, kä bia kui̱c in bi ram kɛl ɛ cam ŋa̱c. 5Ba ruath dɛ̈ɛ̈l mi thil mɛ̈ɛ̈ny, kä ba gur kɛl, ka̱nɛ jɛ rɛy rɔɔmni kiɛ böwni. 6Bia yian piny amäni mi wä cäŋ kä wäl ŋuaan ɛn paay ɛmɛ cop. Guäth in bi buɔ̱n ji̱ I-thɛ-rɛl diaal kɛ na̱a̱k mi̱rä ɛn cäŋ ɛmɔ. 7Bikɛ riɛm mi tɔt ka̱n kä bikɛ jɛ yiɛny wäthni thiek da̱ŋ rɛw amäni wuɔ̱th thiekni duëli tin ba det tɔ̱tɔ̱ wä cam thi̱n. 8Bikɛ ri̱ŋ ɛmɔ dhil cam ɛn wäär ɛmɔ, ala ri̱ŋ mi buɔ̱l, kä ba cam kɛɛl kɛ jurayni ti thil thuɔp, matdiɛn amäni juac mi kɛc kɛc ba cam bä ɛ kɛn. 9/Cuɔrɛ ri̱ŋ mi tëk kiɛ mi ca thal kɛ pi̱ cam. Buɔ̱lɛ jɛ kɛ ruɔlɛ, kɛ wi̱cdɛ kɛnɛ ciökɛ amäni nyin jiɛcdɛ diaal. 10A jɛ thil mi doth mi bi runwaŋ ɛ jek. Mi wëë tekɛ mi bi runwaŋ ɛ jek, a waŋkɛ. 11Kä bia cam inɛ, bia mi̱th a cia läk lɛtnikun duɔt, kä cia wa̱a̱rikun kuëŋ, kä te kɛtnikun te̱tnikun. Kä bia mi̱th ɛ yuäl yuäl kä dualɛ. Ɛn nɛmɛ ca cäŋ Bälä Kuɔth Nhial#12:11 Cäŋ Bälä ɛ jɛn cäŋ ëë ci Kuoth Nhial kuak ji̱ I-thɛ-rɛl thi̱n kä cuɛ kɛ gɔ̱l kiɛ cuɛ kɛ gaŋ.. 12Kɛ ɣöö ɣän bä rët kɛ rɛy muɔ̱ɔ̱n I-jëp ɛn wääri ɛmɔ, na̱kä key diaal muun I-jëp, key nath a amäni key le̱e̱ni, amäni kuth I-jëp diaal, bä kɛ luk. Ɛ ɣän puɔ̱nydä Kuoth Nhial. 13Bi riɛm a nyuuth kä yɛ duëlikun tɔ̱ ciaŋɛ tɔ̱, mi wa̱a̱ riɛm wa̱a̱ nɛ̈ɛ̈nä, bä yɛ bäl, kä bia cu kään rikä li̱eth kɛ cäŋ in wa̱a̱ ji̱ I-jëp näk. 14Bi cäŋ ɛmɔ a cäŋ ti̱mä kä yɛ, ba cäŋ mi̱thni tɛthä lɔaacdun kɛ kui̱ Kuɔth Nhial, kä ri̱ckun diaal, ba ŋut mi bia la tiɛtdɛ amäni cäŋ kɛl.’ ”

Juray dolä mi thil thuɔp

15Kä cu Kuoth Nhial wee i̱, “Täämɛ, yɛn bia juray mi thil thuɔp cam kɛ ni̱n bärɔw, kɛ cäŋ in jio̱l bia thuɔp a wuɔcɛ duëlikun, kä mi bɛ tekɛ ram mi wä juray mi tekɛ thuɔp cam, ni kɛ jɛn cäŋ in tuɔɔkɛ thi̱n, amäni bärɔw ni̱ni, ram ɛmɔ ba tuɔ̱k raar kä ji̱ I-thɛ-rɛl. 16Kɛ cäŋ in nhiam bia dhil duɔl kɛ pal, kä kɛ bärɔw ni̱ni bia dhil duɔl thi̱n kɛ pal. Thilɛ la̱t mi bia la̱t ni̱ni tɔ̱tɔ̱. Bia la̱t ni pe̱k mi̱ethdun in bia cam kärɔa. 17Bia juray dolä mi thil thuɔp a la̱tdɛ kä bia la tiɛtdɛ kɛ ɣöö ɛ cäŋ ti̱mä ca̱ŋ ëë ka̱mä bun nɛɛnikun raar muun I-jëp kɛ jɛ. Kɛ kui̱ ɛmɔ, bia cäŋ ɛmɔ la tiɛtdɛ, kä bia lätkɛ la̱t ni ri̱cnikun diaal ala ŋut mi bi duth thi̱n a amäni cäŋ kɛl. 18Kɛ jio̱l päthni, kɛ cäŋ kä wäl ŋuaan kä pay kɛ thiaŋ, bia juray mi thil thuɔp la cam ɛ, bi amäni cäŋ kä jiɛn rɛw wi̱cdɛ kɛl kɛ thiaŋdɛ. 19A jɛ thil thuɔp mi la jekɛ rɛy duëlikun kɛ kɛn ni̱n da̱ŋ bärɔw tɔ̱tɔ̱, kä mi bɛ te̱e̱ ram mi bi juray mi tëë thuɔp cam, ram ɛmɔ ba jɛ tuɔ̱k raar bunä I-thɛ-rɛl. Cäŋɛ ja̱l kiɛ raan wec, ba tuɔ̱k raar. 20Thilɛ mi tekɛ thuɔp mi bia cam. Bia la camɛ ni mi thil thuɔp gua̱thnikun diaal tɔ̱ cieŋɛ thi̱n tɔ̱.”

Cäŋ bälä in nhiam

21Ɛ jɛn, cu Muthɛ bööth I-thɛ-rɛl diaal cɔl, cuɛ kɛ jiök i̱, “Go̱rɛ rɔ̱ rue̱e̱th de̱e̱t rɔɔmni ni kɛ pe̱k gɔalikun, kä na̱kɛ ruath dɛ̈ɛ̈l Bälä mi rɔaam. 22Ka̱nɛ yi̱ec, cua̱thɛ jɛ riɛm in cia gam thaak. Yiɛnyɛ wi̱c thi̱ek kɛnɛ wäthni thi̱ek da̱ŋ rɛw kɛ jɛ, kä a thil ram mi käny raar thok duëëlɛ kä yɛ, amäni ruun kɛ runwaŋ. 23Kɛ ɣöö bi Kuoth Nhial ben bɛ ji̱ I-jëp ben näk, kä mi wëë riɛm wä nɛn wi̱i̱ thi̱ek nhial kɛnɛ wäthni thi̱ek da̱ŋ rɛw, jɛn bɛ thi̱i̱k ɛmɔ bäl, kä /cɛ nääk bi nhök ben rɛy duëlikun kɛ ɣöö bɛ yɛ ben näk. 24Bia duŋ Kuɔth ɛmɛ a tiɛtdɛ kä bia jɛ la la̱tdɛ ala ŋut mi ka̱pɛ rɔ̱ amäni gaatkun kä bɛ te thi̱n amäni cäŋ kɛl. 25Kä mi wiaa wä ben muun ɔ bi Kuoth Nhial ɛ ka̱m yɛ mɔ, ni kɛ thuɔ̱k ëë cɛ gok kɛ thokdɛ, bia la̱t ɛmɛ yop. 26Kä mi wä gaatkun yɛ wa̱a̱ thieec i̱, ‘Luɔtdɛ ni ŋu kɛ mi la̱tdɛ mi?’ 27Bia kɛ a jiökɛ i̱, ‘Nɛmɛ ɛ luur mi na̱kɛ Cäŋ Bälä Kuɔth Nhial, kɛ ɣöö cɛ duël ji̱ I-thɛ-rɛl bäl kä I-jëp, mëë näkɛ ji̱ I-jëp, kä cuɛ kɔ päl.’ ” Cu naath rɔ̱ goŋ kɛ pal. 28Cu ji̱ I-thɛ-rɛl wä la̱t niɛ min ci Kuoth Nhial jɛ guɔ̱k Muthɛ kɛnɛ Ä-ron.

10. Lia̱a̱ keyni rööl I-jëp

29Cu Kuoth Nhial key diaal muun I-jëp näk kɛ wäärdäär cuɛ jɛ tok ni kɛ kɛ̱̈ɛ̱̈ Pɛro in la kuäär, cu amäni key nɛɛni tin ca yian duel yienä a amäni key ɣɔ̱ɔ̱k. 30Cu Pɛro rɔɔdɛ jiɛc kɛ wäärdäär, jɛn kɛnɛ ji̱ kɔaarɛ diaal, kɛ ji̱ I-jëp diaal, cuɛ tekɛ lul mi di̱i̱t rɛy I-jëp, kɛ ɣöö cuɛ thil due̱l kɛl mi cu lɔ̱ɔ̱ŋ a thilɛ ram mi ci li̱w thi̱n. 31Cuɛ Muthɛ kɛnɛ Ä-ron cɔl kɛ wäär, cuɛ kɛ ben jiök i̱, “Jiɛ̈cɛ rɔ̱, wiaa raar rɛy nɛɛnikä, yɛn kɛ ji̱ I-thɛ-rɛl, wiɛ̈ɛ̈ palɛ Kuoth Nhial ce̱tkɛ mëë cia lar. 32Ka̱nɛ ɣɔ̱ɔ̱kun, kɛ de̱tkun ce̱tkɛ mëë cia lar, jiɛ̈yɛ, kä puɔthɛ ɣä bä.” 33Kä cu ji̱ I-jëp pɛ̈th kɛɛl kɛ naath. Kä cukɛ naath thuɔl raar rɛy wec ɛ yuäl yuäl, kɛ ɣöö cikɛ jɛ lar i̱, kɛ ɣöö mi canɛ jɛ bi la̱t, banɛ li̱w kɔn diaal. 34Ɛ jɛ nɔ, cu naath nup juraynikiɛn tin ca läny a thil thuɔp ka̱n a /kenkɛ ni wac, kɛ kuak pa̱t juraynikiɛn cukɛ kɛ duɔt kä rɛy bieynikiɛn tin kuɛr kä cukɛ kɛ kap kɛ wuɔ̱ɔ̱kiɛn. 35Cu ji̱ I-thɛ-rɛl la̱t ni min ca la̱r kɛ ɛ Muthɛ, kɛ ɣöö cukɛ ji̱ I-jëp thi̱ec kɛ kuat kɛnɛ tiil cikä kɛnɛ da̱a̱p amäni bieyni. 36Kä cu Kuoth Nhial naath ja̱a̱l kɛ cio̱o̱k cuëëc nhiam ji̱ I-jëp, cu ji̱ I-jëp kɛ thöp tin ca thi̱ec. Cukɛ nyin ji̱ I-jëp cu naŋ inɔ.

Jiɛɛn ji̱ I-thɛ-rɛl kä I-jëp

37Cu ji̱ I-thɛ-rɛl tɛth piny kä Ra-mɛ-theth, wäkɛ kä Thu-koth, wutni ti bathdɔɔri ti kur bäkɛl ti jäl kɛ ciökiɛn, a /ca män kɛnɛ dho̱li kuɛn thi̱n. 38Cu bun ti di̱t ti ca rɔ̱ liam rɛydiɛn wä kɛɛl kɛ kɛ bä, amäni bun de̱e̱t kɛnɛ bun ɣɔ̱ɔ̱k ti ŋuan. 39Kä cukɛ jurayni ti pat paat ti thil thuɔp bul nuɔ̱p jurayni mëë no̱o̱ŋkɛ kä I-jëp, kɛ ɣöö /kenɛ rɔ kɔ̱p, kɛ mëë tuɔ̱kɛ kɛ raar kä I-jëp, cikɛ cu thil gua̱a̱th mi dëë liep kɛ kɛ, kä thilɛ mi̱th ja̱l ti ca rial ikä kɛ kui̱diɛn. 40Run tëë cieŋ kɛ ji̱ I-thɛ-rɛl kä I-jëp, kɛ run ti kur ŋuaan wi̱cdɛ jiɛn diɔ̱k. 41Kä kɛ jɛn pe̱k runi tɔ̱ kur ŋuaan wi̱cdɛ jiɛn diɔ̱k tɔ̱tɔ̱, ni kɛ jɛn cäŋ ɛmɔ pa̱ny, cu nɛɛ Kuɔth Nhial bunkiɛn diaal wä raar kä I-jëp. 42Ɛ jɛn wäär ëë jiɛn Kuoth Nhial thi̱n kɛ ji̱ I-thɛ-rɛl kɛ no̱o̱ŋdiɛn raar muun I-jëp. Wäär ɛmɔ ɛ jɛn wäär in la tiɛmkɛ Kuoth Nhial thi̱n ɛ ji̱ I-thɛ-rɛl diaal ri̱cnikiɛn diaal ala cäŋ ëë cɛ kɛ yop thi̱n kä ji̱ I-jëp.

Ŋuɔ̱t ca̱ŋ Bälä

43Täämɛ, cu Kuoth Nhial Muthɛ kɛnɛ Ä-ron ku jiök i̱, “Ti̱ti̱ kɛ kɛn ŋuɔ̱t ca̱ŋ bälä. Thilɛ ram mi röl mi bi mi̱thkɛ cam. 44Kä bi ja̱a̱ŋ diaal tin kɔakɛ kɛ yio̱w mi̱thkɛ cam mi ca kɛ cuɛl. 45/Ci ram mi duundɛ jääl kɛnɛ ram mi duundɛ la̱t mi̱thkɛ bi cam. 46Ba thuɔ̱k piny due̱e̱l kɛl, /cia ri̱i̱ŋdɛ bi naŋ raar due̱e̱l, kä /cia cɔa̱a̱dɛ bi to̱l. 47Bi bun ji̱ I-thɛ-rɛl nɔmɔ la̱t. 48Kä mi wä ram mi röl ja̱l kɛɛl kɛ yɛ, kä go̱o̱rɛ ɣöö bɛ Kuoth Nhial la tiimɛ kɛ cäŋ Bälä, a tut nɛɛnikɛ diaal cuɛ̈lkɛ, bɛ jɛ cu tit kɛ yɛ kɛɛl, bɛ cua raan wec kɛl kɛ yɛ kä /ci ram mi /ka̱n cuɛl bi mi̱th ɛn mi̱thni tɔ̱tɔ̱. 49Ba luek kɛl mi yiɛɛn raan wec kɛnɛ ram mi ja̱l mi te rɛydun.”

50Cu ji̱ I-thɛ-rɛl diaal lät ni nɔ. Cukɛ kɛ la̱t ni kɛ jɛn duɔ̱ɔ̱p ëë ci Kuoth Nhial ɛ guɔ̱k Muthɛ kɛnɛ Ä-ron. 51Kä cu Kuoth Nhial bun ji̱ I-thɛ-rɛl diaal ka̱m raar muun I-jëp niɛ cäŋ ɛmɔ pa̱ny.

Currently Selected:

Ɣöth 12: nusNHB

Highlight

Copy

Compare