ETALEYEHINA 6

Eduanyiti

1Attati ni igonyuna Olosobe awalak eduanyit etteri jio eduanyiti huna hattarik, ette ni itaniŋuna obo jio asaŋ huna aŋuan hunne isui 'to iloŋo te etuk anna ara ihuo etiri hilai jio, “Waŋ!” 2Ami ni ihuania, ette ni igonyuna obo akusan aboŋ. Oŋuahatio nyia lia, linyia adahari 'to inyi, arraŋ. Isiarani nyia jihonyi egoriai, buo inyi ette leten addi a hetatturoni, irriehiniere amiorok honyi.

3Attati Olosobe iwalak eduanyit etarrihi, ette ni itaniŋuna ariŋ etarrihi enne isu 'to ojio jio, “Waŋ!” 4Ette obo akusan ariet ittuna. Isiori nyia agolon jio, lia linyia adahari 'to inyi, iyaŋuniere afere lifau jio, oŋida aati hutta fau ottohie ahuattek. Isiori nyia jihonyi ademi erremit enne ittok.

5Attati Olosobe iwalak eduanyit etahunihi; ette ni itaniŋuna ariŋ etahunihi enne isu 'to ojio jio, “Waŋ!” Ami ni ihuania, ette ni igonyuna obo akusan emoli. Ottoŋotio nyia lia, linyia adahari 'to inyi, amijan ekemit. 6Etayiru nyia ni obo ariŋ ihuo etuk, ottu tehiji hirre huna aŋuan hunne isui 'to, ette jiaran jio, “Iŋohini amoyya huno oloŋ abotie ikilo hifua ometi ijiai, buo fe iŋohini amoyya huno oloŋ abotie ikilohien hunihoi huno efua jatta ijiai. Ati hètarrohojata eŋuro iko amana fino!”

7Attati Olosobe iwalak eduanyit etaŋuani; ette ni itaniŋuna ariŋ etaŋuani enne isu 'to ojio jio, “Waŋ!” 8Ami ni ihuania, ette ni igonyuna obo akusan ahiddaŋ. Ifurani nyia lia, linyia adahari 'to inyi, Naye. Ijifuno nyia Amaji Hayak inyi nyik nyik. Isiarani nyia jihosi elohittok jio ebuanyit etaŋuani ono afau ittohiere aati ta arrem, ta ahure, ta aŋuai iko ta aciaŋi ahuanyak.

9Attati Olosobe iwalak eduanyit etamiyeti; ette ni igonyuna oloholioo hia, hinyia ottohori te ettittoyo hosi asayyo Hollum onno oyyu. Owoni nyia oloholioo hunia iwoyo ititiek ehumi. 10Iwuwoŋitai nyia isi jiojio, “Lamonye, Laduarani, olibo buo fe ara ahode! Many baya 'tadi ittu iyye iŋot eram waati hutta fau, inienuniere attohoro hosi hohoi.” 11Aharani nyia jihosi 'daŋ ababo aboŋojin abuoŋi, ette iramana isi iyiriari obo kai, many ottubari anamba ono egiamak iko eruhok hullomuk 'daŋ hullo ofuoi ittohoro, ihuo ninyia ottohorik isi.

12 # Eta 11:13; Mat 24:29; Mar 13:24-25; Luk 21:25 Ninyia awalak Olosobe eduanyit etilleji, ette ni imi; ottu nyia olokitik onno orroho bebe, ette oloŋ iriok 'tir 'tir ihua aboŋo emoli, buo ayafa ette daran ariet ihuo nooto. 13Oddoddouni nyia elelefi ifau ihua aŋabolo hunne hefolleji 'to hunne ipipuos oyyami onno ohut 'to bebe. 14#Eta 16:20Olitohi nyia edou ihua agagar onno obobinie, buo ette ituhut adoŋiok 'daŋ ababo iko afuli ta masik hosi. 15Attati obuok fau iko elettaha, ojio ajafiti oseŋer, asamak, aati hullo ohuji 'to bebe, atulo 'daŋ, apiti iko hullo obeŋi 'to arai apiti, idima inomi iko iwok muruoi hutto doŋiok. 16#Luk 23:30Iloŋoi nyia isi adoŋiok iko amoruoi jiojio, “Okuahiniete jihohoi! Itihonia hohoi to hosiere lia elle itoŋo 'to iseger ilohittok iko jio ajore ono Olosobe! 17Nyio, afany oloŋ onno ofuarik isi ittigemiere aati 'daŋ. Ŋai adi oremik iwojuna inyi?”

Currently Selected:

ETALEYEHINA 6: EA2003

Highlight

Copy

Compare