Marko 9

1Attati inyi inyiak jiaran jihosi, “Hode, eramak ni itai, owoni omuk dini hullo obeŋi adi igonyuni aye many igonyunierek isi Olobie Hollum ottu ta agolon.”

Iloito Omom Yesu onno Olufa

(Mat 17:1-13; Luk 9:28-36)

2 # 2Pet 1:17-18 Ihalu oŋitek ille, iyaru nyia Yesu Petro, Yakobo iko Yoane, ette ifuatan isi hama ihide doŋe onno ohodo 'to. Buo diya, ihosiere hosi 'daŋ, iloito nyia omom honyi onno olufa, 3buo fe aboŋojin honyi ette ipipiahi biny biny abuoŋi agalihini hunne illilla tulo ta fau 'daŋ. 4Attati isi 'daŋ hunihoi igonyuna Elija iko Mose ikianai iko Yesu. 5Ette Petro jiaran jio Yesu, “Hettiyanani, oyyu jihohoi iwanari dini! Eduhok adi hohoi aticio hunihoi; abotie jihoi, abotie jio Mose, buo fe abotie jio Elija.” 6Obeŋ nyia Petro omijak eken adi inyi anyio hirre; nyio abaŋi nyia isi bebe.

7 # Mat 3:17; Mar 1:11; Luk 3:22 Attati edohuo imuluhana isi te nedis hosi, buo ekiana ette ittuna totua idohuo onno ojio, “Lonyi hoŋ alia, ollo obuor ataji hoŋ, itayiriete jihonyi.” 8Ninyia amiji isi kuak ihuania, obeŋi nyia isi igonyuni obo atulo, arari fe Yesu hama.

9Ninyia isuruni isi to doŋe, ette Yesu ihum iramana isi jio, “Hèramana obo atulo erre hunne igonyuna itai, many ibuhuniere Lonyi Tulo toye.”

10Ania, ette isi iduahiniere eram ania, buo ikikianai isi hama jiojio, “Ojio awoyo hiram ono ‘ebuhuna toye’ anyio?” 11#Mat 11:14Attati isi ifiyo inyi jio, “Nyioti, ojiori ettiyanak ifahita jio, oŋida Elija ottu do ahosiere?”

12Itarraŋ inyi isi ojio, “Ottu adi Elija luŋa ahosiere ihuhumaniere erre 'daŋ. Nyioti igioroni Ibuk Hollum jio, ittigemie adi Lonyi Tulo bebe ette ihara inyi? 13Ati, eramak ni itai jio, lattu nyia Elija buo isi ette ihanio jihonyi ihuo awahi isi, ihuo enne igioronierek Ibuk Hollum tenyi.”

Itaŋida Yesu Leto Ollo Owon 'to iko Aminiaŋati

(Mat 17:14-21; Luk 9:37-43a)

14Ninyia acohunie isi jio lejifak hullomuk, igonyuna nyia isi eluluŋ waati enne ittok okudani isi, buo isi itarisai iko omuk ettiyanak ifahita. 15Illillihai nyia aati bebe ninyia igonyuni isi Yesu, ette iŋioron jihonyi, ette ifonya inyi. 16Attati Yesu ifiyo lejifak honyi jiojio, “Anyio riŋ enne itarisati itai iko isi?”

17Buo lobo atulo teluluŋ ette itarraŋ ojio, “Hettiyanani, eyaŋuno duo ni Lonyi hoŋ jihoi, nyio, owon inyi iko aminiaŋati enne itik inyi ekiana. 18Elle inef aminiaŋati ania inyi, obuaratta inyi, buo obulal ette ittutta totto hutuk, ette inyi iŋuruta aala, ette ahuan honyi igolioro koŋodor. Efiyo duo ni lejifak hoi hétefuhahi aminiaŋati ania addi, ati ittallihi duo isi ifuhara.”

19Buo Yesu ette itarraŋ isi ojio, “Aii, itai aati hullo obeŋ eruk! Etoŋo adi ni ikatai many baya? Many baya adi adik ni itai? Iyaŋuniete leto alia jihoŋ!” 20Ette isi iyaŋuno inyi jio Yesu.

Teya teya, ninyia igonyu aminiaŋati ania Yesu, ette inyi inef leto alia ette leto alia kuaharu ifau, ette ibalaŋatio buo obulal ette ittuna totto hutuk. 21Attati Yesu ifiyo monye hito jiojio, “Many baya ara inyi ihuania?”

Buo inyi ette itarraŋ ojio, “Many hara ahito. 22Enyiahita arriai itakuahitta aminiaŋati ania inyi itua hima iko itua hari ittohori inyi. Ati elle iremik iyye itaŋida inyi, omehinie jihohoi! Oluaha hohoi!”

23Buo Yesu ette itarraŋ inyi ojio, “Nyio ijio iyye, elle iremik iyye, oremik atulo ollo owon 'to iko eruk ihanio erre 'daŋ.”

24Teya teya, ette monye leto alia iyyoo jiojio, “Awon ni iko eruk. Ati omuta, oluaha nani, inyiaha ifuanana jihoŋ obo!”

25Ninyia igonyu Yesu eluluŋ waati ihuhutu ajihosi, ette inyi iŋerejanio jio aminiaŋati ania jiojio, “Iyye aminiaŋati enne itattuhio 'to buo fe itik ekiana, ehum ni iramana iyye, ojiŋu addi jio leto alia, hènyiak ijiŋana jihonyi 'tuŋ!”

26Attati aminiaŋati ania ituruho, ette isiarana leto alia aahue onno orroho bebe, ette ijiŋuna addi; ette leto alia irahan ihuo ayaani, buo aati 'daŋ ette jiaran jio, “Aye inyi!” 27Ati inef nyia Yesu aani leto alia, ette itadetuna inyi, ette inyi iwotia.

28Ninyia lajiŋak Yesu itua haji ette lejifak honyi ifiyo inyi buo isi owoni isi hama jiojio, “Nyio duati ettallik hohoi ifuhara aminiaŋati ania addi?”

29Itarraŋ nyia Yesu isi ojio, “Oremehini ifuhara ariŋ anna ara 'to ihuania ta amojo hama, buo obiaŋara to obo ariŋ.”

Inyiak Yesu Ikiana Eram Ye Honyi

(Mat 17:22-23; Luk 9:43b-45)

30Ninyia alo Yesu iko lejifak honyi teya, ofuoi nyia isi totto Galilea. Obeŋ nyia inyi awak obo atulo oŋida omijak amaji anna awanari inyi. 31Nyio, ittiyenio nyia inyi lejifak honyi jio, “Isiori adi Lonyi Tulo ihas waati. Ottohori adi isi inyi, buo attohori inyi, itubuhuni adi inyi ihalu oŋitek hunihoi.”

32Obeŋi nyia lejifak omijani ojio ekiana ania anyio, ati abaŋi nyia isi ifiyere inyi.

Ŋai alla Agalik 'to 'Daŋ

(Mat 18:1-5; Luk 9:46-48)

33Ofuoi nyia Yesu iko lejifak honyi many Kapernaum. Buo ninyia ajiŋani isi itua haji, ette inyi ifiyo isi jio, “Anyio eduo itarisati itai ihiji ikoi?”

34 # Luk 22:24 Ati Obeŋi nyia isi itarraŋi inyi nyio, itarisai nyia isi ihiji ikoi jiojio, ŋai tehiji hosi alla agalik 'to 'daŋ. 35#Mat 20:26-27; 23:11; Mar 10:43-44; Luk 22:26Ania, ette Yesu iwoniara, ette iloŋuna lejifak honyi hula 'tomon harrihai, ette jiaran jihosi, “Alla awak obo irahan etteri, ijiara inyi luŋa hétera esidi iko ahegiamani olo aati 'daŋ.” 36Attati inyi irihuna eto, ette itawojihina ihiji hosi, ette ikafuna inyi ta ahas honyi, ette jiaran jihosi, 37#Mat 10:40; Luk 10:16; Yoa 13:20“Lia, elle ifuotu 'to eto ollo odiha 'to olo ta afure hoŋ, ifuotu inyi ani; buo lia, elle ifuotu 'to ani, obeŋ inyi ifuotu ani, ati ifuotu inyi lia, elle ifahu 'to ani.”

38Attati Yoane jiaran jihonyi, “Hettiyanani, egonyu duo hohoi obo atulo ifuhatio aminiaŋa ta afure hoi, ette hohoi itik inyi, nyio obeŋ inyi ara teluluŋ hohoi.” 39Ati iramak nyia Yesu inyi jiojio, “Hètihoto inyi; nyio, obeŋ obo oremik ihanio eduariti ta afure hoŋ buo ihalu olo ittarrohojio afure hoŋ. 40#Mat 12:30; Luk 11:23Nyio, lia ollo obeŋ 'to oliwari hohoi, ara inyi aholohoi. 41#Mat 10:42Hode, eramak ni itai jio, lia elle isio 'to jihatai aari amatat, ta arahan hatai a huloŋ, ifuotu adi inyi luŋa esiorita honyi.

42“Lia, elle isusuhi 'to obo jio eruhok hoŋ hulo iyyauniere, osiru ifitani noonye hiriai imurut honyi, ette ibironia inyi itua hari enne ittok. 43#Mat 5:30Elle iyaru aani hoi iyye iyyauniere, oŋutoi inyi addi, iyyak jihoi ilari jio esu 'tulaŋ buo iwon iko aani abotie, agalik jihoi ilari ihima onno osio 'to 'tulaŋ iko ahas arrihai. 44[Diya, ‘Obeŋi ahuru hunno oŋiye 'to isi oye, buo fe eema onno omudio 'to isi obeŋ odunya.’] 45Buo elle iyaru eju hoi iyye iyyauniere, oŋutoi inyi addi; iyyak jihoi ijiŋaniere jio esu 'tulaŋ iko eju abotie, agalik ijiŋaniere ihima onno osio 'to 'tulaŋ iko eejek arrihai. 46[Diya, ‘Obeŋi ahuru hunno oŋiye 'to isi oye, buo fe eema onno omudio 'to isi obeŋ odunya.’]#9:46 Obeŋ ekori (46) ana jio omuk egierita (imija 48). 47#Mat 5:29Buo elle itadihoro onyek hoi iyye iyyauniere, ogolotu inyi addi; iyyak jihoi ijiŋaniere Ilobie Hollum iko onyek abotie agalik ibironiere iyye iko oŋite arrihai ihima onno osio 'to 'tulaŋ. 48Diya, ‘Obeŋi ahuru hunno oŋiye 'to isi oye, buo fe eema onno omudio 'to isi obeŋ odunya.’

49“Italibori adi aati 'daŋ te eema ihuo enne italiborierek ehumi ta amile.

50 # Mat 5:13; Luk 14:34-35 “Oyyu amile, ati elle ilik inyi, inyiak adi iyye eduarit honyi aŋai?

“Awanata iko amile imanya hatai, buo fe itoŋoti te elik tajia.”

Currently Selected:

Marko 9: EA2003

Highlight

Compare

Copy