Marko 10
10
Ittiyenio Yesu Eram ono Apiaha
(Mat 19:1-12; Luk 16:18)
1Odioto nyia Yesu, ette leten Yudea, ette illaŋan afohor owore Yordano tole. Buo eluluŋ waati ette inyiak ittubanio jihonyi, buo inyi ette ittiyenio isi ihuo toloŋi.
2Ofuonni nyia omuk Farisei jihonyi. Awahi nyia isi italohuna inyi, ette isi ifiyo inyi jiojio, “Iramak hohoi, aŋatani soho efahita hohoi atulo opiahai iko ŋoruoi honyi?”
3Attati Yesu itarraŋ isi jio, “Anyio ifahita hunyia isiarak Mose jihatai?”
4 #
Edasita 24:1-4; Mat 5:31 Itarraŋi isi ojio, “Aŋatak nyia Mose atulo isiarak ŋoruoi honyi awaraga ono apiaha, buo ette ifuhara.”
5Ati ojio nyia Yesu jihosi, “Igiorok nyia Mose jihatai efahita hunia, nyio, ogoli nyia ossi hatai. 6#Etterita 1:27; 5:2Ati many tetteri, to ninyia oyyeuniere Hollum erre, oyyeu nyia inyi abusuha iko abotoro. 7#Etterita 2:24Nyio, te eram ania obusaru adi alle monyonyi iko honyonyi, ette inosonio iko ŋoruoi honyi#10:7 ette inosonio ikoŋoruoi honyi: obeŋi ekenita huna jio omuk egierita 8Buo isi 'daŋ arrihai ette irahan ahuan abotie. Ihuania, obeŋi isi inyiahi irahan arrihai, ati arai isi abotie. 9Tania, hèlaha obo atulo itapek obo ariŋ enne inosok Hollum.”
10Ninyia ajiŋani isi itua haji, ifiye nyia lejifak Yesu te eram ania. 11#Mat 5:32; 1Kor 7:10-11Buo inyi ette jiaran jihosi, “Lia, ollo opiahai 'to iko ŋoruoi honyi buo ette inyiak iyemuna obo aŋotte hama, oroto inyi to hosiere ŋoruoi honyi. 12Buo fe aŋotte onno opiahai 'to iko habi, buo inyiak iyemuna obo alle, oroto buo fe inyi.”
Imimit Yesu Iŋiayai
(Mat 19:13-15; Luk 18:15-17)
13Iyaŋunie nyia omuk aati, aduri jio Yesu jio, oŋida inyi iyabak ahas honyi jihosi, ati, iŋerejanie nyia lejifak jihosi. 14Ninyia igonyu Yesu eram ania, ette inyi iloŋojita, ette jiaran jio lejifak honyi, “Aŋatana aduri ofuonni jihoŋ. Hètihoto isi, nyio, ara Olobie Hollum ahono aati ihuo isi. 15#Mat 18:3Hode, eramak ni itai jio, lia ollo obeŋ 'to ifuotu Olobie Hollum ihuo enne ifuotuniere eto ollo odiha 'to, obeŋ adi inyi ojiŋak diya.” 16Attati inyi ikafuna iŋiayai hunia ababo, ette iyabana ahas honyi jihosi, ette imimit isi.
Lasamani
(Mat 19:16-30; Luk 18:18-30)
17Ninyia holo Yesu itterio adaha honyi, ette obo latulo iŋeruna jihonyi, ette irigoŋo ihosiere honyi, ette jiaran, “Hettiyanani ollo oyyu 'to, ehan 'tadi ni anyio ifuotuniere nesu onno osio 'to 'tulaŋ?”
18Itarraŋ Yesu inyi jio, “Nyio iloŋo iyye ani oloyijio? Obeŋ obo ara oloyijio arari fe Hollum hama. 19#Ajiŋuna 20:12-16; Edasita 5:16-20Imijak iyye efahita: ‘Hèttoho, hèhanio erre somon, hèhoholio, hètisiak obo atulo obojiai, hèmumunio, abaŋa monyohoi iko honyohoi.’ ”
20Buo atulo alia ette jiaran jihonyi, “Hettiyanani, aniŋio ni efahita hunia 'daŋ, many hara ni ahito.”
21Attati Yesu imijio jihonyi 'tok 'tok ta abuaran taji, ette jiaran, “Hobiaŋarak iyye ariŋ abotie. Ilo itinyiaŋak asaŋ hoi 'daŋ, itte ihiharana agurusi hua jio alociaŋak, tania iwon adi iyye iko esamiti idou; buo teya, waŋ yo ijifunie nani.” 22Ninyia itaniŋu latulo alia eram ania, ette omom honyi imur, ette inyi leten elle ijiriŋa, nyio, asam nyia inyi bebe.
23Attati Yesu iyito jio lejifak honyi, ette jiaran, “Ogol adi bebe jio asamak ijiŋaniere Ilobie Hollum!”
24Illillihai nyia lejifak bebe te ekiana ania. Attati Yesu inyiak ikiana jihosi jiojio, “Aduri hoŋ, ogol inyi bebe ijiŋaniere Ilobie Hollum! 25Inyiak iliaha bebe jio akonnikonni ijiŋari te ettulit libira, agalik jio atulo asamani ijiŋari Ilobie Hollum.”
26Illillihai nyia isi bebe, ette jiaran jihonyi#10:26 Igioroni omuk egierita jiojio, ette ikiana isi hama., “Ŋai 'tadi oremik italahuno?”
27Ati omijio nyia Yesu jihosi 'tok 'tok, ette jiaran, “Agalik eram ania aati, ati obeŋ inyi agalik Hollum; nyio, oremik Hollum ihanio erre 'daŋ.”
28Attati Petro jiaran jihonyi, “Imijie, ediehuno hohoi erre 'daŋ ijifatiere iyye.”
29Buo Yesu ette jiaran jihosi, “Hode, eramak ni itai jio, atulo elle idiehuno 'to ahaŋ honyi, illarak honyi, haniyarak honyi, honyonyi, monyonyi, aduri honyi, kuyya amatta honyi ta afure hoŋ buo fe te eram ono Asayyo Ayijok, 30inyiak adi inyi irumana asaŋ arriai jio aŋasi huna ahana. Ifuotu adi inyi enyiahita esiha abotie (100), asik hunnomuk, iko illarak, haniyarak, honyie, aduri iko amatta…buo ettigemita. Buo moi, ifuotu adi inyi nesu 'tulaŋ. 31#Mat 20:16; Luk 13:30Ati, aati arriai hulla arai 'to ihuania etterita, arai adi ecuŋita, buo hulla arai 'to ihuania ecuŋita, arai adi etterita.”
Ikiana Yesu Enyiahi Etahunihi te Eram Ye Honyi
(Mat 20:17-19; Luk 18:31-34)
32To ninyia alari Yesu iko lejifak honyi te ekoi onno olo 'to Yerusalem, adaha nyia inyi to osiere. Illillihai nyia lejifak honyi bebe buo fe aati hunyia ijifarai 'to isi ette ibaŋi. Attati Yesu inyiak iloŋuna lejifak honyi hula 'tomon harrihai aŋati, ette iramana jihosi erre hunno ofuoi 'to iduoŋ jihonyi, 33ette jiaran jihosi jio, “Itayiriete, efuo ihuania Yerusalem, buo diya isiori adi Lonyi Tulo jio ehumak elettaha iko ettiyanak ifahita, oŋotoni adi isi jihonyi aye. Isiori adi isi inyi jio Alufajak. 34Osuhotierek adi isi inyi, buo fe omicie amilak jihonyi, ette ibahio inyi, ette ittohoro inyi, ati ihalu oŋitek hunihoi ibuhu adi inyi toye.”
Efiyo ono Yakobo iko Yoane
(Mat 20:20-28)
35Ofuonni nyia lonyirok Sebedeyo, Yakobo iko Yoane, jio Yesu ette jiaran jihonyi, “Hettiyanani, owon obo ariŋ enne ewak hohoi oŋida iyye ihan jihohoi.”
36Buo Yesu ette ifiyo isi ojio, “Anyio riŋ enne iwahata itai oŋida ni ehan jihatai?”
37Itarraŋi isi jiojio, “Aŋatak hohoi itoŋori Ilobie hoi onno okuat 'to; abotie totto iŋet hoi, buo abotie totto ihorroŋ hoi.”
38 #
Luk 12:50
Ati ojio nyia Yesu jihosi, “Itimoti itai anyio enne ifiyete itai. Iremehina adi itai idihuna ematit ono ettigemio anna alo ni irumana, kuyya iremehina adi itai ifuotuna batisimo anna alo ni luŋa ifuotuna?”
39Itarraŋi isi inyi ojio, “Eremik hohoi.” Buo Yesu ette jiaran jihosi, “Hode, idihuna adi itai ettigemita hunna alo ni irumana. Itifuotoni adi buo fe jihatai batisimo anna alo ni ifuotuna. 40Ati abeŋ ni aremik inyimuna ŋai adi olo itoŋo totto iŋet kuyya totto ihorroŋ hoŋ. Nyio, arai amasik hunia ahuno hia, hinyia ihuhumani tesi.”
41Ninyia itaniŋuni lejifak hula 'tomon eram ana, ette isi iloŋojita jio Yakobo iko Yoane. 42#Luk 22:25-26Ania, ette Yesu iloŋuna isi 'daŋ arabotie jihonyi, ette jiaran, “Imijana itai jio hia hullo ojiori arai ahobuok Lufajak, ilohittohi isi jio aati hosi, buo fe elettaha ihumi ilohittok jio aati hosi. 43#Mat 23:11; Mar 9:35; Luk 22:26Ati obeŋ adi inyi ara ihuo nyia jihatai. Alla awak obo alatai irahan elettok, ijiara inyi luŋa ara ahegiamani jio hullomuk. 44Buo alla awak obo alatai igalihina hullomuk, ijiara inyi hétera apit hatai 'daŋ. 45Nyio, obeŋ nyia buo fe Lonyi Tulo ottu jio, oŋida aati igiamai jihonyi. Ati ottu nyia inyi igiamari buo fe isiaraniere esu honyi italahuniere aati arriai.”
Itaŋida Yesu Bartimeyos Oloŋodo
(Mat 20:29-34; Luk 18:35-43)
46Afanyi nyia isi Yeriko, buo ninyia ajio Yesu alo addi teya iko lejifak honyi buo eluluŋ waati enne ittok, itoŋo nyia obo emimojoni oloŋodo iger hikoi, afure honyi Bartimeyos lonyi Timeyos. 47Ninyia itayiru inyi jio Yesu olo Nasaret nyia lia, ette inyi itterio ewuwoŋita jiojio, “Yesu! Lonyi Dafide, omehinie jihoŋ!”
48Iŋirejanie nyia aati arriai jihonyi ette iramana inyi hotoduai. Ati ifudak nyia inyi ewuwoŋita bebe jiojio, “Lonyi Dafide, omehinie jihoŋ!”
49Ania, ette Yesu iwotia, ette jiaran jihosi, “Iloŋuna inyi.”
Ania, ette isi iloŋuna oloŋodo lia, ette jiaran jihonyi, “Itagolo ataji! Totte, iloŋo inyi iyye.”
50Attati inyi iruoŋoro aboŋo honyi, ette ifirri ahide, ette ittuna jio Yesu.
51Attati Yesu ifiyo inyi ojio, “Iwak iyye ani ehan anyio jihoi?”
Itarraŋ nyia oloŋodo lia jiojio, “Hettiyanani, awak ni inyiak mijio.”
52Buo Yesu ette jiaran jihonyi, “Ilo, itaŋida eruk hoi iyye.”
Teya teya, inyiak inyi mijio, ette ijifaru ekoi Yesu.
Currently Selected:
Marko 10: EA2003
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in South Sudan 2003
