Ebrei 9

Amojo atta Fau iko Ettedou

1Ottu nyia ecorit etteri iko ekotia hunno omojorik, buo fe owon iko amaji emojit ifau dini. 2Osihini nyia aaji musiama; anya nyia aŋati etteri, Amaji Elibo. Itua honyi, owon nyia etawoji 'lomo, atteremeja iko emune enne isiarani jio Hollum. 3Ihoruoŋ aboŋo etihi, owon nyia amusiama enne iloŋoi Amaji Elibo anna agalik 'to 'daŋ. 4Itua honyi, owon nyia etitiek 'yel onno osuahierek ottogoŋ, buo Asenuk ono Ecorit anna arai egeri honyi ayyel. Itua asenuk ania, owon nyia etebek anna ara ayyel, buo amana owon itua honyi. Itua amusiama ania buo fe, owon nyia atelek Arone anna ayisak abene iko olottobohi hula arrihai hunyia ikiafanierek efahita. 5Totto hide Senuk, owoni nyia omuk arrijiorita saŋ hunna anyai Cerubim hunno owoni iko ewwa. Itahutani nyia isi awanan Hollum diya, buo ewwa hosi ihanani abali jio amaji onno ohohittarik eyyata. Ati, obiaŋara asaa ana enne ikukubonierek erre 'daŋ.

6Ekoi ania ninyia ihuhumanierek erre hunia 'daŋ. Adahatie ehumak oŋitek 'daŋ jio aŋati etteri ono aaji musiama ihaniere egiama hosi. 7Ati, ehumani elle ittokon nyia hama, ojiŋatta iŋati haji musiama etarrihi. Ojiŋatta nyia inyi diya enyiahi abotie ijiai ihiŋa. Iyatta nyia inyi nooto isiaraniere jio Hollum te eram ono eyyata honyi iko te eram eyyata hunne ihani aati ta atimo. 8Te ekoi ania, itahutak Loholio Olibo jio, obeŋi adi aŋai ekoi onno olo 'to Imaji Elibo anna Agalik 'to 'Daŋ, buo aaji musiama etteri howon. 9Ariŋ ania enne itahutak 'to erre hunno owoni 'to jio oŋitek huna. Itahutak inyi jio, ittallihini esiorita iko aciaŋi ehumita, hunne isiori jio Hollum, italibo atajia hamojok; 10nyio, ikianai erre hunia 'daŋ eram ŋiyo iko amata buo etaduarita hunnomuk 'daŋ hunne italiborierek ahuattek. Etaduarita huan hunia ijiai, hunne igiamai many iyaŋuniere Hollum amanya aŋejuk.

11Ati, ara Kristo a Hehumani elle ittokon elle iyaŋuno 'to erre ayijok hunna awoni 'to huna dini#9:11 hunna awoni 'to huna dini : igioroni omuk egierita jio, hunno ofuonni 'to.. Igiama inyi ihaji musiama anna agalik 'to 'daŋ ta ayiji buo fe ottuba; ninyia obeŋ tulo oduhok. Ajiaran ania jio, obeŋ inyi ara ahono afau ana, ninyia oyyeuni 'yeuna. 12Ninyia alari Kristo ihaji musiama, ojiŋak nyia inyi enyiahi abotie ijiai Imaji Elibo anna Agalik 'to 'Daŋ. Obeŋ nyia inyi iyaru nooto hidie kuyya ono attamoti isiaraniere ehumi. Ati iyaru nyia inyi nooto honyi iyaŋuniere jihohoi etalahuno onno osio 'to 'tulaŋ. 13Nyio, italibori atulo ihuo ojiori efahita Mose, to nooto hidie kuyya ono attamoti kuyya te enuara ono atawwo olo osuahini ehumi. 14Alla ara ti inyi hode, obeŋ 'tadi nooto Kristo iyaŋuno alibori anna agalik 'to bebe? To Oloholio elle isu 'to 'tulaŋ, isiarak nyia Kristo ahuan honyi ehumi onno oyyu 'to bebe jio Hollum. Italibo adi nooto honyi atuajin hohoi jio ehuhumita hunna arai asai jio, oŋida bati egiama jio Hollum lesuoni.

15Te eram ania, iyaŋuno Kristo ecorit aŋejuk jio, oŋida bati hia hunyia iloŋu Hollum ifuotuni amuno onno osioi 'to 'tulaŋ, ninyia ocoroni a hunosi. Ta naye honyi, italahunie hia hunyia iyyauni 'to jio oŋitek huno ecorit etteri.

16Alla ara eram ono awaraga enne itahutak 'to jio ŋai olo ifuotuna erutaa, ijiara luŋa omijani jio, aye amonye saŋ; 17nyio, ittallihi irutana asaŋ buo amonye hesu, arari fe alla aye inyi. 18Inyi buo fe ninyia itasirunierek ecorit etteri to nooto. 19Nyio, ninyia iramak Mose efahita 'daŋ jio aati 'daŋ, iduhu nyia inyi nooto tawwa iko ono nedie, ette iharruahina iko aari, ette iduhuna agutuny anariet, ette itarana ilosiholoti, ette isabulonia ihoto, ette iruasiere abuk ono efahita iko aati 'daŋ; 20ette jiaran, “Nooto ana itagol ecorit ono emuara ninyia awak Hollum luŋa jio ijiara itai iniŋiete.” 21Ihuo nyia buo fe, oruas nyia Mose, to nooto, Aaji Musiama Elibo iko asaŋ emojiti 'daŋ. 22Hode, ojiori efahita jio, ijiara luŋa italibori arriai hirre 'daŋ to nooto; ittallihini buo fe ihohina eyyata waati alla abeŋ nooto owouno.

Iduha Naye ono Kristo Eyyata Addi

23Tania, italibori nyia arrijiorita hirre huttedou te ekotia ihuo hunia; buo italibori erre huttedou te ehumita hunno oyiji 'to bebe agalihini hunia. 24Obeŋ nyia Kristo ojiŋak jio Amaji Elibo atta fau enne ihuhumu tulo buo fe ara arrijiori Maji Elibo, anna ara 'to hode. Ojiŋak nyia inyi luŋa lidou, amaji anna awanari inyi ihosiere Hollum iluahiere hohoi. 25Aŋasi 'daŋ, ojiŋatta nyia ehumani Yudei elle ittokon Imaji Elibo anna Agalik 'to 'Daŋ isiaraniere nooto ciaŋ ehumi. Ati obeŋ nyia Kristo ojiŋak Imaji Elibo isiaraniere ahuan honyi enyiahita arriai. 26Elle isiaratta nyia Kristo ahuan honyi ehumi aŋasi 'daŋ, ŋaduo arumak ettigemita enyiahita arriai many tetteri fau. Ati ihuania, attu inyi enyiahi abotie ijiai iyari eyyata addi ta naye honyi, buo esidi fau iliaha. 27Oye luŋa atulo 'daŋ enyiahi abotie, ojio teya, ette Hollum iŋot eram hosi. 28Ihuo nyia buo fe, isiori nyia Kristo ehumi enyiahi abotie ijiai, iyari addi eyyata waati arriai. Inyiak adi inyi icohuno, obiaŋara iyari addi eyyata, ati italahuniere hia hulle itilai 'to inyi.

Currently Selected:

Ebrei 9: EA2003

Highlight

Copy

Compare