Ebrei 6

1Hèdehina luŋa ettiyenita etterita huno Kristo. Habocioro luŋa jio ettiyenita huno aati hulla abolori 'to. Hèlaha luŋa edidasio erre etterita huno asayyo Hollum idehiniere amanya enne iyaŋuno 'to naye, buo ette iruk jio Hollum. 2Hèlaha luŋa edulo ettiyenio eram ono batisimo#6:2 batisimo : kuyya ehuhuma ono etaliborio., eyabana has, nebuhuna ono ayaak, iko aŋocio hiram onno osio 'to 'tulaŋ. 3Eremik ihanio ihuo nyia, alla aŋatak Hollum.

4Enyiahuno 'tadi aŋai aati hulla abusani 'to eruk hosi, oŋida idehini neyyau? Owoni nyia isi berien ifaŋan Hollum; ette iniŋ esiorio ettedou, ette buo fe ifuotuna Loholio Olibo. 5Amijani buo fe isi ayiji ono ekiana Hollum, buo fe iniŋi agolon ninyia itteriere Hollum elohittok. 6Attati isi busana neruk hosi! Ogol inyiahuniere isi oŋida idehini eyyau nyio, inyiahi isi isihonia Lonyi Hollum ikruce, buo fe itanyahini inyi ariri ihiji waati.

7Ajak Hollum afau enne ifuotutta 'to ahide gagaga, ette itaboloruna erre hunno oyiji jio hia hullo oromonierek. 8Buo elle itaboloru inyi ekua iko alabali, obeŋ fe obo ayiji jihonyi; iliaha Hollum epitana inyi, ette isuahina.

9Illarak iko haniyarak hohoi, duadi bu ekiana hohoi ihuo nyia, emijak hohoi itai bebe. Emijak hohoi jio, inyimuna itai ekoi onno obis 'to anna ara 'to te etalahuno hatai. 10Odulo Hollum abisan. Ittallik adi inyi iguoro egiama hatai kuyya abuaran tajia hatai inyi, ninyia itahutana itai ta aluahio hatai Kristiani hullomuk, buo fe hérasati ihanio ihuo nyia. 11Ewak hohoi bebe jio, ijiara luŋa itai 'daŋ ababo iduloro awahan bebe many isidi, oŋida bati erre hunne iyihina itai ofuonni irahan hode. 12Tania, hèboyojoto; ati, irata ihuo hia, hinyia iruhi 'to buo fe odihuni, ania ifuotunierek isi erre hunyia ocorok Hollum.

Obeŋ Ecorit Hollum Opuak

13Ta abiaŋan tulo agalik Hollum, ittuŋo nyia inyi ta afure honyi ihaniere erre hunyia ocorok inyi jio Abramo, to ninyia 14ojiari inyi jio, “Hode, hode, etamuno adi ni iyye. Oluluajarai adi aati hutta haŋ hoi.” 15Itilau nyia Abramo dee, many ifuotuniere inyi ariŋ ninyia ocorok Hollum. 16Elle ilama atulo, ittuŋo inyi ta afure lia alla agalik 'to inyi, buo ettuŋo ania ette iremehina eram ania 'daŋ. 17Ninyia awahari Hollum itahutaniere 'tel 'tel jio hullo ofuoi 'to ifuotuna ariŋ ninyia ocorok inyi, ittuŋo nyia inyi luŋa jio, ettallik inyi itapuak awahan ottononyi. 18Ecorit iko ettuŋo Hollum, isi erre arrihai hunia hunne ittallihini 'to iloito; ittallik buo fe Hollum igesemi te eram hosi. Tania, ihumi luŋa itagol hohoi hulle efuhororo 'to jihonyi jio, oŋida bati luŋa ehum igottiere eyihina enne ihanani ihosiere hohoi. 19Jio amanya hohoi, ara ariŋ enne eyihi jihonyi, ihuo olohurut enne iriecierek a babur, enne itagolio 'to hohoi. Inyi Yesu, ollo olo 'to many imaji elibo, agalaru aboŋo etihi otto haji emojit enne ittokon ettedou. 20Ikiomoro inyi diya, te eram hohoi. Ara inyi mak a hehumani elle ittokon jio ehumari ono Melkisedek#6:20 jio ehumari ono Melkisedek : imija Ebrei 5:6..

Currently Selected:

Ebrei 6: EA2003

Highlight

Copy

Compare