Ebrei 12

Hollum Monye Hohoi

1Ekudani hohoi eluluŋ suuti arriai. Tania, héduhara addi erre 'daŋ hunne itihi 'to ekoi hohoi. Heduhara buo fe addi neyyau onno ogolik 'to jihohoi. Hadihata luŋa iŋiorori fir fir many isidi ono arracita ania.

2Hatuhonia egigilo hohoi 'daŋ jio Yesu, alla ara neruk hohoi tenyi, tetteri many isidi. Obeŋ nyia inyi ohorok te eram ninyia ittigemierek inyi ikruce. Ati, ta amijana honyi amuno onno olo inyi irumana moi, odihu nyia inyi ariri ta aye honyi ikruce. Itoŋo inyi ihuania totto ŋati iŋet ono aseger ilohittok Hollum.

3Iko ogiluna erre hunyia odihu inyi! Odik nyia inyi ajujon tuajin heyyak. Tania, obeŋi adi ahuattek hatai ilihuni ittata ihoronia. 4Te enne ifayette itai ahuattek hatai jio eyyak, hèbiaŋata itai iwojuna many ottohorik itai. 5Hèguotti ekenita etagolita tajia hunyia iramak Hollum jihatai, aduri honyi jio;

“Hito, ihuma siehina ayyaha elle itabisio ni iyye,

itagolo ataji elle eŋere ni jihoi.

6Nyio, etabisio ni hia 'daŋ, hullo obuor ataji hoŋ,

buo fe ettigemio hia 'daŋ hulle eruhok ni jio isi aduri hoŋ.”

7Odihuna 'daŋ ettigemio, nyio, ekoi ania enne ittittoyere monye itai. Itahutak ania jio, ihanio Hollum ihuo nyia, nyio, irata itai aduri honyi. Owon soho obo eto ollo obeŋ monyonyi isiŋio? 8Itabisatta Hollum aduri honyi 'daŋ; buo alla abeŋi itabisani itai, itahutak jio ibiaŋata itai irata aduri honyi hode, irata itai aduri hullo orotuni rotuna. 9Iko ogiluna ehanita monyie hohoi hutta fau, itabisie isi hohoi buo erasa ibaŋi isi. Obeŋ 'tadi inyi oyyu bebe agalik, elle ebaŋ Monye ettedou? 10Héra aduri, itabisie hohoi monyie hohoi ihuo obis jihosi; ati itabisio Hollum iyaŋuniere ayiji jihohoi jio, oŋida bati elibo ihou inyi. 11Oŋitek 'daŋ, elle itabisie hohoi, ara ihuo enne iyaŋuno inyi jihohoi ejiriŋa, buo obiaŋara amuno. Ati ihalu, onyurani adi hia, hunyia itabisani te ettigemio ihuo nyia, esiorio ono elik tajia enne iyaŋuno 'to abisan manya.

Ettiyenita iko Esariti

12Itagoloto atajia! Hèkikiroti! 13Oduloro amanya te ekotia hunno obisi 'to, oŋida bati hia, hulla arai 'to ihuo aŋurak obeŋi owuroni ahuattek, ati ijiara itaŋidari. 14Okiamata itoŋori te elik tajia iko aati 'daŋ ababo. Okiamata buo fe imanyari amanya elibo, nyio, ittallik tulo igonyuna Lamonye alla abeŋ inyi amanya ihuo nyia. 15Ihumata mijio ŋadi iyitotti addi jio ayiji taji Hollum. Hèlaha obo ara ihuo ayyani onno odua 'to, enne isuru 'to buo neduarit honyi ette ittarroho erre arriai. 16Hèlaha obo ihanio erre somon, kuyya iha abaŋi Hollum ihuo Esau, linyia itinyiaŋak 'to ariŋ onno osiru 'to tenyi, eto oloŋeu. 17Imijana itai jio, ihalu awak nyia inyi monyonyi oŋida imimit inyi. Ati iha nyia monyonyi nyio, duadi bu ottifa nyia Esau inyi te eyyoo#12:17 duadi bu ottifa nyia Esau inyi te eyyoo : kuyya, awak nyia Esau efuotuna ajahio., abeŋ nyia obo ekoi jio monyonyi iloiciere ariŋ ninyia ihan inyi.

18Hèbiaŋata itai ifanyata jio ariŋ onno oremehini ittir ta aani, ihuo ninyia afanyarik Israele. Inyi Sinai, amaji anna awanari eema onno owulo 'to iko edumele enne iriok 'to 'tir 'tir buo addiŋilla, 19iko ekuatit furuju buo etiri hutuk. Ninyia itaniŋuni aati etuk Hollum, ette isi ittana jio, hèlaha isi enyiak itayiruna obo ekiana; 20nyio, ittallihini nyia isi niŋio eram ninyia iramak Hollum jio, “Ara duadi bu aciaŋ, alla attir inyi adoŋe ana, ijiara luŋa irruoŋi ta amoruoi many oyeri.” 21Iyaŋuno nyia ariŋ ninyia oleyo 'to ania abaŋi many ojiari Mose jiojio, “Ekikiro ni bebe buo fe abaŋ!”

22Ati ifuanna itai Idoŋe Sayon, abore gala Hollum lesuoni, Yerusalem ettedou, onno owon 'to iko ajilohien hullo oluaji bebe bebe. 23Ifuanna itai jio amuno onno ottubarik oloŋehua hulo Hollum, hulle igioronie afureta hosi lidou. Ifuanna itai jio Hollum, aŋotoni hiram waati 'daŋ iko jio ayijok eberien hulla arai 'to ihuo awak Hollum. 24Ifuanna itai jio Yesu, linyia iyaŋuno 'to ecorit aŋejuk. Ifuanna buo fe itai jio nooto honyi ninyia oruasani, onno ocorok 'to erre ayijok bebe agalik nooto Abele.

25Ihumata ti mijio! Hèhara etaniŋio jio lia, elle ikiana 'to jihatai. Nyio, obeŋ nyia erisi jio hia, hinyia ihari 'to etaniŋio jio lia, linyia ikiana 'to jihosi to Doŋe Sinai. Obeŋ 'tadi inyi ogol bebe jihohoi irisari, elle eha etaniŋio jio lia, linyia ikiana 'to jihohoi tedou? 26Ittanniŋ nyia etiri hutuk Hollum afau to ninyia tonyia, ati ihuania acorok inyi jio, “Abeŋ adi ni enyiak idas ittanniŋ afau hama, ati ettanniŋ adi ni buo fe nedou.” 27“Inyiahi fe luŋa” ekenita hunia itahutana jio, ittanniŋi adi erre hunno oyyeuni, ette iduhara addi jio, oŋida bati erre hunno obeŋi ittanniŋ arasai.

28Tania, hésiatta ti ahumo jio Hollum; nyio, efuotu obuore enne ittallihi ittanniŋ. Ta abaŋi iko te ellilliha, hamunoti buo fe etahabuyo Hollum te ekoi enne itamuno 'to inyi. 29Ara luŋa Hollum hohoi, ihuo eema enne itamuhitta 'to erre.

Currently Selected:

Ebrei 12: EA2003

Highlight

Copy

Compare