2 TIMOTEYO 2

Oloyijio Oseŋer Kristo Yesu

1Buo jihoi lonyi hoŋ, ijiara ayiji taji anna ara 'to ahonohoi te enoso iko Kristo Yesu, itagol iyye. 2Iduhu ettiyenita hunyia itayiru iyye ettittoyo ni ihosiere waati arriai, isiarak isi jio aati ayijok, hullo oremehini buo fe ittittoyo isi jio aati hullomuk.

3Ifuotu buo fe luŋa ettigemita ihuo oloyijio oseŋer Kristo Yesu. 4Awak oloseŋer elle igiama 'to itamuno ajafit honyi, obeŋ inyi itajiŋak ahuan honyi jio erre waati hullo obeŋi 'to arai oseŋer. 5Obeŋ olofeja alla arracari 'to iko aati oremik ifuotuna esiorio alla abeŋ inyi oniŋio efahita huno aŋettio. 6Ijiara buo fe luŋa aromoni ollo ofuto 'to egiama itter aŋiyo aamat hunno odeŋu inyi. 7Ihuma luŋa igigilo te eram enne ekiana ni ania; nyio, oluak adi iyye Lamonye imijaniere isi 'daŋ.

8Igigiloi te eram Yesu Kristo linyia itubuhuni toye, linyia odietuno to woyo Dafide, ihuo ojiori Asayyo Ayijok hunne ettittoyo ni. 9Ittigemie buo fe ifiti nani ta aririk ihuo olohoho, te nettittoyo hoŋ Asayyo Ayijok. Ati, ittallihi ifit eram Hollum ta aririk. 10Tania, adik ni ettigemita 'daŋ te eram onyimot Hollum, oŋida bati isi orumani etalahuno onno ottu 'to tottolo Kristo Yesu, enne iyaŋuno 'to nakuatan onno osio 'to 'tulaŋ. 11Arai ekenita huna hode:

“Elle eye nyia ikonyi,

esu adi buo fe ikonyi;

12 # Mat 10:33; Luk 12:9 Elle edulo adihan,

elohittok adi buo fe ikonyi.

Elle erisa inyi,

orisa adi buo fe inyi hohoi.

13Elle ebeŋ eyyu,

odulo inyi ayiji,

nyio, ittallik inyi irisa ŋai inyi.”

Egiamani elle Itamuno 'to Hollum

14Hèlaha obo jio aati hoi oguoro erre hunne eramak ni huna jihoi. Ihosiere Hollum asara isi, hèlaha itarisai te eram ikenita hunno obeŋi 'to iyaŋunie obo ayiji, ati iyaŋunie isi arrohoji jio etayirak. 15Ihuma luŋa italeyehina ahuan hoi to hosiere Hollum ihuo egiamani ollo omunoi, ollo obeŋ 'to iloriri te negiama honyi, elle ittiyenio 'to onno oyyu, eram Hollum anna ara 'to hode. 16Idehi olorisa onno obeŋ 'to iyaŋuno abaŋi Hollum; nyio, italama inyi aati bebe jio Hollum. 17Ara olorisa ania ihuo acagura onno oŋiyo 'to ahuan tulo. Himeneyo iko Fileto, isi hulia aati arrihai hulle ittiyenie 'to erre ihuo hunia. 18Idehini isi nekoi ono nelahode, buo ojiori jio, etuk nyia ebuhuna. Ittarroho eram hosi ania eruk ono omuk aati. 19Ati osio etawoji ninyia oyyehi Hollum. Igioroni erre huna ihide honyi: “Omijak Lamonye hia, hulla arai 'to a hulonyi; tania, ijiara hia 'daŋ, hullo ojiori 'to jio era isi a hulo Lamonye, idehini luŋa ehanita hunno orrohoji 'to.”

20Itua haji anna alat 'to, owoni awoi seniyat iko arranyi arriai. Ihuhumuni omuk to 'yel iko to bilata aboŋ, buo omuk ohololuni to hitoi, buo omuk oyyeuni to hifuoto. Igiamarik omuk to oŋitek eyomita, buo omuk igiamarik erre huttoloŋi. 21Ara adi buo fe inyi ihuo nyia jio eruhok. Hia, hullo obeŋi 'to itiboti ahuattek hosi, igiamarik adi isi te ekoi enne ilaman 'to bebe; nyio, igialani isi buo fe isi oyiji a huno Lamonye. Ihuhumanie isi luŋa egemita hirre 'daŋ hunno oyiji 'to. 22Tania, idehi ewahiti nyarhalu; ottifotie abisan, neruk, abuaran taji iko elik taji. Arabotie iko hia hullo omojoi jio Lamonye ta alibori tajia, omojoti aluahio jio Lamonye. 23Ati, obusak olorisa enne ipal 'to; imijak iyye jio, iyaŋutta inyi aŋalafa. 24Hèlaha luŋa apit olo Lamonye, ottifia aŋalafa. Anyalama luŋa jio aati 'daŋ; araha a hettiyanani ollo oyyu 'to, ollo owon 'to iko adihan. 25Itabisie aati hullo osuarik 'to iyye ta abijon tua, kuyya hara héyaŋuno Hollum jihosi erue, ette imijana nelahode. 26Attati tibuo isi irue, ette irisuna addi jio elohit Sittan, linyia inefu 'to isi ihaniere ewahiti honyi.

Currently Selected:

2 TIMOTEYO 2: EA2003

Highlight

Copy

Compare