2 TIMOTEYO 1

1Ani alia Paulo, elefahata Kristo Yesu ta awahan ono Hollum. Ifahuni nyia ani ittittoyere eram ono nesu ninyia ocorok Hollum, te enoso iko Kristo Yesu.

2 # Ehanita 16:1 Jihoi Timoteyo, elle ira 'to ihuo lonyi hoŋ alla amuno ni; ijiara Hollum Monye iko Yesu Kristo, Lamonye hohoi, isiarani jihoi ayiji, amehino iko nelik taji.

Ahumo iko Etagolita

3Esio ni ahumo jio Hollum elle egiama ni jihonyi te egigilo onno olibo ihuo ninyia igiamarik hohonyiok hoŋ jihonyi. Esiarak ni ahumo jio Hollum ta aduloro hoŋ imojo teyye. 4Alla agilu ni neyyoo hoi, ette atua hoŋ iwahan bebe igonyuna iyye jio, oŋida bati amuno ifut jihoŋ. 5#Ehanita 16:1Agilutta buo fe ni elahode ono neruk hoi; neruk ninyia owon 'to jio hahanyihoi Lois iko jio honyohoi Yunis. Amijak ni jio, owon buo fe neruk ania jihoi. 6Tania, eramak luŋa ni iyye jio, ijiara esiorio ninyia ifuotu iyye jio Hollum odulo awulori ihuo eema, to ninyia eyabaniere ni ahas hoŋ jihoi. 7Nyio, obeŋ Oloholio enne isiarak Hollum jihohoi iyaŋuno abaŋi, inyiak tibuo oloholio ania itufutana jihohoi nagolon, abuaran taji iko ehum ittoŋotio huan onno oyyu.

8Hèloriri ikianari eram ono Lamonye hohoi jio aati. Hèloriri buo fe toni, elle efita 'to ibabus te eram Kristo. Nyio; ta agolon enne isiarak Hollum jihoi, ifuotu buo fe ettigemita te eram ono Asayyo Ayijok. 9Ta awahan iko ta ayiji taji honyi, italahu nyia inyi hohoi ette iloŋuna hohoi irari a hulonyi, obiaŋara te ehanita hohoi. Many hobeŋi oyyeuni afau iko edou, isiarak nyia inyi jihohoi ayiji taji ania to Kristo Yesu. 10Ati ihuania, italeyehini inyi jihohoi ta attuna ono etalahani hohoi Kristo Yesu. Itapuak inyi agolon ono naye buo ette iyaŋuno nesu onno osio 'to 'tulaŋ ta Asayyo Ayijok.

11 # 1Tim 2:7 Onyimu nyia Hollum nani irari elefahata buo fe a hettiyanani, ittittoyere Asayyo Ayijok. 12#Mat 10:33; Luk 12:9Eram ania atibuo enne ittigemierek ani ihuania. Ati, abeŋ ni eloriri nyio, amijak ni eyyihi ni jio ŋai; amijak buo fe ni luŋa jio, oremik inyi ittoŋotio onno oyyu erre hunyia ihanak inyi ihas hoŋ.#1:12 erre hunyia ihanak inyi ihas hoŋ : kuyya erre hunne ehanak ni ihas honyi many olumori oloŋ nyia.

13Ogottiere eram ahode hode ninyia ettiyanak ni iyye; ijiara ara etahuti enne ijifatio iyye. Ogolik jio neruk iko abuaran taji hunna arai 'to a hunohoi te enoso iko Kristo Yesu. 14Ta agolon ono Loholio Olibo, alla amanya 'to jihohoi, ogottiere erre ayijok hunyia ihanani ihas hoi.

15Imijak iyye jio, ihari nani aati 'daŋ hutto ŋati Asia; isi arabotie iko Figelos buo Hermojins. 16Ijiara Lamonye omehino jio aati hutta haŋ Onesiforo nyio, itamuno nyia inyi ataji hoŋ enyiahita arriai. Obeŋ nyia inyi iloriri awanan hoŋ ibabus; 17buo ninyia afany inyi Roma, ette inyi ittifia nani imasik 'daŋ many orumaniere nani. 18Ijiara Lamonye omehino jihonyi jio Noloŋ nyia! Imijak buo fe iyye bebe erre hunyia ihan inyi jihoŋ to Efeso.

Currently Selected:

2 TIMOTEYO 1: EA2003

Highlight

Copy

Compare