1 YOANE 4

Oloholio Hollum iko ono Enyabak

1Illarak iko haniyarak hoŋ, hèruhoto aati 'daŋ hullo ojiori 'to jio, ewon isi iko Oloholio Hollum. Okiamata isi 'daŋ, irumaniere ollo ottu inyi luŋa jio Hollum. Nyio, imasik 'daŋ, isarrahini ekianak enyabak arriai hullo ojiori 'to jio ekiana isi eram Hollum. 2Iremehina adi itai imijana Oloholio onno ottu 'to jio Hollum te ekoi ana: atulo 'daŋ elle iruhok 'to jio, ara nyia Yesu Kristo atulo, owon inyi iko Oloholio Hollum. 3Buo atulo 'daŋ ollo orisa 'to eram Yesu ania, obeŋ inyi owon iko Oloholio Hollum. Ottu oloholio ottononyi ania jio Amiottononi Kristo, linyia itaniŋuna itai jio olo ittuna; lawon inyi ihuania ifau dini.

4Ati, aduri hoŋ, irata itai a hulo Hollum. Igalihina itai ekianak enyabak hullo ojiori 'to jio ekiana isi eram Hollum, nyio, odua bebe Oloholio ollo owon 'to jihatai agalik ollo owon 'to jio hia hulla arai 'to a hulo afau. 5Arai ekianak enyabak hullo ojiori 'to hulia jio ekiana isi eram Hollum a hulo afau ana. Ikianai isi eram afau ana, buo aati afau ana itayirie jihosi. 6Ati era a hulo Hollum. Lia, ollo omijak 'to Hollum, itayirio inyi jihohoi; buo lia ollo obeŋ 'to ara a holo Hollum, obeŋ itayirio jihohoi. Ekoi ania, enne eremehiniere imijaniere Oloholio ono nelahode jio oloholio ono enyobio.

Hollum inyi Abuaran Taji

7Illarak iko haniyarak hoŋ, ijiara luŋa abuaran taji owon ihiji hohoi; nyio, ottu abuaran taji jio Hollum. Lia, elle itabuor 'to ataji honyi, ara inyi a hito Hollum buo fe inyi omijak Hollum. 8Lia, ollo obeŋ 'to itabuor ataji honyi jio hullomuk, obeŋ inyi omijak Hollum; nyio, Hollum inyi abuaran taji. 9Itahutak nyia Hollum abuaran taji honyi hohoi, te efahuna honyi, Lonyi honyi olobotie ifau, jiojio oŋida bati esu tenyi. 10Obeŋ abuaran taji ahode ara te etabuorio tajia jio Hollum; ati, ara ta abuaran taji honyi hohoi iko te efahuna honyi Lonyi honyi irari ehumi onno ohohinierek eyyata hohoi. 11Illarak iko haniyarak hoŋ, alla abuor ataji Hollum hohoi ihuo nyia, ijiara fe luŋa abuaran taji owon ihiji hohoi. 12Hobeŋ tulo igonyu Hollum, ati alla awon abuaran taji ihiji hohoi, enoso iko Hollum buo fe abuaran taji honyi ifut jihohoi.

13Tania, emijak luŋa jio enoso iko Hollum, buo fe inyi inoso ikohoi; nyio, isiarak inyi jihohoi Oloholio honyi. 14Ifahu nyia Monye Lonyi honyi irari A hetalahani olo afau ana. Egonyu nyia Lonyi honyi buo fe eramak aati hullomuk eram honyi. 15Lia, elle iruhok 'to sar sar jio ara Yesu a Lonyi Hollum, inoso inyi iko Hollum buo fe Hollum inoso ikonyi. 16Emijak buo fe eruhok jio obuor ataji Hollum hohoi.

Hollum inyi abuaran taji. Lia, alla amanya 'to ta abuaran taji, inoso inyi iko Hollum, buo fe Hollum inoso ikonyi. 17Itufutani jihohoi abuaran taji jio, oŋida bati ewon iko agolon tajia Iholoŋ ono Aŋocio Hiram. Ogoli atajia hohoi, nyio, orriama amanya hohoi jio afau ana iko ono Kristo. 18Obeŋ abuaran taji iyaŋuno abaŋi, nyio, elle efut abuaran taji jio atulo, ittallik inyi ibaŋi. Tania, alla abaŋ atulo eram ono ettigemio, itahutak jio hobeŋi itufutani abuaran taji jihonyi. 19Etabuorio atajia, nyio, Hollum nyia ahosiere itabuor ataji honyi jihohoi. 20Elle ejio jio, obuori atajia hohoi Hollum, buo eliwari illarak iko haniyarak hohoi, era agesomok. Hèbeŋ egonyu Hollum. Aŋai ti eremik itabuor atajia jio Hollum buo ebeŋ etabuor jio aati hulle egonyu? 21Isiarak nyia Kristo jihohoi efahi ana: lia, ollo obuor ataji honyi Hollum, ijiara buo fe luŋa inyi itabuor ataji jio aati hullomuk.

Currently Selected:

1 YOANE 4: EA2003

Highlight

Copy

Compare