WAROMA 3
3
1Myahudi wawichumbie wandu wa mbari zima naki? Angu kushamishwa koko na fwaidaki? 2Kwafwana putu kwa kula chia. Imbiri Wayahudi niwo werenekeloghe malagho gha Mlungu. 3Da ikaia wada ngera wamu ndewerekoghe waloli? Welee, kuja kusowa wuloli kwawo kuinja wuloli ghwa Mlungu? 4Hata kutini. Ela Mlungu ndeduo mloli, hata ngera wadamu wose wakaia watee; sa iji koni iandikilo,
“Kupate kutalwa kukaia na hachi kwa madedo ghako,
na oho kusime ngelo ya kutanywa kwako.”#Zab. 51.4
5Da dighora wada ikakaia wuwiwi ghodu ghwadumika kwa kuiwonyera hachi ya Mlungu? Dadima kughamba wei Mlungu waawuyabonya makosa kwa kudikaba? (Naghora kimdamu). 6Hata kutini. Angu ngera ni huwo-lee, Mlungu uchaghutanya wada wurumwengu? 7Ela ikakaia kwa chia ya makosa ghapo, loli ya Mlungu iawonyera wubaa ghwake worinyi, kwaki sena ini niduagha ngitanywa kukaia mkaung'a? 8Kwaki diseghambagha, “Ndedibonye mawiwi diwonepata mecha?” Seji wandu wamu widizighiriagha wei niko dighoragha huwo! Kutanywa kwawo ni kwa hachi.
Mndungi ndeko mhachi
9Da ni wada? Isi Wayahudi deko baa? Hata; hata kutini. Namerie kuwonyera kukaia wandu wose walemelo ni kaung'a, Wayahudi hata Wagriki wori; 10sa iji koni iandikilo,
“Ndekuwadie mndungi uko mhachi,
ndeko hata umweri;#Zab. 14.1-3; 53.1-3
11ndeko ungi utambukilwagha,
ndeuko ungi umlolagha Mlungu.
12Wose waghalukie na mbai,
nawo wose chiaimweri wikabonya makosa;
ndeko ungi wawuyabonya nicha, hata umweri.
13Marangi ghawo ni sa kaburi iko iari,
watumia chumi rawo kwa kughora tee.
Madedo gha memu yawo ni sa wusungu ghwa choka.#Zab. 5.9; 140.3
14Kuewia na luwawo vachua memunyi kwawo,#Zab. 10.7
15waghenda na iseghe wikikunda kudia bagha,#Isa. 59.7-8
16andu kose wiidiriagha wanona na kureda wasi,
17na chia ya sere ndewiichi;
18hata kumuobua Mlungu kungi ndekuko andenyi kwawo anduangi.”#Zab. 36.1
19Idana damanya angu ijo jose Sharia ighoragha, yaghora na awo wiko aisi ya Sharia; eri mndungi usepate jekudederia, na wurumwengu ghose ghupate kukaia aisi ya kutanya kwa Mlungu. 20Angu ndekuwadie mndungi uchaatalwa kukaia na hachi imbiri ya Mlungu kwa mabonyo gha Sharia anduangi kwa kukaia kumanya kaung'a koocha kwa chia ya Sharia.#Zab. 143.2; Wagal. 2.16
Chia edipatanisha na Mlungu
21Ela idana chia ya Mlungu epatanisha wandu na Uo moni yamerie kufunukulwa. Ndeiko kwa chia ya Sharia, hata ngera Sharia ya Musa na Walodi waishuhudia; 22ela Mlungu wadatala wandu kukaia na hachi kwa irumirio jawo andenyi ya Jesu Kristo; nao wadabonya huwo kwa wose wirumiriagha. Kwa kukaia ndekuko kutala wandu kungi anduangi.#Wagal. 2.16 23Angu wose wabonyere kaung'a, na kupungukilwa ni wubaa ghwa Mlungu; 24wiatalwa kukaia na hachi duu kwa mvono ghwa Mlungu sa inosi, kwa chia ya wukomboli ghuko kwa Kristo Jesu; 25uo Mlungu ummbikie ukaie kizongona kwa bagha yake moni, upate kuwuswa kwa irumirio, na kwa chia iyo Mlungu uwonyere hachi yake; angu kwa kurumaghia kwake kwa wulungu, ndereritalieghe kaung'a ra imbiri. 26Erekoghe huwo, eri kwa ngelo iri uwonyere angu uo moni ni mhachi, nao wadam'bonya mundu kutalwa kukaia na hachi uo ose urumiriagha kwa Jesu.
27Da dikukasiraki sena? Ndedina jekukasa. Kwa wundu ghwa indoki? Ni angu wei dawuyakatisha mabonyo gha Sharia? Hata; ela ni kwa wundu ghwa irumirio. 28Angu dawona kukaia mdamu wadatalwa kukaia na hachi kwa irumirio, si kwa kazi ra Sharia reni anduangi. 29Angu huwo Mlungu ni wa Wayahudi wiekeri, si wa wandu wa mbari zima wori anguwada? Hee, ni wa wandu wa mbari zima wori. 30Angu Mlungu ni umweri, nao uchawitala kukaia na hachi wandu wishamishiro kwa wundu ghwa irumirio jawo, na awo wiseshamishiro kwa chia ya ijo irumirio jawo wokoni.#Wuk. 6.4; Wagal. 3.20 31Da huwo keni diainja Sharia kwa wundu ghwa iji irumirio? Hata kutini. Wulalo ghwaro daimazira nicha.
Currently Selected:
WAROMA 3: TAITA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1997
All rights reserved.