WAROMA 2
2
Kutanya kwa Mlungu
1Kwa huwo ndekuwadie ilagho jingi jekudederia ee mdamu, hata ngera koko ani, iji kwamtanya mzima; angu kwa kumtanya, kwaakutanya kumoni; kwa kukaia oho kutanyagha kwadabonya maza iro reni.#Mat. 7.1; Lk. 6.37 2Isi daichi kukaia kutanya kwa hachi kwa Mlungu ni aighu ya awo wibonyagha maza sa iro. 3Oho mdamu, kuwitanyagha awo wibonyagha maza iro, na ii chia kuaribonya kumoni, kuaghesha wei kuchafufunuka kutanya kwa Mlungu? 4Angu kwaawuyaghumenya wungi ghwa wucha ghwake, na irumaghio jake ibaa; kusemanyagha angu wucha ghwa Mlungu ghwaawuyakuruda kupate kuhea? 5Ela kwa kukulwa ni ngolo kwako, kusene wundu ghohea, kwaawuyakuwikia kumoni machu Ituku ja Kutanywa; iji kutanya kwa hachi kwa Mlungu kuchaafunukulwa. 6Angu Mlungu uchamneka kula mundu karakara na kazi rake.#Zab. 62.12; Mak. 24.12 7Awo wawuyabonya mecha kwa kurumaghia, wikilola wubaa na ishima, na kudua kwa kala, uchawineka irangi ja kala na kala. 8Ela wandu wa sheshe, wiseisikiragha ija loli, wikinugha mawiwi, wichachelwa ni machu na kubia kubaa kwa Mlungu. 9Kuchakaia na wasi na kuwawa kwa kula mundu ubonyagha mawiwi; Myahudi kande, na Mgriki wori. 10Ela kula mundu ubonyagha mecha, uchapata wubaa, na ishima, na sere; Myahudi kande, na Mgriki wori. 11Angu Mlungu ndependeliagha mndungi anduangi.#Wuk. 10.17
12Awo wose wibonyere kaung'a kuseko na Sharia, wichatota kuseko na Sharia wokoni; nawo wose wibonyere kaung'a wikikaia aisi ya Sharia, wichatanywa kwa Sharia. 13Angu si awa wiisikiragha Sharia wiko na hachi imbiri ya Mlungu anduangi, ela ni awa wikatishagha Sharia niwo wichaatalwa kukaia na hachi. 14Angu wandu wa mbari zima, wisewadie Sharia ingi, iji wabonya kwa asili yawo maza ra Sharia, wakaia Sharia weni hata ngera ndewiwadie Sharia. 15Wawonyera seji agho ghikundwagha ni Sharia ghaandikilo ngolonyi kwawo; nia rawo naro rikiwishuhudia, na maghesho ghawo ghileghanagha ghikiwishitakia angu kewada ghikiwidederia. 16Huwo niko ichaakaia iji Mlungu uchaatanya maghesho gha wandu ghivisiro jija ituku, kwa chia ya Kristo Jesu; karakara na Ilagho Jiboie ijo nawuyajichila.
Wayahudi na Sharia
17Ela ngera kwakuwanga Myahudi, na kukusaghika kwa Sharia, na kukukasa kwa uko kummanya Mlungu kwako, 18na kumanya lukundo lwake, na kurumiriana na ijo jiko jiboie kuchumba, angu kufundishiro Sharia; 19na ikakaia loli kwawuyamanya koko kilongozi wa vitungure, mwengere kwa wandu wiko kirenyi, 20mfundishi wa wakelu, mwalimu wa wanake, kukikaia na kumanya kukatie na loli andenyi ya Sharia. 21Idana oho kuwifundishagha wazima, ndekudimagha kukufundisha kumoni? Kuachilia wandu wiseiwe, sena kuaiwa kumoni? 22Oho kughambagha mundu uselake, welee, kualaka kumoni? Oho kuzamilwagha ni milimu, kuaiwa hekalunyi? 23Oho kukukasagha na Sharia, kuamnonia Mlungu ishima kwa kuinona Sharia? 24Sa iji iandikilo “Irina ja Mlungu jasholelwa aghadi ya wandu wa mbari zima kwa wundu ghonyu.”#Isa. 52.5
25Kushamishwa kwafwane too iji kwaikatisha Sharia; ela iji kwainona Sharia, kushamishwa kwako ndekufwanagha anduangi. 26Ngera mundu useshamishiro waghiwadia mafundisho gha Sharia-lee, uko kusowa kushamishwa kwake ndekuchaatalwa kukaia kushamishwa anguwada? 27Kwa huwo, awo wiseshamishiro kimumbi, nawo waimazira Sharia, wichamtanya inyo mshamishiro muko na malaghiro gha Sharia ghiandikilo, kwa kuinona Sharia. 28Angu Myahudi wa loli si uja uwonekagha kwa meso, hata kushamishwa kwa loli si kuja kuwonekagha mesonyi anduangi. 29Ela Myahudi wa loli ni uo uko Myahudi nandenyi, na kushamishwa kwa loli ni uko kwa ngolonyi, kwa kiroho; siko kuja kwa Sharia iandikilo anduangi. Nao wadakaswa ni Mlungu, ndekaswagha ni wadamu anduangi.#Wuk. 30.6
Currently Selected:
WAROMA 2: TAITA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1997
All rights reserved.