KUZOYA 35

Mlungu kumrasimia Jakobo aja Betheli

1Nao Mlungu ukamzera Jakobo, “Wuka kughende Betheli, kukaia aho. Kuniaghie madhabahu aho nerekufutukieghe iji korekoghe kukimkimbia mwanyinyu Esau.”#Kuz. 28.11-17 2Niko Jakobo ukawizera wandu wose wa nyumbenyi kwake na wose orekwanyeghe nawo, “Ifunyenyi noko milungu ya kighenyi iko aghadi konyu, mukueleshe inyo mmbeni na kughalusa marwao ghenyu; 3nesi diwuke na kughenda cha Betheli, nipate kumuaghia Mlungu madhabahu aho; uo oreniteserieghe ngelo ya wasi ghwapo, sena ukakaia andwamweri nani andu kose nereghendieghe.” 4Nao wikamneka Jakobo iyo milungu yose ya kighenyi werekoghe nayo, na vipini verekoghe madunyi kwawo. Jakobo ukavirika vose kirimbenyi cha mudi ghwa mvure ghorekoghe kaavui na Shekemu.

5Hata iji wazoya charo, kiture kibaa chifumie kwa Mlungu chikawingia wandu wa mizi erekoghe mbai-mbai, nawo ndeweredimieghe kuwinugha wana wa Jakobo anduangi. 6Nao Jakobo andwamweri na wandu wake wose orekwanyeghe nawo, wikavika Luzu, nigho Betheli, muzi ghuko andenyi ya isanga ja Kanaani. 7Niko aho ukaagha madhabahu, ukakuwanga andu aho El-betheli, kwa kukaia Mlungu orekufunukueghe moni kwake iji orekoghe ukimkimbia mruna. 8Nao Debora, mleli wake Rebeka ukafwa, nao ukarikwa aisi ya mvure kusinyi ya Betheli; niko andu aho kukawangwa, “Alon-bakuthi.”#35.8 Alon-Bakuthi: Kutambua kwaro ni “Mvure ghwa mbori.”

9Iji Jakobo orewurieghe kufuma Padan-aramu Mlungu oremfutukieghe sena, ukamrasimia. Mlungu ukamzera, 10“Irina jako oho ni Jakobo; ndekuchaawangwa Jakobo sena, ela kuchawangwa Israeli.”#Kuz. 32.28 11Nao Mlungu ukamzera, “Ini ne Mlungu-Uwadie-Ndighi-Rose; kuve kuchurikie. Mbari na vichuku va mbari vichavalwa kwako, na wazuri wichafuma kwako oho.#Kuz. 17.4-8 12Isanga neremnekieghe Abrahamu na Isaaka, nichakuneka oho na kivalwa chako wori.” 13Nao Mlungu ukajoka kufuma andu aho werekoghe wikidedanya. 14Nao Jakobo ukadunga nguro ya igho andu aho orededanyeghe na Mlungu, ukajiwika wakfu kwa kujidunga kizongona cha kunywa, na mavuda.#Kuz. 28.18-19 15Nao ukakuwanga andu aho Betheli.

Kifwa cha Raheli

16Niko wikadamba kufuma Betheli; hata iji werekoghe kakula na Efrata, Raheli ukazoya kulumwa na kukumba lufu. 17Hata iji orekoghe ukikumba lufu, uja mvarishi ukamzera, “Kusakeobua angu idana kwapata mwana umu wa womi.” 18Nao iji roho yake erekoghe ikifuma (angu orefueghe) ukammbanga uo mwana Benoni, ela ndee ukammbanga Benjamini. 19Kwa huwo Raheli ukafwa, ukarikwa mbai na mbai ya chia eghenda Efrata (nigho Bethlehemu.) 20Jakobo ukadunga igho ja wukumbuso aho, najo jawonyera kaburi ya Raheli hata linu. 21Israeli ukachuria kudamba, ukadunga hema yake mnara ghwa Ederi na kimonu.

Wana wa Jakobo

(1 Mal. 2.1-2)

22Nao iji Israeli orekoghe ukikaia jija isanga, Reubeni ukaghenda na kulala na Bilha, muka mzumba wa ndee, na Israeli ukajisikira ilagho ijo.#Kuz. 49.4

23Idana wana wa Jakobo werekoghe ikumi na wawi. Wana wa Lea ni: Reubeni, mwana wa imbiri wa Jakobo, Simeoni, Lawi, Juda, Isakari na Zebluni. 24Wana wa Raheli ni: Josefu na Benjamini. 25Wana wa Bilha, mwai wa kazi wa Raheli ni: Dani na Naftali. 26Wana wa Zilpa, mwai wa kazi wa Lea ni: Gadi na Asheri. Awa werekoghe wana wa Jakobo werevailoghe Padan-aramu.

Kifwa cha Isaaka

27Nao Jakobo ukacha kwa ndee Isaaka aja Mamre, (nigho Kiriath-araba, angu Hebroni) andu Abrahamu na Isaaka werekaieghe.#Kuz. 13.18 28Matuku gha Isaaka gherekoghe miaka ighana na mirongo wunyanya. 29Isaaka ukafwa mghosi uchue matuku, ukarangana andwamweri na wakwawo wiidie, na wana wake, Esau na Jakobo, wikamrika.

Currently Selected:

KUZOYA 35: TAITA

Highlight

Compare

Copy